धनगढी–कैलालीमा निर्माणाधिन हुलाकी सडक क्षेत्रमा पर्ने घरहरू घरधनी आफैँले भत्काउन थालेका छन् ।
घरधनी आफै घर भत्काउन थालेपछि सडकको स्तरोउन्ती गर्न सजिलो भएको छ । पहिले एक लेनको सडक निर्माण गरिएको भएपनि धनगढी उपमहानगरपालिकाको क्याम्पस चौकदेखि मनहेरा (कालिका मन्दिर) सम्मको तीन किलोमिटर सडकलाई चार लेनको बनाउन थालिएको छ । यही तीन किलोमिटर क्षेत्रमा पर्ने घरहरू घर धनी आफैले धमाधम भत्काउन थालेका छन् ।
धनगढी उप–महानगरपालिकाका प्रमुख नृपबहादुर वडले सडक क्षेत्रमा पर्ने घरहरू घरधनीले भत्काएर सहयोग गरेका कारण काम गर्न सजिलो भएको बताए । ६ लेन सडक बिस्तार गर्दा सडक क्षेत्रका घरहरू भत्काउन आफैँ डोजरमा बसेर जवरजस्ती गर्नुपरेको बताउँदै नगरप्रमुख वडले भने, ‘तर क्याम्पस रोड मनहरा क्षेत्रका घरधनी आफैँ घर भत्काउन जुटेका छन् । सडकको स्तरबृद्धीले तत्काल घाटा भएपनि दुरगामी रूपमा फाईदा नै हुन्छ’ नगरप्रमुख वडले भने, ‘त्यसले विकास गर्नमा सहयोग गरेको देखिन्छ । धनगढीमा भैरहेको विकासमा सहयोग गर्ने घरधनी धन्यवादका पात्रपनि हुन्’ नगरप्रमुख वडले भने, ‘नगरवासी सबैलाई विकासमा अवरोध नगरी यसरी नै सहयोग गर्न अनुरोध गर्दछु ।’
धनगढी मनहेराकी प्रमिला लम्सालले कुनैपनि ठाउँमा हुने विकासमा स्थानीयहरूको भूमिका महत्वपूर्ण हुने बताईन् । घर अगाडी फराकिलो सडक बन्ने भएपछि स्वस्फूर्त रूपमा घर भत्काउने काम गरेका छौँ । रेलिङ्ग भत्काई सकेको बताउदै प्रमिलाले भनिन्, ‘भोली देखि घर भत्काउन सुरु गर्छु ।’
धनगढी उप–महानगरपालिका सहित जिल्लाका विभिन्न क्षेत्रमा भारतले कालोपत्रे गरेको ६९ किलोमिटर सडक खण्डलाई दुईदेखि चार लेन सम्म स्तरबृद्धी गरिँदै छ । सडकको स्तरबृद्धी गरिन थालेपछि सडक क्षेत्रमा पर्ने घर संरचनाहरू भत्काउन थालिएको हो । सडकको क्षेत्राधिकार ३० मिटर कायम भएकाले सो आसपासमा बनेका संरचना भत्काईन लागेको हुलाकी सडक योजना कार्यालय धनगढीका ईन्जिनियर तथा सूचना अधिकारी पदम मडैले बताए । उनले भने, ‘स्थानीयले आफ्नो संरचना आफै भत्काएर सहयोग गरेका छन् ।’
अहिले धनगढी उप–महानगरपालिकाको क्याम्पस चौकदेखि मनहेरा (कालिका मन्दिर) सम्मको तीन किलोमिटर सडकलाई चार लेन सहित अन्य खण्डलाई दुई लेनमा विस्तार गर्न प्रक्रिया अगाडी बढाईएको छ । बसन्ता सम्मको २८ किलोमिटर र बसन्ता देखि शत्तीसम्मको बाँकी १३ किलोमिटर र लम्की–टीकापुर–शत्ती २८ किलोमिटर सडक खण्ड दुई लेनमा स्तरोउन्ती गर्ने तयारी भएको ईन्जिनियर मडैले बताए ।
