चितवन–जीवनमा केहि गर्ने जोश र जाँगरका साथ अघि बढिरहेका रोशन राई १२ कक्षामा अध्ययनरत थिए । विशेषगरि उनको रुचि गायनमा थियो । उनी बजारमा आएका आधुनिक, पप, फिल्मी गीतहरू हुबहु गाउँथे । साथी , परिवार तथा शिक्षकहरू पनि उनको प्रतिभाबाट प्रभावित थिए र रोशन एकदिन ठुलो गायक बन्छ भन्ने कुरामा ढुक्क पनि थिए ।
बुवा वैदेशिक रोजगारीको सिलसिलामा विदेशमा थिए । घरमा आमा, एउटा भाई, एउटा वहिनीका साथ रोशन बस्दथे । १२ कक्षा पास गरेर काठमाण्डौं जाने अनि पढाई र कामको साथ आफ्नो गायक बन्ने सपना पुरा गर्ने र भाईबहिनीको जिम्मेवारी बहन गर्ने उनको योजना थियो, किनकी उनको बुवाको पनि विदेशमा भनेजस्तो राम्रो नभएर नेपाल फर्कने योजनामा थिए ।
भगवानले राम्रो स्वर दिएको रोशनको मृगौला भने जन्मँदै एउटा मात्र रहेको थियो । एउटा मात्र मृगौलाले पनि राम्रै काम गर्ने र बच्चैदेखि स्वास्थ्यमा खासै समस्या नआएकोले बेला बेलामा रोशनको एउटा मात्र मृगौला छ भन्ने कुराको हेक्का समेत हुँदैन थियो । एक्कासि १२ पढ्दापढ्दै रोशन बिरामी भए । ज्वरो आउने, जिउ सुन्निने हुन थाल्यो । सुरुमा परिवारले सामान्य नै समस्या होला भन्ने सोचे ।
चितवनकै हस्पिटलमा जचाइयो, तर रिपोर्ट आउँदा सबैजना छाँगाबाट खसेजस्तो भए । भर्खर १९ वर्ष लागेका र जन्मँदै एउटा मात्र मृगौला लिएर आएका रोशन राईको त्यही एउटा मृगौलाले पनि काम नगर्ने भयो अथवा बोलिचालीको भाषामा भनौ मृगौला फेल भयो । छोराको यस्तो खबरले उनको बुवा पनि विदेशबाट फर्किए । आफुसँग भएको खर्च र ऋण सहयोग लिएर छोरालाई काठमाण्डौं ल्याउँदै डाइलासिस गराउँदै सकियो । घरको आर्थिक स्थिति झनै नाजुक भयो । रोशनलाई उपचारको लागि काठमाण्डौं ल्याईराख्नुपर्नाले रोशनको पढाई र बुवाको काम पनि छुट्यो । आमा हिँडिरहन नमिल्ने साना साना नानीहरूलाई पनि हेर्नुपर्ने । यसरी नै २ वर्ष बित्यो ।
आफ्नो भर्खरको छोरा थलिएको देख्न नसकेर र डाइलासिसको सँधैको दुख तथा आउजाउको आर्थिक भार तथा छोराले नयाँ जीवन पाउने आशमा आमा विवा राईले छोरालाई एउटा मृगौला दिने निर्णय गरिन् । सबै टेस्ट गर्दा डोनर म्याच पनि गर्याे तर समस्या झन् थपियो । मृगौला प्रत्यारोपण गर्न १०, १२ लाख खर्च लाग्ने देखियो ।
घरको आर्थिक अवस्था एकदमै नाजुक रहेकोले र भर्खरको रोशन राईले नयाँ जीवन पाउन भन्ने हेतुले विरामी रोशन तथा उनको परिवारले जतिसक्दो सहयोगको लागि सम्पूर्ण देश विदेशमा रहेका नेपालीहरूलाइै आह्वान गरेका छन् । थोपा थोपा मिली समुन्द्र बन्छ भनेजस्तै तपाई हाम्रो थोरै थोरै सहयोगले रोशन राईले पक्कै नयाँ जीवन पाउनेछन् ।
