काठमाडौं – नेपालका लागि साउदी अरेबियाको राजदूतावासले भिएफएस ग्लोबल सर्भिसेस नेपालमार्फत भिसा प्रक्रिया अगाडि बढाउने निर्णय गरेसँगै वैदेशिक रोजगारी व्यवसायीहरु आक्रोशित भएका छन् । वैदेशिक रोजगारीका लागि नेपालीहरुको प्रमुख गन्तव्यमध्येको एक साउदीले सम्पूर्ण भिसा प्रक्रियामा एकाधिकार (सिण्डिकेट) हुनेगरी भिएफएसलाई भिसा सेन्टरको रुपमा तोकिएको भन्दै व्यवसायीहरु आक्रोशित बनेका हुन् ।
साउदी दूतावासले ८ मे २०२३ मा परराष्ट्र मन्त्रालयलाई सम्बोधन गरी पठाएको कूटनीतिक नोटप्रति असहमति जनाउँदै वैदेशिक रोजगार व्यवसायी संघले शुक्रबार विज्ञप्ति निकाल्यो । यतिमात्र नभई संघले दूतावासको निर्णय सच्याउन निर्देशन दिनुपर्ने भन्दै आइतबार श्रम, रोजगार तथा सामाजिक सुरक्षा मन्त्रालयको ध्यानाकर्षण गराउँदै श्रममन्त्री शरतसिंह भण्डारी र श्रमसचिव एकनारायण अर्याललाई ज्ञापनपत्र बुझाएको छ ।
संघले बुझाएको ज्ञापनपत्रमा भिएफएसको नामबाट वैदेशिक रोजगार व्यवसायीलाई गुमराहमा राखी झुक्याउने खेल भइरहेको भन्दै श्रमिकलाई थप आर्थिक भार पार्ने उद्देश्य राखेर खोलिएको संस्था भएको उल्लेख गरिएको छ । सोही पत्रमार्फत कामदारसँग जोडिने हरेक विषयमा श्रम मन्त्रालयसँग छलफल र स्वीकृतिविना खडा हुने भिसा सेन्टर, मेडिकल सेन्टरलगायतका संस्थाहरु संघलाई मान्य नहुने चेतावनी दिइएको छ ।
‘साउदी अरब मुलुकमा जान भिसा प्रक्रियाका लागि भिएफएस ग्लोबल सर्भिस नेपाल खडा गरी उक्त भिसा सेन्टरमार्फत कामदारका भिसा प्रक्रिया गर्ने भनिएको छ । यस विषयमा श्रम, रोजगार तथा सामाजिक सुरक्षा मन्त्रालयलाई ध्यानकर्षण गराउदै सो कार्य नगर्न÷नगराउन सम्बन्धित पक्षलाई निर्देशन गरिदिनुहुन माननीय मन्त्रीज्यू र सचिवज्यूसमक्ष हार्दिक अनुरोध गर्दछौं,’ संघले भनेको छ ।
संघले व्यवसायी र श्रमिकको अहितमा हुने कुनै पनि सिण्डिकेटको विपक्षमा रहेको जनाएको छ । केही महिनायतादेखि मलेसिया, साउदी अरेबिया, युएईलगायतका मुलुकमा व्यावसायिक आवरणमा केही व्यक्तिले सिण्डिकेट लागू गर्न खोजेको भन्दै संघले त्यसविरुद्ध वक्तव्य जारी गर्दै आएको छ ।
भिसासम्बन्धी प्रक्रियाका लागि भिएफएसलाई ‘भिसा सेन्टर’को रुपमा तोकिनु सिण्डिकेट भएको संघका महासचिव मेघनाथ भुर्तेलले बताए । दूतावासको निर्णय सच्याउनुपर्छ भन्नेमा श्रममन्त्री भण्डारी सकारात्मक रहेको भन्दै समस्या समाधानमा आवश्यक पहल गर्ने प्रतिबद्धता व्यक्त गरेको उनले जानकारी दिए । साथै, दूतावासले गरेको उक्त निर्णय फिर्ता लिन पनि भुर्तेलले आग्रह गरे ।
प्रकाशित मिति: सोमबार, जेठ १, २०८० ०९:४९
-1745656903.jpeg)