काठमाडौं– नेपाल ललितकला प्रज्ञा प्रतिष्ठानले राष्ट्रिय विभूति अरनिकोको स्मृतिमा आगामी २८ फागुनमा कला प्रदर्शनी गर्ने भएको छ ।
मुलुकको कलाकारिता क्षेत्रको विकास तथा नेपाली मौलिकतामा आधारित वास्तुकलालाई अन्तर्राष्ट्रिय तहमा पु¥याउन अरनिकोले गरेको योगदानलाई सम्झना गर्न उक्त प्रदर्शनी प्रतिष्ठान परिसरमा गर्न लागिएको हो ।
उपत्यकाका तीनवटै दरबार क्षेत्रमा करिब १०० बालबालिकालाई स्थलगत भ्रमण र कार्यशाला गराई उनीहरूले बनाएका चित्रलाई प्रदर्शनीमा राखिने बताइएको छ । प्रतिष्ठान–चित्रकला विभागले संयोजन गर्ने उक्त प्रदर्शनीका लागि आगामी ६ फागुनदेखि २० गतेसम्म बालबालिकालाई स्थलगत भ्रमण र कार्यशाला सम्पन्न गराइने प्राज्ञ एवं विभाग प्रमुख सुुष्मा राजभण्डारीले जानकारी दिए ।
अरनिकोको निधन भएको दिन ११ मार्चमा प्रतिष्ठानले गत वर्ष पहिलो स्मृति दिवस मनाएर अरनिकोको सम्झना गरेको थियो । सन् १२४४ मा पाटनमा जन्मिएका अरनिको निधन सन् १३०६ मार्च ११ तारिखमा चीनमा निधन भएको थियो ।
कलाकार अरनिको तथा उनको समूहले निर्माण गरेका कलाकृतिबारे खोज र अनुसन्धानका क्षेत्रमा प्रत्येक वर्ष प्रतिष्ठानले रचनात्मक कार्यक्रम गर्ने योजना बनाएको छ ।
तत्कालीन समयमा नेपाली कला र संस्कृतिलाई विदेशमा प्रचार गरेका उनको जीवनीमा अनुसन्धान गर्न बालबालिकालाई अभिप्रेरित गर्ने उद्देश्यले कार्यक्रम गर्न लागिएको प्राज्ञ भण्डारीले बताए । वास्तुकलामा निपुण मानिने कलाकार अरनिकोले विभिन्न धातुमा रसायनको प्रयोग गरी कला कृति सिर्जना गरेको विश्वास छ । उनको नेतृत्वमा नेपालबाट चीनतर्फ गएका कलाकारको समूहले सन् १२७१ मा चीनको राजधानी बेइजिङको मध्यभागमा प्यागोडा शैलीमा श्वेत चैत्यको निर्माण गरेको थियो ।
उक्त चैत्यमा नेपाली सीप र शैली प्रयोग गरिएकाले पनि त्यसको मौलिकताले देशलाई विश्वमा परिचित गराएको छ । तत्कालीन समयमा कला निर्माणका क्षेत्रबाट देशको सुसंस्कृति र सभ्यतालाई अन्तर्राष्ट्रियकरण गर्ने अरनिकोको वास्तविक नाम बलबाहु हो । प्रतिष्ठानले उनको शालिक निर्माण गरी परिसरमा राख्ने भनेको भए पनि त्यो कार्य पूरा गर्न सकेको छैन ।
