काठमाडौं–रुकुम पूर्वको सदरमुकाम गोल्खाडा घोषित भइसक्दा पनि त्यहाँबाट प्रशासनिक कामकारवाही सुरु नगरेपछि गोल्खाडा सरोकार समितिले दवावमूलक कार्यक्रमको घोषणा गरेको छ ।
सोमबार पत्रकार सम्मेलन आयोजना गरेर रुकुम पूर्वको सदरमुकाम गोल्खाडा कायम भई तत्काल प्रशासनिक कामबारबाही सञ्चालन गर्न दबाब दिने उद्देश्यले काठमाडौंस्थित् रत्नपार्कको शान्तिवाटिकामा शान्ति र्यालीसहित विभिन्न कार्यक्रम गर्ने घोषणा गरेको हो ।
समितिले जारी गरेको विज्ञप्तीमा भनिएको छ,‘नेपाल सरकारले ५ नम्बर प्रदेशअन्तर्गतको नयाँ जिल्ला रुकुम पूर्वी भागको सदुरमुकाम अर्को व्यवस्था नभएसम्म हाललाई भनि अस्थायी रूपमा रुकुमकोट तोकिएकोमा पछि २०७४ साल माघ ११ गते नेपाल सरकारको मन्त्रिपरिषदबाट पुथा उत्तर गंगा गाउँपालिका वडा नम्बर १२ गोल्खाडालाई सदरमुकाम तोक्ने कार्य भएको हो । पछिल्लो निर्णयको विरुद्धमा रुकुमकोट निवासी केही व्यक्तिहरूले सम्मानित सर्वोच्च अदालतमा रिट हाल्नुभएको थियो । प्रारम्भिक सुनुवाईको क्रममा पछिल्लो निर्णय हाललाई कार्यान्वयन नगर्नु भनि अन्तरिम आदेश जारी भई हाल संवैधानिक ईजलाशमा विचाराधिक अवस्थामा रहेको छ । हाल आगामी २९ गतेलाई पेशी तारेखसमेत तोकिएको अवस्था छ । सुनुवाईको क्रममा रहेको उक्त रिट खारेज गरी सरकारको अन्तिम निर्णय कार्यान्वयनको लागि जोडदार माग गर्दछौं ।’
सरोकार समितिका संयोजक केशरमान रोका मगरले गोल्खाडा सदरमुकाम घोषणा भएको दुई वर्ष पूरा भइसक्दा पनि अदालतको रिटले अल्झाउने कार्य भएको गुनासो पोखे । अस्थायी रूपमा अन्य स्थानबाट प्रशासनिक कार्य भइरहेकोमा पनि उनले आपत्ती जनाए । घोषित सरदमुकामबाट कामकाज शुरु नगरेपछि दबाबमुलक कार्यक्रममा जान बाध्य भएको उनको भनाई छ । उनका अनुसार कार्यक्रममा शान्ति र्याली, कोण सभालगायत हुनेछन् । नयाँ संविधान जारी भए पश्चात नयाँ जिल्ला रुकुम पूर्वको जन्म भएको हो । गोल्खाडामा ८० प्रतिशत मगर जाती भएकाले यसलाई सदरमुकाम बनाउँदा उचित हुने उनको भनाई छ । यसै सन्दर्भमा उनले सरकार र सर्वेच्च अदालतको ध्यानाकर्षण गराउन सम्पूर्ण मगर समुदायलाई शान्ति र्यालीमा भाग लिन पनि आग्रह गरेका छन् ।
त्यसैगरी कार्यक्रममा नेपाल मगर संघका अध्यक्ष तथा आदीवासी जनजाती महासंघका प्रवक्ता नवीन रोकाले रुकुम पूर्वको सदरमुकाम उपयूक्त ठाँउमा राख्न जरुरी रहेको बताए ।
