काठमाडौं– राष्ट्रिय तथा अन्तर्राष्ट्रिय नाट्य महोत्सवमा मञ्चनपछि बालनाटक ‘करेसा कन्सर्ट’को नियमित मञ्चन सुरु भएको छ ।
राराहिल मेमोरियल स्कूल कीर्तिपुरको नाटक राराहिलस्थित थिएटर मल कीर्तिपुर रंगमञ्चमा आइबतारदेखि नियमित मञ्चन सुरु भएको हो । रंगकर्मी केदार श्रेष्ठको लेखन, परिकल्पना तथा निर्देशन रहेको नाटक यसअघि नेपालबाट प्रतिनिधित्व गर्दै कोलकता अन्तर्राष्ट्रिय बालनाटक महोत्सव भारतमा प्रिमियिर गरिएको थियो । ३ देखि १३ वर्ष उमेर समूहका बालबालिकाका लागि लक्षित गरी तयार पारिएको नाटकमा अभिनय पनि बालबालिकाले नै गरेका छन् । निर्देशक केदार श्रेष्ठका अनुसार नाटक ‘करेसा कन्सर्ट’ विशुद्ध बालनाटक हो ।
नाटकमा नसना महर्जन (खुर्सानी र साग), सविना सेन (प्याज र लौका), ओसिन राई (धनियाँ), लकस महर्जन (फर्सी), सुधा खनाल (तीतेकरेला), आशियाना रायमाझी (गोलभेडा), कविना रोक्का (मुला), विजया पाण्डे (काँक्रो), सुजाता भट्ट (लसुन) र मञ्जु महर्जन (अदुवा)ले अभिनय गरेका छन् ।
करेसाबारीमा भएका तरकारीजन्य पात्रहरू नाटकमा चयन गरिएको छ । यी पात्रहरूको मपाईत्वले निम्त्याएको वैमनस्यता र झैँझडाबाट सुरु हुने कथा मेलमिलाप र सदभावमा पुगेर टुंगिन्छ । हरेक तरकारीबीच अस्वस्थ प्रतिस्पर्धा र घोचपेचबाट करेसाबारीमा सामाजिक समस्या उत्पन्न भएपछि करेसाबारीका मुखिया फर्सीले करेसाबारीमा एक कार्यक्रमको आयोजना गरेर समस्या समाधान गर्ने जुक्ति निकाल्छन् ।
उनले एक परिचयात्मक कार्यक्रम गर्दै सबैलाई आफ्नै बारेमा जतिसक्दो बढी कुरा भन्न र आफ्नै गुनगान गाउन लगाउँछन् । सबैले आफ्नोबारे विभिन्न प्रस्तुतिसहित महत्व र विशेषताबारे बोल्छन् । कार्यक्रम सकिँदासम्म सबैको अस्तित्व बोध गर्दै करेसाबारीमा सबैको उत्तिकै भूमिका र महत्व भएको निष्कर्ष निकाल्छन् र खुशी हुन्छन् ।
नाटक ‘करेसा कन्सर्ट’मा करेसाबारीका तरकारीहरूले आफ्नो महत्व र विशेषताहरूबारे चर्चा गरेको निर्देशकले सुनाए । नाटकमा बालबालिकालाई सहभागी गराउँदैमा सबै बालनाटक नहुने भन्दै उनले अझ बालनाटक मूलतः वयस्क र अनुभवी कलाकारहरूले बालबालिकाका लागि गरिदिने बताए ।
