हेटौँडा– वाग्मती प्रदेशका आन्तरिक मामिला तथा कानूनमन्त्री शालिकराम जमकट्टेलले पत्रकारकै लागि मन्त्रालयले पत्रकार कल्याणकारी कोष स्थापना गर्न प्रदेश सरकारको बैठकमा लैजाने तयारी गरिएको जानकारी दिएका छन् ।
चलचित्र विकास बोर्डका अध्यक्ष स्व केशव भट्टराईको श्रद्धाञ्जलिसभा तथा मोफसलमा ‘चलचित्रको विकास विस्तारमा पत्रकार’को भूमिका विषयक अन्तक्र्रियामा उनले यस्तो जानकारी गराएका हुन् । उनले प्रदेश सरकार सञ्चार संस्था र पत्रकारको हकहित, सुरक्षाका लागी कटिबद्ध रहेको पनि बताए । उनले भने, ‘प्रदेशभित्रका विभिन्न सञ्चार संस्था र पत्रकारको हकहित, सुरक्षा एवं सेवासुविधा उपलब्ध गराउने विषयमा सरकार कटिबद्ध छ ।’
उनले जेष्ठ सञ्चारकर्मी, गम्भीर प्रकतिका बिरामी र सुत्केरी महिला पत्रकारका लागि प्रदेश सरकारले तत्काल आर्थिक अनुदान उपलब्ध गराउने नीति बनाएको पनि बताए । उनले प्रदेशको स्थायी राजधानी हेटौँडामा मौजुदा पूर्व–पश्चिम राजमार्गको अवस्था साँघुरो भएको र यातायातको चाप बढ्दै जाँदा वैकल्पिक राजमार्गको विस्तार गरिनुपर्ने सोच सरकारले बनाएको र भविष्यमा वैकल्पिक राजमार्ग निर्माणका लागि प्रक्रिया थालनी भइसकेको स्पष्ट पारे ।
कार्यक्रममा बोर्डका सदस्य नरेन्द्र महर्जन, प्रदेश पत्रकार महासंघका अध्यक्ष प्रताप विष्ट, ब्रोडकाष्ट एशोशिएशन नेपाल (बान) का उपाध्यक्ष उज्वल चौलागाईं, चलचित्र पत्रकार संघ मकवानपुरका अध्यक्ष मणिराज गौतमलगायतले सञ्चार संस्था र चलचित्रकर्मीले आपसी समझदारीका साथ व्यावसायिक क्षेत्रलाई मर्या्दित र सर्वसाधारणको मन जित्ने प्रयास गरिनुपर्ने धारणा व्यक्त गरे ।
आइतबार सम्पन्न भएको चलचित्र पत्रकार संघ मकवानपुरको चौथो अधिवेशले मणिराज गौतमको अध्यक्षतामा नौ सदस्यीय कार्यसमिति सर्वसम्मत चयन गरेको छ । समितिको उपाध्यक्षमा कपिल खड्का, सचिवमा श्रीराम अर्जुन दाहाल, कोषाध्यक्षमा मनोज देवकोटा र सहसचिवमा रवीन्द्र गौतम चयन भएका छन् । सदस्यमा सन्नु रिजाल, दर्शन क्षेत्री, अमृता पराजुली र दीपकसिंह रुम्बा चयन भएको निर्वाचन कमिटीका संयोजक गिरिजा अधिकारीले जानकारी दिए ।
