सुनसरी -भारतबाट अवैध रुपमा ल्याएका विभिन्न किसिमका सामान प्रहरीले नियन्त्रणमा लिएकाे छ ।
सुनसरी जिल्लाको भोक्राहा नरसिंह गाँउपालिका ८ स्थित सीमा ईलाकाबाट बैशाख १५ गते सशस्त्र प्रहरीले करीव ३ लाख ८ हजार ५ सय रुपैयाँ बराबरको लत्ताकपडा बरामद गरेको छ ।भारतबाट अवैध रुपले नेपालतर्फ साईकलमा राखी ल्याउँदै गरेको उल्लेखित मुल्य बराबरको लत्ताकपडा बिओपी उल्टीले बरामद गरेको हो ।
सशस्त्र प्रहरीलाई टाढैबाट देख्नासाथै सामान छाडी साईकल लिई ब्यक्ति फरार भएकाे प्रहरीले जनाएकाे छ । यसैगरी सुनसरी जिल्लाको देवानगंज गाँउपालिका ६ स्थित राजगंज सिनवारीबाट बैशाख १५ गते सशस्त्र प्रहरीले करीब १ लाख १६ हजार रुपैयाँ बराबरको लत्ताकपडा बरामद गरेको छ ।
मोटरसाईकलमा राखी अवैध रुपले नेपालतर्फ ल्याउँदै गरेको उक्त लत्ताकपडा प्रस्तावित सीमा सुरक्षा गुल्म कप्तानगंज (बिओपी कप्तानगंज)ले बरामद गरेको हो । मोटरसाईकल चालक भने सशस्त्र प्रहरीलाई देख्नासाथै सोही ठाउँमा सामान छाडी फरार भएकाे प्रहरीले जनाएकाे छ ।
यसैगरी सोही जिल्लाको कोशी गाउँपालिका ८ स्थित पूर्व–पश्चिम लोकमार्गबाट बैशाख १४ गते सशस्त्र प्रहरीले करीव २ लाख ३ हजार रुपैयाँ बराबरको लत्ताकपडा बरामद गरेको छ । पूर्वबाट पश्चिमतर्फ जाँदै गरेको यात्रुबाहक बसमा राखी ल्याउँदै गरेको सो सामानको बिलविजक फेला नपरेपछि प्रस्तावित सीमा सुरक्षा गुल्म हरिपुर (बिओपी हरिपुर)ले बरामद गरेको हो । बरामद गरिएको सामान भन्सार कार्यालय सेतुबन्ध सुनसरीमा बुझाएको प्रहरीले जनाएकाे छ ।
