बनेपा– सञ्चार तथा सूचना प्रविधिमन्त्री गोकुलप्रसाद बाँस्कोटाले बालुवाटार जग्गा विषयमा सरकारको विरोध गर्नुको कुनै अर्थ नभएको बताएका छन् ।
उनले सो जग्गाको छानबिन सरकारले नभई अख्तियार दुरूपयोग अनुसन्धान आयोग र प्रहरीको सीआइबीले गरेकोले यसको दोष सरकारलाई दिन नहुने जनाए । यो विषयमा अदालतले फैसला गर्ने भएकाले दायराभित्र जो पर्छ त्यही जाने हुनाले सरकारको विरोधको कुनै अर्थ नभएको बताए ।
पनौती नगरपालिका–१ रयाले पर्खालचौरमा आयोजित वडा नं १ लाई ‘बालमैत्री स्थानीय शासन वडा घोषणा’ कार्यक्रममा उनले यस्तो बताएका हुन् ।
उनले बालुवाटार जग्गा विषयमा अख्तियारले छानबिन गरी नालीबेली बाहिर ल्याई मुद्दा दर्ता गरेको बताए ।
उनले भविष्यमा मानवजातिलाई पृथ्वीमा जीवित रहन र प्रकृति जोगाइराख्ने काम भावी सन्ततिको भएकाले बालपुस्तालाई सही दिशानिर्देशन गर्नुपर्ने उनको भनाई थियो । उनले घरको बालक राम्रो भएमा एउटा परिवार राम्रो हुनु हो भन्दै लाखौँलाख बालबालिका राम्रो भएमा सिङ्गो देश राम्रो हुने बताए । सक्षम व्यक्ति निकाल्न राष्ट्रले बालबालिकामा लगानी गर्न आवश्यक हुने भन्दै यसको लागी उत्पादनमा आम नागरिकलाई लाग्न आग्रह गरे । उनले राष्ट्र विकासको लागी नै सरकारले कृषि उत्पादन, पर्यटन, पूर्वाधार र ऊर्जालगायतका क्षेत्रमा व्यापक काम गरिरहेको बताए ।
सो अवसरमा मन्त्री बाँस्कोटाले सो नगरपालिका वडा नं १ लाई बालमैत्री भएको उद्घोष गरेका थिए ।
उक्त कार्यक्रममा प्रदेशसभा सदस्य बसुन्धरा हुमागाईंले विकासको पहिलो फड्को सडकबाट शुरु गरेको उल्लेख गर्दै ग्वार्को–शङ्खु दाहालटार र दाहालटार–कटुञ्जे चौकीडाँडा सडकखण्ड निर्माण अगाडि बढेको जानकारी दिए ।
जिल्ला समन्वय समिति काभ्रेपलाञ्चोकका प्रमुख उद्धव केसीले जिल्लाका १३५ वडामध्ये पाँचौँ नम्बरमा पर्न सफल भएको भन्दै वडा र नगरले बालमैत्री स्थानीय शासन वडा घोषणा गर्न राम्रो काम गरेको हुँदा अगामी दिनमा यसलाई निरन्तरता दिन आग्रह गरे ।
