धनगढी – संस्कृति, पर्यटन तथा नागरिक उड्डयन मन्त्री योगेश भट्टराईले धनगढी विमानस्थललाई अन्तर्राष्ट्रिय विमानस्थल बनाउन २० वर्षे गुरुयोजना निमार्ण गरेको बताएका छन् । शनिबार आयोजना गरेको धनगढी विमानस्थलको गरुयोजना प्रस्तुतीकरण कार्यक्रममा मन्त्री भट्टराईले बताएका हुन् ।
‘विमानहरू अन्तर्राष्ट्रिय उडान गर्न सकिन्छ’ मन्त्री भट्टराईले भने, ‘अनुमति पाएपछि भिसा लगाउने विभागको कार्यालय, भन्सार कार्यालय र क्वारेन्टाइन कार्यालय राखेर अन्तर्राष्ट्रिय उडान गर्न सकिन्छ । तर २० वर्षसम्म यात्रुको चाप र आवश्यकता अनुसार विमानस्थल विस्तार गर्ने लक्ष्य मन्त्रालयले लिएको बताए । उनले सुदूरपश्चिममा रहेका सबै ११ वटै विमानस्थललाई समेत सञ्चालन गर्ने योजना रहेको पनि बताए ।
उनले धनगढी विमानस्थलबाट ती विमानस्थलहरूमा उडान गर्नका लागि समेत मन्त्रालयले तयारी गरिरहेको बताए । उनले तत्काललाई कैलालीको टीकापुर र कञ्चनपुरको मजगाउँ विमानस्थललाई सञ्चालन गर्न मन्त्रालयले गृहकार्य गरिरहेको बताए ।
उनले ती दुई विमानस्थलबाट काठमाडौंको रूपमा उडान गर्न सकिने सम्भावना रहेको बताए । अछामको कमल बजार र साँझेबगर विमानस्थललाई समेत छिट्टै सञ्चालन गरिने जानकारी पनि दिए । पहाडी जिल्लामा रहेका कतिपय विमानस्थलहरू कालोपत्रे भइसकेर परीक्षण उडान पनि भइसकेकाले त्यसलाई धनगढी र काठमाडौंको उडानका लागि तयार गरिरहेको उनले बताए ।
सुदूरपश्चिम प्रदेशकी उद्योग, पर्यटन, वन तथा वातावरण मन्त्री माया भट्टले धनगढी विमानस्थललाई अन्तर्राष्ट्रिय विमानस्थल बनाउन २० वर्ष नकुर्ने बताउँदै प्रदेश सरकार समेत सो योजनामा लगानी गर्न तयार रहेको बताइन् । ‘संघीय सरकारले हरेक प्रदेशमा अन्तर्राष्ट्रिय विमानस्थल बनाइरहेको बेला सुदूरपश्चिममा मात्रै २० वर्ष किन कुर्नुपर्ने ?’ उनले प्रश्न गर्दै भनिन्, ‘धनगढी विमानस्थललाई यसै सरकारले अन्तराष्ट्रिय विमानस्थल बनाउनुपर्छ ।’
गुरुयोजना अनुसार धनगढी विमानस्थलाई विस्तार गर्न अझै दुई सय २७ विघा जमीन अधिग्रहण गर्नुपर्ने नागरिक उड्डयन प्राधिकरणका निर्देशक राजु पोखरेलले बताए ।
अहिले धनगढी विमानस्थलसँग ७० विघा जमीन मात्रै भएको बताए । उनले एक हजार आठ यस मिटर लामो धावनमार्गलाई तीन हजार बनाउने र ४४सि तथा ७३७३ विमान समेत अवतरण तथा उडान भर्न सक्ने गरी धनगढी विमानस्थललाई विस्तार गर्ने गुरुयोजना बनेको बताए । तीन चरणमा धनगढी विमानस्थललाई विस्तार गर्ने गुरुयोजना तयार गरिएको छ । भएको रनवेलाई विस्तार गर्ने, दुई हजार पाँच सय ५० मिटर लम्बाई र ४५ मिटर चौडाई भएको नयाँ रनवे, चार ल्यानको एक्सेस रोड, नयाँ टर्मिनल भवन, इन्टरल सर्भिस रोड, जहाज पार्किङ, पब्लिक डाइभर्सन रोड, स्टाफ होस्टेल बनाउने, कन्ट्रोल टावर, कार्गो कम्प्लेक्स, रिमोट एयर क्राफ्ट पार्किङ, पाँच सय गाडी अटाउने पार्किङ, विमानस्थलको पेरीफेरीमा ७ किलोमिटर रोड बनाउने लगायतका योजना गुरुयोजनामा उल्लेख छ । मन्त्रालयले शनिबार धनगढीमा गुरुयोजना कार्यान्वयन गर्न १२ अर्ब १४ करोड रूपैयाँको खर्च हुने जनाएको छ । मन्त्रालयले सो गुरुयोजना कार्यान्वयनका लागि प्रदेशका सरोकारवालाहरूसँग सुझाव समेत संकलन गरेको छ । उनीहरूले २० वर्ष धेरै लामो अवधि हुने भन्दै गुरुयोजना अनुसारका काम १०÷१५ वर्षमै गर्नुपर्ने माग गरेका छन् । उनीहरूले पछि जमीनको मुल्य बढ्ने बताउँदै तत्कालै अधिग्रहण गर्नुपर्ने एरिया छुट्याएर अधिग्रहण गर्न सुझाव दिएका छन् ।
कार्यक्रममा सुदूरपश्चिम प्रदेशका पूर्व सामाजिक विकास मन्त्री दीर्घ सोडारी, धनगढी र गोदावरी नगरपालिकाका मेयरहरू, उद्योग वाणिज्य संघका अध्यक्ष तथा प्रतिनिधिहरू लगायतले मन्त्रालयलाई धनगढी विमानस्थललाई अन्तराष्ट्रिय विमानस्थल बनाउन ढिलो नगर्न सुझाव दिएका थिए ।
