काठमाडौं- मलेसिया प्रहरीले शंकास्पदरुपमा मृत अवस्थामा फेला परेका वैदेशिक रोजगार व्यवसायी रिन्जी राईको झुण्डिएर मृत्यु भएको जनाएको छ । मार्भेलस इम्प्लोइमेन्ट नेपालको प्रबन्ध निर्देशकसमेत रहेका राईको हत्या आशंका गरिएको थियो ।
मलेसियाको प्रहरीले तयार पारेको प्रतिवेदनमा राईको झुण्डिएर मृत्यु भएको जनाइएको मलेसियास्थित नेपाली दूतावासले जानकारी दिएको मार्भेलसका अर्का सञ्चालक भरत पाण्डेले जानकारी दिए ।
राई मलेसियाको एक स्टार डोमेन कम्पनीको होस्टलको शौचालयमा झुण्डिएको अवस्थामा मृत फेला परेका थिए । झुण्डिएको अवस्थामा फेला परेका मृतक राईको खुट्टाले भुँइमा टेकिरहेको भिडियो तथा तस्बिर सार्वजनिक भएपछि हत्या भएको आशंका गरिएको छ ।
प्रहरीले झुण्डिएरै मृत्यु भएको बताए पनि राईको हत्या नै भएको हुन सक्ने पाण्डेले बताएका छन् ।‘मैले दूतावासमा सम्पर्क गर्दा मलेसिया प्रहरीले झुण्डिएरै मरेको रिपोर्ट दिएको जानकारी पाएको छु,’ पाण्डेले भने, ‘दूतावासले मृतकको शव नेपालमै ल्याएर पनि पोस्टमार्टम गर्न सक्ने प्रहरी रिपोर्टमा उल्लेख गरेको बताएको छ ।’
सोमबार नै आउने भनिएको पोस्टमार्टम रिपोर्ट मंगलबार (आज) दिउँसोसम्म प्राप्त दूतावासले जानकारी दिएको पाण्डेले बताए ।उनले कम्पनीको तर्फबाट आवश्यक छानबिन र सहयोगका लागि नेपाल वैदेशिक रोजगार व्यवसायी संघमा निवेदनसमेत दिएका छन् ।
साथै सोमबार प्रधानमन्त्री कार्यालय र गृह मन्त्रालयमा पनि निवेदन दिइएको पाण्डेले बताए । उनका अनुसार राईका परिवारले पनि सम्बन्धित निकायमा आवश्यक छानबिन र सहयोगका लागि निवेदन दिइसकेका छन् । निवेदनमा राईको नेपालीबाटै योजनाबद्धरुपमा हत्या भएको हुनसक्ने दाबी गर्दै शंकरप्रसाद आचार्य र महेन्द्रजंग शाहीको नाम उल्लेख गरिएको छ ।
मलेसियाको ग्यान्टिङ आइल्याण्डमा रहेको स्टार डोमेन कम्पनीमा कामदारको विवाद आएपछि राई त्यसको समाधानका लागि मलेसिया पुगेका थिए । सोही क्रममा कम्पनीको हेस्टेलमा बसेका राई भोलिपल्ट मृत अवस्थामा भेटिएका थिए । नेचा सल्यान–५ सोलुखुम्बु स्थायी घर भएका राई कवि तथा गीतकारसमेत हुन् । उनले थुप्रै फुटकर कविता र गीतहरु सिर्जना गरेका छन् ।
