काठमाडौं - मलेसियामा शंकास्पदरुपमा मृत अवस्थामा फेला परेका वैदेशिक रोजगार व्यवसायी रिञ्जी राईको हत्या भएको हुनसक्ने आशंका गरिएको छ ।
मार्भेलस इम्प्लोइमेन्ट नेपालका प्रबन्ध निर्देशकसमेत रहेका राई मलेसियाको एक कम्पनीको होस्टलको शौचालयमा झुण्डिएको अवस्थामा मृत फेला परेका थिए ।
झुण्डिएको अवस्थामा फेला परेका मृतक राईको खुट्टाले भुइँमा टेकिरहेको तस्बिर सार्वजनिक भएपछि वैदेशिक रोजगार व्यवसायीहरुले उनको हत्या भएको हुनसक्ने दाबी गरेका छन् ।
व्यवसायीहरुको आशंकाबीच मार्भेलसका अर्का सञ्चालक भरत पाण्डेले पनि राईको हत्या नै भएको हुनसक्ने बताएका छन् । ‘पोस्टमार्टम रिपोर्ट नआएसम्म के भएको हो, यकीन भन्न सकिँदैन,’ उनले भने, ‘सोमबार पोस्टमार्टम रिपोर्ट आउँछ भन्ने जानकारी पाइएको छ, त्यसपछि मात्रै के कसो भएको हो भन्नेमा खोजीनीति गर्न सहयोग पुग्छ ।’
उनले आवश्यक छानबिन र सहयोगका लागि नेपाल वैदेशिक रोजगार व्यवसायी संघमा निवेदनसमेत दिएका छन् । उक्त निवेदनमा राईको नेपालीबाटै योजनाबद्धरुपमा हत्या भएको हुनसक्ने दाबी गर्दै शंकरप्रसाद आचार्य र महेन्द्रजंग शाहीको नाम उल्लेख गरिएको छ ।
पाण्डेका अनुसार ग्याण्टिङ आइल्याण्डमा रहेको स्टार डोमेन कम्पनीमा कामदारको विवाद आएपछि राई त्यसको समाधानका लागि मलेसिया पुगेका थिए । समस्या समाधानका लागि बिहीबार आवश्यक छलफलपश्चात् कम्पनीको हेस्टेलमा बसेका राई भोलिपल्ट मृत अवस्थामा भेटिएका थिए ।
