काठमाडौं– वैदेशिक रोजगारीमा जान व्यक्तिगत श्रम स्वीकृति र पुनः श्रम स्वीकृतिको आवेदन अब स्थानीय तहबाटै दिन पाइने भएको छ । सरकारले आगामी वैशाख १ गतेदेखि ७५३ वटै स्थानीय तहबाट व्यक्तिगत श्रम स्वीकृति र पुनः श्रम स्वीकृतिको आवेदन लिने व्यवस्था गर्ने भएको छ ।
श्रम, रोजगार तथा सामाजिक सुरक्षा मन्त्रालयको जिम्मेवारीसमेत सम्हालिरहेका प्रधानमन्त्री पुष्पकमल दाहालले बिहीबार उक्त व्यवस्था लागू गर्ने निर्णय गरेका हुन् ।
वैदेशिक रोजगारीलाई थप व्यवस्थित, मर्यादित, सुरक्षित, पारदर्शी तथा सहज बनाउन स्थानीय तहमार्फत व्यक्तिगत र पुनः श्रम स्वीकृतिको आवेदन लिने व्यवस्था गर्न लागिएको मन्त्रालयले जनाएको छ । जनताको नजिकको सरकार स्थानीय तहमार्फत सेवा प्रवाह प्रभावकारी हुने भन्दै सरकारले सोहीअनुरुप व्यवस्था गर्ने निर्णय गरेको मन्त्रालयका सहसचिव एवं प्रवक्ता डण्डुराज घिमिरेले बताए ।
उनका अनुसार रोजगारीका लागि विदेश जाने नेपालीहरुले स्थानीय तहबाट श्रम स्वीकृति नभई आवेदनमात्रै दिन सक्ने छन् । ‘सेवालाई विकेन्द्रित गर्ने र स्थानीय डेस्कबाटै वैदेशिक रोजगारसम्बन्धी जानकारी पनि उपलब्ध गराउन सकियोस् भन्ने सरकारको अभिप्राय हो,’ प्रवक्ता घिमिरेले भने ।मन्त्रालयले बिहीबार विज्ञप्ति जारी गर्दै अब स्थानीय तहबाटै वैदेशिक रोजगारसम्बन्धी सूचना सरोकारवालामा पु¥याउने र वैदेशिक रोजगारीका लागि व्यक्तिगत श्रम स्वीकृति र पुनः श्रम स्वीकृतिका लागि आवेदन गर्न सकिने जानकारी गराएको छ ।
त्यसका लागि ७५३ वटै स्थानीय तहमा रहेका रोजगार सेवा केन्द्रमार्फत आवेदन लिनेगरी वैशाख १ गतेदेखि सेवा सञ्चालन हुने उल्लेख गरिएको छ । यस अगावै रोजगार सेवा केन्द्रका कर्मचारीको क्षमता अभिवृद्धिका लागि आवश्यक कार्य सञ्चालन गर्ने मन्त्रालयले जनाएको छ ।सरकारले यसअघि नै श्रम स्वीकृतिसम्बन्धी सम्पूर्ण कार्य सञ्चालनका लागि सातवटै प्रदेशमा रहेका श्रम कार्यालयहरूलाई अधिकार प्रत्यायोजन गरिसकेको छ ।
यसरी स्थानीय तहबाट व्यक्तिगत तथा पुनः श्रम स्वीकृतिका लागि आएका आवेदनहरुलाई अनलाइन प्रणालीमार्फत नै सम्बन्धित कार्यालयले स्वीकृति दिने व्यवस्था मिलाइने मन्त्रालयले जनाएको छ । यद्यपि, संस्थागतरुपमा अर्थात् म्यानपावरमार्फत हुने श्रम स्वीकृतिको आवेदनसम्बन्धी सेवा यथावत रहेको पनि मन्त्रालयले उल्लेख गरेको छ ।
प्रकाशित मिति: शुक्रबार, चैत १७, २०७९ ०९:५९
-1745656903.jpeg)