काठमाडौं - नेपाली सिनेमा जगतमा विभिन्न स्वाद लिएर चलचित्र बनाउने होडबाजी चलेको छ । दर्शकको मन जित्नका लागि विभिन्न मसलन्द राखेर चलचित्र बनाउन निर्देशक, निर्माताहरु लागि परेका छन् । यसैबीचमा करिब १६ वर्षदेखि कलाकारिता क्षेत्रमा रमाइरहेका सत्यराज चौलागाईंले सामाजिक कथावस्तुमा आधारित चलचित्र ‘विच्छेद’ ल्याएका छन् ।
यस चलचित्रमा मुकुन भुसाल र लक्ष्मी बर्देवाको लिड भूमिका देख्न सकिन्छ । उक्त चलचित्रलाई राज पण्डित,दिमेश श्रेष्ठ,सुवास चामलिङ राई र सावित्री ब्रजचार्यको सहकार्यमा निर्माण गरिएको छ । यस चलचित्रलाई सिम्पल एड मिडिया र रेड आई फिल्ममार्फत उत्पादन गरिएको छ ।
‘मायाको बारीमा’चलचित्रबाट सहायक निर्देशकको रुपमा काम गरेका चौलागाईंले सन् २०१८ मा चलचित्र ‘अनुराग’बाट निर्देशनमा डेब्यू गरेका हुन् ।
‘बिच्छेद’ चलचित्र सत्यराजको निर्देशनमा बनेको दोस्रो चलचित्र हो । यो चलचित्र आउँदो सालमा प्रदर्शनमा ल्याउने तयारीमा रहेको उनले बताएका छन् । अहिले पोष्ट प्रोडक्शनको काम भइरहेको निर्देशक सत्यराजले प्रभावसँग बताएका छन् ।
हाल काठमाडौंको बुढानिलकण्ठ ८ मा बसोबास गर्ने निर्देशक चौलागाईं पिता यज्ञप्रसाद चौलागाईं र माता धनमाया चौलागाईंको कोखबाट जन्मिएका हुन् । उनको पुर्खाैली थलो भने काभ्रेपलाञ्चोको चौरीदेउराली गाउँपालिका रहेको छ । सानैदेखि अभिनेताबाट चलचित्र क्षेत्रमा प्रवेश गर्ने सोच बनाएका थिए तर उनी अभिनेताका रुपमा नभई निर्देशकको रुपमा यस क्षेत्रमा प्रवेश गरेका हुन् ।
चलचित्र निर्देशन तथा गीत लेखनलाई सँगसँगै अगाडि बढाइरहेका निर्देशक चौलागाईंले सहायक निर्देशकको रुपमा भने करिब एक दर्जनभन्दा बढी चलचित्रमा काम गरिसकेका छन् । उनले सहनिर्देशन गरेका चलचित्रहरु ‘समय’, ‘कोहीनुर’, ‘नाइक’, ‘को आफ्नो’, ‘भाग सानी भाग’, ‘के म तिम्रो होइन र’, ‘म यस्तो गीत गाउँछु’ लगायत रहेका छन् ।
यस क्षेत्रमा काम गरिरहँदा उनले विभिन्न सम्मानबाट पनि सम्मानित हुने मौका पाएका छन् । उनले राष्ट्रिय समावेशी म्युजिक अवार्ड–२०७९ मा संघीय मामिला तथा सामान्य प्रशासन मन्त्री अमनलाल मोदीबाट सम्मानित भएका छन् । चलचित्र ‘अनुराग’बाट डेब्यू निर्देशकको रुपमा उनले फस्ट एभरेष्ट इन्टरनेशनल फिल्म अवार्डमा उत्कृष्ट पाँच मनोनयनभित्र पर्न सफल भएका हुन् ।
यसैगरी ‘अनुराग’ चलचित्रको ‘यस्तो साथी’ गीत बाट उनी रचनाकारको रुपमा सातौँ नेशनल राप्ती म्युजिक अवार्डमा उत्कृष्ट पाँचमा मनोनयनमा पनि पर्न सफल भएका छन् । त्यस्तै ‘चाहन्छु २’ म्युजिक भिडियोबाट निर्देशकको रुपमा आठौँ नेशनल राप्ती म्युजिक अवार्डको उत्कृष्ट पाँचमा परेका थिए भने म्युजिक भिडियो ‘माया तिमीसँगै’ बाट रचनाकारको रुपमा पनि उत्कृष्ट पाँचभित्र मनोनयनमा पर्न सफल भएका थिए ।
निर्देशक सत्यराज चलचित्र निर्देशन सँगसँगै गीत लेखनमा उत्तिकै सक्रिय रहेका छन् । उनले सन् २०१२ मा ‘साथी २०१२’ र २०१६मा ‘माया २०१६’ एल्बम बजारमा ल्याएका छन् । सुगम पोखरेल र अञ्जु पन्तको स्वर रहेको ‘यस्तो साथी’, प्रताप दासको स्वरमा रहेको ‘तिम्रो स्वरमा स्वर’, प्रविशा अधिकारी र प्रताप दासको स्वरमा रहेको ‘माया तिमीसँगै’ गीतको शब्द सत्यराजले लेखेका हुन् । यी गीत दर्शक स्रोतामाझ निकै लोकप्रिय बन्यो र स्रोताहरुबाट राम्रो प्रतिक्रिया पाएको उनले बताए ।
निर्देशक सत्यराजले म्युजिक भिडियो तथा सर्ट फिल्महरु पनि निर्देशन गरेका छन् । म्युजिक भिडियोहरु ‘सहनै गाह्रो’, ‘बुझेन मायाले’, ‘सपना बनेर, ‘साथी’, ‘मन मेरो के भो के भो’ लगायतमा उनको निर्देशनसँगै आफ्नै शब्द रहेको छ । सर्ट फिल्महरुमा उनले ‘संविधान’, ‘चोलीको तुना’, ‘आयो आयो’, ‘आइ विल मिस यू’ लगायत पनि निर्देशन गरेका छन् ।
यतिमात्र नभएर उनले निर्णयक मण्डलमा जुरीको भूमिकामा काम गरेका छन् । उनले स्टार म्युजिक एण्ड फिल्म अवार्ड–२०७८ र राष्ट्रिय समावेशी म्युजिक अवार्ड–२०७९मा जुरीको भूमिका निभाएको प्रभावलाई बताए ।लामो समयदेखि चलचित्र क्षेत्रमा सक्रिय रहेका सत्यराज आफू सधैं यस क्षेत्रमा लागिरहने बताउँछन् । चलचित्र क्षेत्रमा डेढ दशकको अनुभव हासिल गरिसकेका सत्यराज सधैं दर्शक स्रोतालाई नयाँ र उत्कृष्ट सिर्जना प्रस्तुत गर्ने प्रयत्नमा लागि परेका छन् ।
यस क्षेत्रमा अझ अब्बल बन्न र बनाउनका लागि उनी नेपाल चलचित्र निर्देशक समाजको १५औँ महाधिवेशनको कार्यकारी समितिमा सदस्यता पनि लिएका छन् । चलचित्र क्षेत्रको विकासका लागि सरकारले उचित कदम चाल्न जरुरी रहेकोले उनी यस समाज उत्थानका लागि सहभागी भएको बताउँछन् ।
