काठमाडौं– आसातित रूपमा कमाइ नहुने भए पनि खाडी मुलुकमा जाने युवाहरूको संख्या बढ्दै गएको छ । मुलुकमा रोजगार नभइरहेको अवस्थामा बढी लागत हाल्न नसक्ने र कम शिक्षा हासिल गरे पनि हुने भएपछि खाडी मुलुक जाने युवाहरूको सङख्या बढेको हो ।
वैदेशिक रोजगारका लागि खाडी मुलुकमा जानका लागि खासै सीप नचाहिने, कुनै विशेष तालिम लिनु नपर्ने र मुख्य रूपमा निश्चित भाषा पनि सिक्नु नपर्ने भएपछि युवाहरू खाडी मुलुक गएको यस क्षेत्रमा कार्यरत संघसंस्था र व्यक्तिहरूले पनि बताउँदै आएका छन् ।
राम्रो कमाइका लागि अमेरिका, युरोप अथवा एसियाकै विकसित मुलुकमा जानुपर्ने भए पनि त्यस देशमा जान कुनै न कुनै विषयमा विशेष दख्खल र भाषाको पनि अनिवार्यता भएपछि युवाहरू यी मुलुकहरूमा छिर्न सकेका छैनन् । त्यसमाथि यी मुलुकहरूमा जान लागत पनि उत्तिकै गर्नुपर्ने हुन्छ । तर, आमयुवाहरू त्यत्ति धेरै खर्च गर्न सक्दैनन् ।
वैदेशिक रोजगार विभागले सार्वजनिक गरेको यस महिनाको तथ्यांक अनुसार ५२ हजार २ सय २५ जना नेपाली कामदार वैदेशिक रोजगारीका लागि विदेशिएका छन् । जसमध्ये सबैभन्दा बढी खाडीका देशहरूमा गएका छन् । जसमा १२ हजार ५ सय ८४ जना साउदी अरब गएका छन् भने ११ हजार ८ सय ४० जना कतार गएका छन् । युएई जानेको संख्या १० हजार ७ सय १६ रहेको छ । मलेसिया जानेको संख्या १० हजार ६ सय ३ जना रहेको छ ।
त्यस्तै ,आर्थिक वर्ष ०७५÷७६ को तथ्यांक अनुसार पनि ५ लाख ८ हजार ८ सय २८ जना नेपाली कामदार वैदेशिक रोजगारीमा विभिन्न देशमा पुगेका छन् । यो तथ्यांकमा पनि ८० प्रतिशत नेपाली युवा मलेसिया र खाडीका देश जाने गरेको उल्लेख छ । योभन्दा बाहेकका देशहरूमा २० प्रतिशत जाने गरेको तथ्याकंले देखाएको छ । किनभने नेपाली युवाहरूको मुख्य र आकर्षक रोजगार गन्तव्य देशभित्र खाडीका देश, मलेसिया र युरोपका देश पर्दछन् । हाल सरकारले वैदेशिक रोजगारीमा जाने श्रमिकका हकमा संस्थागत १ सय १० देश र व्यक्तिगत १ सय ७२ देशका लागि श्रम स्विकृति जारी गर्दै आएको छ ।
