काठमाडौं–नेपाली कांग्रेसका सभापति शेरबहादुर देउवाले सरकारले सकारात्मक प्रभाव पार्ने विषयमा हस्तक्षेप नगरी नागरिकका स्वतन्त्रता खोस्ने कार्यमा मात्र हस्तक्षेप गरेको आरोप लगाएका छन् ।
सेन्टर फर डेमोक्र्याटिक इञ्जिनीयर्स नेपाल (सिडेन) ले आयोजना गरेको ‘दिगो पूर्वाधार विकास राजनीति, अर्थतन्त्र र वातावरण’ विषयक दुईदिने सम्मेलनमा उनले यस्तो आरोप लगाएका हुन् । उनले सकारले दिगो विकासका लागि गर्नुपर्ने काममा हस्तक्षेप गर्नुपर्नेमा त्यसो नगरी नागरिकको स्वतन्त्रतामा खोस्न मात्र ध्यान दिएको आरोप लगाए ।
उनले इञ्जिनीयर राष्ट्रनिर्माता भएकाले सडक, पुलजस्ता पूर्वाधार निर्माण गर्दा सुरक्षित तरिकाले बनाउन लाग्नुपर्ने सुझाव दिएका छन् । तर सरकारले यसप्रति ध्यान नदिँदा समस्या उत्पन्न भएको उनको आरोप छ । उनले सरकारले अरु कुरामा ध्यान दिनुभन्दा बरु सुरक्षित सडक निर्माणका लागि ध्यान पुर्याउन सुझाव दिए ।
उनले सही तरीकाले सडक निर्माण हुन नसक्दा दुर्घटना बढिरहेको पनि बताए । त्यस्तै उनले प्राविधिक अध्ययनबिना नै पाखा पहाड जताततै डोजर लगाएर सडक बनाउँदा दुर्घटना बढेको बताए । उनले कर्णाली राजमार्गमा बढी दुर्घटना हुने गरेकाले सुरक्षित बनाउनुपर्ने उनको धारणा थियो ।
कार्यक्रममा पार्टी उपसभापति विमलेन्द्र निधिले देश विकासका लागि भौतिक र राजनीतिक पूर्वाधार आवश्यक पर्ने बताएका छन् । उनले भौगोलिक विविधतालाई ध्यान नदिई पूर्वाधार विकासको डिजाइन गर्न नसकिने भएकाले यसतर्फ प्राविधिक केन्द्रित हुनुपर्ने धारणा राखे ।
पार्टी महामन्त्री डा शशांक कोइराला, पूर्व अर्थमन्त्री डा रामशरण महतले राजनीतिज्ञ र प्राविधिकका बीच अन्तरक्रिया शुरु भएकाले दिगो र वातावरणमैत्री पूर्वाधार विकासमा सहयोग पुग्ने विश्वास व्यक्त गरे । हिमाल, पहाड र तराईलगायत भौगोलिक विविधतालाई अवसरका रूपमा परिणत गरिनुपर्ने उनीहरूको विचार थियो । उनीहरूले समयमा नसकिने राष्ट्रिय गौरवको आयोजना सडक पुललगायत पूर्वाधारका शुरु भइसकेका एक हजार ८४० आयोजना अलपत्र बनेको बताए । तिनका लागि खर्च भइसकेको एक खर्ब १८ अर्ब खेर गएकोले यसतर्फ सरकारको ध्यान जानपर्ने बताए ।
नेविसंघ कार्यसमिति विस्तार
नेपाली कांग्रेसको भ्रातृ संस्था नेपाल विद्यार्थी संघको केन्द्रीय तदर्थ समितिमा पदाधिकारी थप गरी विस्तार गरिएको छ । पार्टी सभापति शेरबहादुर देउवाद्वारा गठित संघको केन्द्रीय समितिमा आइतबार दुई उपसभापति र पाँच महामन्त्री मनोनयन गरिएको पार्टी कार्यालयले जनाएको छ ।
त्यस्तै संघको केन्द्रीय कार्यसमितिको उपसभापतिमा तुलसा पन्त (झापा) र मुक्तिराज पौडेल (रूपन्देही) तथा महामन्त्रीहरूमा दीपक भट्टराई (तनहुँ), उर्मिला थपलिया (धादिङ), प्रभातकुमार दाहाल (मकवानपुर), बलदेव तिमल्सिना (सिन्धुपाल्चोक) र युवराज पाण्डे (स्याङ्जा) लाई मनोनयन गरिएको कांग्रेस मुख्यसचिव कृष्णप्रसाद पौडेलले जानकारी दिए ।
सभापति देउवाले यसअघि यही माघ १६ गते राजीव ढुङ्गानाको अध्यक्षतामा दुई महामन्त्रीसहित तीन सदस्यीय नेविसंघ केन्द्रीय तदर्थ कार्यसमिति गठन गरेका थिए ।
-1745656903.jpeg)