काठमाडौं– नवनियुक्त श्रम सहचारी र काउन्सेलरलाई नेपाल वैदेशिक रोजगार व्यवसायी संघले बिदाइ गरेको छ । संघले आइतबार राजधानीमा कक कार्यक्रमको आयोजना गरेर खाडीका केही मुलुकहरूका लागि नवनियुक्त श्रम सहचारी र काउन्सेलरहरूलाई बिदाइ गरेको हो ।
सरकारले खाडीका ४ मुलुकका लागि नियुक्त गरेका श्रम सहचारी तथा काउन्सेलरलाई संघले कार्यकाल सफलताको शुभकामना दिँदै सहकार्यका लागि आग्रहसमेत गरेका छन् । कार्यक्रममा वैदेशिक रोजगार व्यवसायीहरूले नवनियुक्त श्रम सहचारी तथा काउन्सेलरलाई नेपाली श्रमिकका साथै म्यानपावर व्यवसायीहरूले भोग्नुपरेका समस्या समाधानका लागि सहकार्य गरेर अघि बढ्न सुझाव दिएका छन् ।
कार्यक्रममा संघका अध्यक्ष विष्णु गैरेले वैदेशिक रोजगारलाई मर्यादित, व्यवस्थित र सुरक्षित बनाउन तथा वैदेशिक रोजगारीमा रहेका नेपाली श्रमिक कुनै पनि समस्यामा पर्न हुँदैन भन्ने पक्षमा व्यवसायीहरू रहेको बताएका छन् । तर, राजनीतिक पहुँचबाट राजदूत बनाइएका राजदूतबासबाट नै धेरै समस्या आएको उनले बताए ।
वैदेशिक रोजगार विभागले ल्याएको फेम्स् प्रणाली मात्र नभएर अन्य अवस्थामा पनि राजदूताबासबाट व्यावसायीहरूलाई अनावश्यक दुःख दिएको भन्दै उनले दूताबासले समन्वयात्मक भूमिका खेल्नुपर्ने बताएका छन् । राजदूताबासले नेपाल सरकार, नेपाली कामदार, नेपाली व्यवसायी र सम्बन्धित मुलुकबीच पुलको काम गर्नुपर्ने पनि बताए । अध्यक्ष गैरेले विशेषगरी उताबाट सञ्चालन हुनुपर्नेमा यताबाट सञ्चालन गर्नु परेकाले सूचना व्यवस्थापन प्रणाली (फेम्स) असफल भएको छ । जसले गर्दा अनलाइन सिस्टम लागू भए पनि व्यवहारिक नभएको अवस्थामा रोजगारदाताबाटै अनलाइन सिस्टम सुरु गर्नुपर्ने बताए ।
कार्यक्रममा उनले नवनियुक्त श्रम सहचारी तथा काउन्सेलरहरूलाई कार्यकाल सफलताको शुभकामना दिँदै व्यवसायीहरू निरन्तर सम्पर्कमा रहने भन्दै सहकार्य गरेर अघि बढन सुझाव दिएका छन् ।
त्यस्तै, कार्यक्रममा संघका पूर्वअध्यक्ष प्रेमबहादुर कटुवालले रोजगारदाता मुलुकमा विद्यमान अप्ठ्याराहरू बुझेर नेपाल सरकारलाई अवगत गराउन नवनियुक्त श्रम सहचारीहरूलाई सुझाव दिएका छन् ।
त्यस्तै, संघकै पूर्वअध्यक्ष एवं सल्लाहकार विमल ढकालले श्रम मन्त्रालय र परराष्ट्र मन्त्रालयबीच समन्वय हुन नसक्दा व्यवसायीले अप्ठ्यारो झेल्नु परेको बताएका छन् । दुई निकायको समन्वयको अभावले व्यवसायीहरू दोहोरो मारमा परेको भन्दै यसलाई अब कम गर्न नवनियुक्त श्रम सहचारीहरूले सहजीकरण गर्न सुझाव दिए । यस्तै संघका पूर्वअध्यक्ष बलबहादुर तामाङले माग प्रमाणिकरणको नाममा व्यवसायीहरूले धेरै झन्झट झेल्नुपरेको भन्दै यसलाई अनलाइन सिस्टममा लैजाने पहलका लागि आग्रह गरेका छन् ।
कार्यक्रममा युएईका लागि श्रम काउन्सेलरमा नियुक्त निर्मला थापाले मन्त्रालयबीचको समन्वय कायम गराउँदै वातावरण सहज बनाउनेतर्फ ध्यान दिने बताएकी छन् ।
त्यस्तै, साउदी अरबका लागि श्रम सहचारीमा नियुक्त जीवनकुमार राईले आफू वैदेशिक रोवगार बोर्डमा रहँदा सबैसँग सहकार्य गरेका अघि बढेको भन्दै त्यसरी नै वैदेशिक रोजगारको समस्यालाई समाधान गरेर अबको समयमा पनि सबैका सल्लाह सुझावलाई समेटेर अघि बढ्ने बताएका छन् । उनले व्यवसायी तथा सरोकारवाला निकायसँग समन्वय गर्दै आफूहरूले जिम्मेवारी निर्वाह गर्ने धारणा राखेका थिए । कतारका लागि श्रम सहचारीमा नियुक्त अनुज गौतमले नेपाल सरकार, व्यवसायी, नेपाली कामदार र कतार सरकारबीच समन्यात्मक भूमिका खेल्ने बताएका छन् । उनले पनि पहिलेको दिनमा जस्तै आगामी दिनमा पनि राम्रो गर्ने बताए ।
