दमौली–तनहुँको शुक्लागण्डकी नगरपालिका–६ खैरेनीटारकी कोपिला अर्याल घरमा बस्दा फेसबुक चलाउने, युट्युब हेर्ने काम गर्थे । उनलाई दिन बिताउनका लागि मोबाइल चलाउनुपर्ने बाध्यता थियो । तर माघ महिना शुरु भएसँगै उनलाई दिउँसोको समयमा मोबाइल चलाउने फुर्सद छैन । वडा नं ५ बेलचौतारामा स्थापना भएको ढुङ्ग्रो उद्योगले उनको दैनिकी बदलिदिएको छ ।
‘श्रीमान् वैदेशिक रोजगारीका लागि विदेशमा हुनुहुन्छ, म घरमा एक्लै छु’ अर्यालले भने, ‘घरमा यत्तिकै बस्दा दिन कटाउन पनि गाह्रो हुन्थ्यो, मोबाइल चलाउँदै बस्नुको विकल्प थिएन, तर अहिले उद्योगमा काम गर्न थालेपछि दैनिकीमा परिवर्तन आएको छ ।’ उनको बिहान ९ः०० देखि साँझ ५ः०० बजेसम्म उद्योगमा काम गर्दा समय बित्ने गरेको छ । ‘पहिला दिउँसोको समयमा हातमा मोबाइल हुन्थ्यो, अहिले ढुङ्ग्रो हुन्छ’ अर्यालले भने ।
श्रीमान्ले विदेशमा १०–१२ घण्टा काम गर्ने गरेको र अहिले आफूले पनि काम गर्न थालेपछि कामको महत्व पनि बुझेको अर्यालले बताए । उद्योगले सीप सिकाउनुका साथै आम्दानीको स्रोत पनि बनाएको उनले बताए । खैरेनीटारकै इन्द्रा अर्यालको पनि दिउँसोको समय त्यत्तिकै बित्थ्यो । उनको पनि उद्योगमा काम गर्न थालेपछि दैनिकी फेरिएको छ । बिहान चाँडै नै खाना खाएर घरधन्दा सकेर दिनभर उद्योगमा काम गर्ने गरेको उनले बताए ।
घरमै त्यत्तिकै समय खेर फाल्नुभन्दा उद्यमशील बन्ने उद्देश्यसहित उद्योगमा काम गर्न शुरु गरेको उनले जानकारी दिए । ‘घरमै बसेर खेर जाने समयको सदुपयोग गर्दा आम्दानीको स्रोत पनि भएको छ’ उनले भने । व्यास नगरपालिका–१० घर भई हाल शुक्लागण्डकी–५ बेलचौतारा बस्ने विष्णु थापाले रोजगारीले आम्दानीको स्रोत भएकाले केही कुरा किन्नुपर्दा श्रीमान्को भर पर्नु नपरेको बताए । ‘केही कुरा किन्न पर्दा श्रीमान्सँग पैसा माग्नुपथ्र्यो, अहिले आफैँले पनि अलि–अलि कमाउन थालेपछि श्रीमान्को भर पर्नुपरेको छैन्’ उनले भने ।
माछापुच्छ्रे फुड प्रोडक्टमा उनीहरूसहित ३० महिला र पाँच पुरुषले रोजगारी पाएका छन् । सबै महिला शुक्लागण्डकी आसपासका हुन् ।
स्थानीय पवनकुमार ढकाल, सुरज श्रेष्ठ, ढाकाराम सुवेदी, जयशंकर यादव र अभिषेक यादवको संयुक्त लगानीमा यही माघ १ गतेदेखि उद्योग सञ्चालनमा आएको छ । लगानीकर्ता ढकालको जग्गा भाडामा लिएर उद्योग सञ्चालन गरिएको छ ।
उद्योगमा हालसम्म ३५ लाख लगानी भएको सञ्चालक ढकालले जानकारी दिए । उक्त उद्योगबाट हाल ढुङ्ग्रोमात्रै उत्पादन भइरहेको र निकट भविष्यमा चिजबललगायत पनि उत्पादन शुरु गरिने उनले बताए । ‘शुरुआती चरण भएको भएर अन्य सामग्री उत्पादन गर्न सकेका छैनौँ, तर केही समय पछाडि अन्य सामग्री पनि उत्पादन गर्ने गरी काम थालेका छौँ’ उनले भने । उनका अनुसार उद्योगबाट हाल ७० प्याकेट ढुङ्ग्रा उत्पादन भइरहेको र मागअनुसार पुर्याउन कठिन भइरहेको छ ।
उद्योगबाट उत्पादित ढुङ्ग्रा तनहुँको शुक्लागण्डकी नगरपालिका, ऋषिङ गाउँपालिका, भीमाद नगरपालिकाका साथै पोखरा, नारायणगढ, बागलुङ, स्याङ्जालगायतका ठाउँमा निर्यात हुने गरेको छ । ‘बजारको कुनै समस्या छैन, शुरुआत भएका कारण मागअनुसारको उत्पादन पनि गर्न सकिरहेका छैनौँ’ ढकालले भने । उद्योगमा काम गर्ने कामदारलाई हाल दैनिक २०० का दरले पारिश्रमिक दिइएको र केही समय पछि मासिकरूपमा नै पारिश्रमिक दिइने उनले जानकारी दिए । रासस
