धनगढी–कैलालीका स्थानीयतहहरूले अनियन्त्रीत मदिराको विक्रीवितरणलाई नियन्त्रण गर्नका लागि साझा कानुन बनाउने तयारी भएको छ ।
शनिवार धनगढीमा बसेको कैलालीका १३ वटै स्थानीयतहको बैठकले मदिराको विक्रीवितरणलाई ब्यवस्थित बनाउनका लागि साझा कानुन ल्याउने निर्णय गरेको हो । कानुन निर्माणका लागि जिल्ला समन्वय समिति कैलालीका संयोजक सूर्यबहादुर थापाको संयोजकत्वमा ३ सदस्यीय मस्यौदा तयारी समिति गठन गरिएको छ । सदस्यहरूमा धनगढी उप–महानगरपालिकाका प्रमुख प्रशासकिय अधिकृत र टिकापुर नगरपालिकाका कानुनी सल्लाहकार रहने निर्णय गरिएको छ । समितिले एक महिना भित्र मस्यौदा तयार पारेर स्थानीयतहको समन्वय बैठकमा पेश गर्ने निर्णय भएको जिल्ला समन्वय समितिका संयोजक सूर्यबहादुर थापाले बताए । उनले भने, ‘साझा कानुन बनाउनुपर्ने भएकाले यसलाई जिल्ला सभाले पास गर्ने छ ।’
धनगढी उप–महानगरपालिकाका प्रमुख नृपबहादुर वडले पछिल्लो समयमा आत्महत्याका घटना बढ्दै गएकाले साझा कानुन बनाएर कडाई गर्नुपर्ने अवस्था आएको बताए । उनले भने, ‘मदिराका कारण घरेलु हिंसाका घटना बढेका छन् त्यही घटना आत्महत्यामा परिणत भएका छन् ।’ नगरप्रमुख वडले कैलालीमा दैनिक जसो आत्महत्या र अपराधका घटना बढ्नुको पछाडी अनियन्त्रीत मदिराको विक्रीवितरण भएको बताए । नगरप्रमुख वडाका अनुसार कानुनमा मदिरा विक्रीवितरण गर्ने समय, क्षेत्रलगायत मदिरा सेवन गर्नेका लागि समेत कार्डको ब्यबस्था गर्ने गरि कानुन ल्याउन लागिएको छ ।
कैलालीका प्रमुख जिल्ला अधिकारी यज्ञराज बोहराले मदिराको विक्रीवितरणलाई व्यवस्थीत गर्ने, लागुपर्दाथको दुव्र्यशनलाई न्यूनिकरण गर्नका लागि अभियान चलाउनेलगायतका निर्णय भएको बताए । धनगढी उप–महानगरपालिकाका उप–प्रमुख सुशीला मिश्र भट्टले लागुपदार्थको दुव्र्यशनलाई न्यूनिकरण गर्नका लागि सबै स्थानीयतहहरूबाट दुई जनालाई श्रोत ब्यक्तिको रूपमा तयार पार्ने निर्णय भएको बताईन् । उनले भनिन्, ‘ती ब्यक्तिलाई विज्ञ प्रशिक्षकहरूबाट तालिम दिईने छ त्यसको समन्वय धनगढी उप–महानगरपालिकाले गर्ने छ ।’ समन्वय बैठकको अध्यक्षता धनगढी उप–महानगरपालिकाका प्रमुख नृपबहादुर वडले गरेका थिए ।
-1745656903.jpeg)