रोशी (काभ्रे)– सञ्चारमन्त्री माननीय बहादुरसिंह तामाङले सरकारले वाक स्वतन्त्रता खोसेको आरोप लगाएका छन् ।
बुधबार काभ्रे जिल्लाको रोशी गाउँपालिका–८ खार्पाचोकमा खार्पाचोक युवा क्लबद्वारा आयोजित ल्होछार कार्यक्रममा नेपाली कांग्रेस केन्द्रीय सदस्यसमेत रहेका सांसद तामाङले सरकारले निरंकुशता अंगालेको भन्दै वाक स्वतन्त्रता खोसेको आरोप लगाए ।
सञ्चार विधेयकमा जबरजस्ती जनताको वाक स्वतन्त्रता हक खोसेर सरकारले निरंकुशता अंगालेको उनले बताएका छन् । उनले तत्कालीन समयमा नेकपा माओवादीले नुवाकोटको ककनीमा ताम्सालिङ घोषणा क्रममा पूर्वप्रधानमन्त्री बाबुराम भट्टराईले निम्तो गर्दाखेरी सिंहदरबारको डबलीबाट घोषणा गर्ने हो भने उपस्थित हुनेछु नत्र आश्वासन सुन्न मात्रै नआउने जवाफ दिएको स्मरण गरे ।
यसैगरी बिशेष अतिथि पूर्व सभासद एवं नेका काभ्रे क्षेत्र नम्बर १ का सभापति तिर्थबहादुर लामाले बहुजातीय र समतामूलक समाजमा सांस्कृतिक अपनत्व सबैले स्विकार्नुपर्ने बताए र उनले थपे विगतमा शासन र प्रशासन तहमा पिछडिएका समुदायको उपस्थिति गराउनुपर्छ भनेर हिंसात्मक आन्दोलन गरे तर त्यसको प्रतिफल ठिक उल्टो भएर नारामा सिमित भएको छ ।
यसैगरी रोशी गाउँपालिका अध्यक्ष डिबी मोक्तानले पुर्खाहरूले भिमफेदीमा गाडी र रानीवनबाट दाउरा बोकेको इतिहास नभुलेको बताउँदै माओवादी आन्दोलनले पनि मुक्तिको नाममा समुदायको हितमा आधार बनाउन नसकेको जिकिर गरे । उनले थपे सबैको सहअस्तित्व स्विकार्दै बसेका नेपालीले आफ्नो घरटोल र समुदायबाट संस्कार संस्कृति जोगाए मात्रै बृहतरूपमा उल्लेख जागरण हुनसक्छ ।
गाउँपालिका उपाध्यक्ष लक्ष्मी बर्तौलाले एकले अर्कोको संस्कृतिलाई सम्मान गर्न सकेमात्रै सामाजिक विकास र सांस्कृतिक समृद्धि हुने बताइन् ।
गापाकै प्रवक्ता एवं वडा नम्बर ६ का अध्यक्ष पदम लामाले गाउँपालिका भित्र रहेका सबै समुदायको साँस्कृतिक चाडपर्वलाई समान हैसियतमा गापाले सम्मान गरेको उल्लेख गरे ।
प्रशासकीय अधिकृत डमरु दाहालले प्रत्येक समुदायको संस्कृति नेपालको अमुल्य सम्पदा हुने भएकोले सम्बन्धित समुदायले र सरकार मिलेर अनुसन्धानात्मक अध्ययन गर्दै जोगाउनुपर्ने बताए ।
नेपाल तामाङ युवा घेदुङका केन्द्रीय उपाध्यक्ष संगम लामाले युवाहरू एक भएर लागेमात्रै पुर्खाको सांस्कृतिक नासो संरक्षण गर्न सकिने बताए ।
युवा घेदुङकै केन्द्रीय अध्यक्ष विलम मोक्तानले हाम्रो बाजेले चलाएको संस्कारलाई अनुसरण गर्दै समयानुकूल विकास गरेपछि मात्रै संस्कृति संरक्षण हुने बताए ।
कार्यक्रम प्रारम्भमा नै बुद्धपार्कको प्रमुख अतिथि प्रतिनिधि सभा सदस्य तामाङले लामा गुरुहरूको मोलमपाठ सँगै शिलान्यास गरेका थिए ।
सञ्चारकर्मी मिक्साङ वाइबाद्वारा सञ्चालित कार्यक्रममा स्थानीय बाल गायिका प्राप्ति लामादेखि जादुगरसम्मले मनोरञ्जन दिएका थिए । जादुगर सुवास महत, बिशाल काल्तान, जितु लोप्चन, सुस्मा मोक्तान विजय थोकर, प्रयास दोङ, प्रतिमा, एनिशा, आशिका र प्रनिशाले आ–आफ्नो प्रस्तुति गरेका थिए । सोही वडाका अध्यक्ष मिकासजीत लामाको सभाध्यक्षतामा कार्यक्रम सम्पन्न भएको थियो ।
