रूपन्देही–प्रदेश नं ५ का मुख्यमन्त्री शंकर पोखरेलले यतिखेर मुलुक संविधान कार्यान्वयनको अभियानमा सफलतापूर्वक अघि बढ्दै गएको बताएका छन् ।
शहीद दिवसका अवसरमा शुभकामना सन्देश दिँदै उनले यस्तो बताएका हुन् । उनले संघीय लोकतान्त्रिक शासन व्यवस्थालाई बलियो बनाउन पनि संविधान कार्यान्वयन अति आवश्यक भएको बताए ।
नागरिकका सपना पूरा गर्न प्रदेश सरकार दृढ रहेको बताउँदै विकास र समृद्धिमार्फत राज्यलाई बलियो बनाउन प्रदेश सरकार कटिवद्ध भएको उनको भनाई थियो । उनले समृद्ध प्रदेशका माध्यमबाट समृद्ध राष्ट्र निर्माण गर्ने अभियानमा भएकोले प्रदेशका सबै राजनीतिक दल, समुदाय, संघसंस्था र आम नागरिकमा सहयोग अपरिहार्य भएको बताए ।
उनले शहीदले राणा शासनको अन्याय र अत्याचारबाट नेपालीलाई मुक्ति दिलाएको प्रसंग कोट्याउँदै प्रजातन्त्र स्थापनाका लागि शहीदले बलिदान गरेको बताए । उनले प्रजातन्त्र स्थापनाका लागि जीवन बलिदान गर्ने गङ्गालाल श्रेष्ठ, शुक्रराज शास्त्री, धर्मभक्त माथेमा र दशरथ चन्दलगायत सम्पूर्ण ज्ञातअज्ञात शहीदप्रति हार्दिक श्रद्धाञ्जलि अर्पण गर्दै उनीहरूको बलिदानले आज हामी स्वतन्त्रताको उपयोग गरिरहेको जनाए । मुख्यमन्त्री पोखरेलले शहीदले देखाएको न्यायपूर्ण समाज निर्माणको बाटोमा अविचलित ढङ्गले लाग्न प्रतिबद्ध रहँदै हामी सबैको सक्रिय सहभागिता हुने विश्वास व्यक्त गरे । अन्याय र अत्याचारको अन्त्य तथा न्याय, स्वतन्त्रता र समतामूलक समाज निर्माणका लागि ज्यानको आहुति दिने शहीदकै योगदानले नेपालका तीन ठूला राजनीतिक परिवर्तन सम्भव भएको बताउँदै उनले विसं २००७ को जनक्रान्तिबाट १०४ वर्षे जहानियाँ राणा शासनको अन्त्य गरी प्रजातन्त्रको प्रादुर्भाव भएको उल्लेख गरे ।
संविधानले एकात्मक र केन्द्रीकृत राज्यव्यवस्थाको अन्त्य गरी संघात्मक राज्यव्यवस्थाको व्यवस्था स्थापना गरेको जनाउँदै उनले संविधानले नागरिकका गाँस, बास, कपास, शिक्षा, स्वास्थ्य र रोजगारको प्रत्याभूति गरेको उल्लेख गरे । संविधानमा व्यवस्था गरिएका नागरिकका यी मौलिक हक कार्यान्वयन गर्न राज्य बलियो हुनुपर्ने बताउँदै उनले बलियो राज्यले मात्रै नागरिकको मौलिक अधिकारलाई व्यावहारिकरूपमा कार्यान्वयन गर्नसक्ने बताए ।
