काठमाडौं–राष्ट्रिय जनता पार्टी (राजपा) नेपालका अध्यक्ष मण्डलका संयोजक तथा सांसद महेन्द्र राय यादवले आफ्नो पार्टी केन्द्रीय सरकारमा जानेबारे कुनै छलफल नभएको स्पष्ट पारेका छन् ।
बिहीबार आयोजना गरेको साक्षात्कारमा बोल्दै संयोजक यादवले सरकारमा सहभागी हुने कुरा आफूहरूको प्राथमिकता नभएको जिकिर गरे । उनले आफ्नो पार्टीले प्रतिनिधिसभाको लागि उपसभामुख नमागेको स्पष्ट पारे । उनले भने,‘हामीले उपसभामुख हाम्रो पार्टीलाई देउ भनेर मागेका छैनौं । यो सरकारले हामीलाई उपसभामुख किन दिन चाहेको छ ? हामीले बुझ्न सकेका छैनौं ।’ सदन र सडक आफूहरूको नीति भएको सुनाउँदै उनले भने,‘मधेशमा भएका सहिदहरूका सपना साकार पार्नको लागि र माग पूरा गराउनको लागि हामीले कुनै पद, सरकार र उपसभामुख हाम्रो माग होईन् ।’
वर्तमान सरकारले संविधान संशोधन गर्छ भन्ने कुरामा आफूहरू अझैपनि विश्वस्त रहेको संयोजक यादवको भनाई छ । मधेश आन्दोलनका घाईतेहरूको अझैपनि उपचार हुन नसकेको र मुद्दा लागेका कार्यकर्ताहरू फरार रहेको सुनाउँदै उनीहरूको माग पूरा गर्नुपर्ने उनले सुझाए ।
यादवले राजपा नेपाल र समाजवादी पार्टीबीच एकताको प्रक्रिया अघि बढिरहेकोले एकता हुने विश्वास दिलाए । उनले एकताको लागि धेरै कुरा मिलिसकेको जिकिर गरे । उनले दुवै पार्टीको बराबर संख्या भएकोले सम्मानजनक नेतृत्व मिलाउने तयारी भएको पनि स्पष्ट पारे । उनले दुई पार्टीबीचको एकता राष्ट्रिय आवश्यकत्ता भएको औंल्याए । उनले आफूहरूले चाँडोभन्दा चाँडो एकता प्रक्रिया टुंगोमा पुगोस भन्ने चाहेको पनि सुनाए । तर, नेपाल कम्युनिष्ट पार्टी (नेकपा) र नेपाली कांग्रेसले आफूहरूको एकता नचाहेको उनको आरोप लगाए । यादवले प्रदेश नम्बर २ को राजपा नेपाल–समाजवादी पार्टीबीचको सरकारको वर्तमान गठबन्धन नटुट्ने पनि दाबी गरे ।
उनले भने,‘२ नम्बर प्रदेशको सरकार भनेको मधेशी, उत्पीडन, विभेदमा परेका समूदायको जनताको सरकार हो । यो सरकार ५ वर्षसम्म रहन्छ । कुनै तलमाथि हुँदैन । अहिले जसको नेतृत्वमा छ, त्यही नै रहन्छ । तर हामी यसलाई सुदृढ गर्न खोज्छौं । विकास निर्माणको प्रक्रियालाई अघि बढाउने काम गर्छौं ।’
उनले २ नम्बर प्रदेशको सरकारलाई गिराउने भनेर बाहिर हल्ला र चर्चा चलेपनि त्यसमा कुनै सत्यता नभएको भन्दै कुनै सरकार ढल्नेबारे कुनै खतरा नरहेको जिकिर गरे । डिम्पल कुमारी झाले राज्यमन्त्रीबाट दिएको राजीनामालाई पनि उनले आन्तरिक मामिलाको संज्ञा दिए ।
एमसिसी विद्येयक संसदमा दर्ता भएको सुनाउँदै सत्तारुढ दल नेपाल कम्युनिष्ट पार्टी (नेकपा) ले सर्वसम्मतीमा ल्याए आफूहरूको यसबारेमा सकारात्मक सोच रहेको बताए ।
