एजेन्सी - विश्व बैंकका अध्यक्ष डेभिड माल्पासले आफ्नो कार्यकाल सकिनु अगावै राजीनामा दिने घोषणा गरेका छन् ।
माल्पासद्वारा बुधबार जारी विज्ञप्तिमा भनिएको छ, “विश्वको प्रमुख विकास संस्थाको अध्यक्षको रुपमा सेवा गर्न पाउनु ठूलो सम्मान र सौभाग्यको कुरा हो । विकासशील देशले अभूतपूर्वसङ्कटको सामना गरिरहेको अवस्थामा बैङ्क समूहले नयाँ गति, नवीनता र प्रभावको साथ प्रतिक्रिया दिएको छ ।”
माल्पासले चार वर्षभन्दा बढी समय काम गरेपछि विश्व बैंकको आर्थिक वर्षको अन्त्यमा जुन ३० मा पदबाट राजीनामा दिने विश्व बैंकले जनाएको छ । विश्वका १८७ राष्ट्रको समूह विश्व बैंकले गरिबी न्यूनीकरणका लागि विकासशील मुलुकलाई ऋण दिने गरेको छ ।
अमेरिकाका पूर्वराष्ट्रपति डोनाल्ड ट्रम्पले माल्पासलाई सन् २०१९ मा पाँच वर्षका लागि विश्व बैंकको प्रमुखमा नियुक्त गरेका थिए । सबैभन्दा ठूलो शेयरधारकको रूपमा, संयुक्त राज्य अमेरिकाले परम्परागत रूपमा यसको राष्ट्रपति नियुक्त गर्दछ । माल्पासको कार्यकालमा, सङ्गठनले विश्वव्यापी महामारी र युक्रेनमा रूसको युद्धसहित धेरै सङ्कटहरूको सामना गरेको थियो ।
उनकाे बहिर्गमनले बाइडेन प्रशासनलाई विश्व बैंकको नयाँ प्रमुख नियुक्त गर्न अनुमति दिन्छ । अमेरिकाले परम्परागत रूपमा विश्व बैंकको अध्यक्ष छान्न पाउँछ, जुन पाँच वर्षको पद हो । युरोपेली सङ्घले अन्तर्राष्ट्रिय मुद्रा कोषको प्रमुख चयन गर्ने प्रचलन छ ।
