काठमाडौं–आफूलाई बेलायत पठाइदिने प्रलोभन देखाएर बिदुर नगरपालिकाका पूर्व मेयर तथा राष्ट्रिय प्रजातन्त्र पार्टीका पूर्वकेन्द्रीय सदस्य कमानसिंह लामाले ठगी गरेको भन्दै नुवाकोटकी धनमाया तामाङले कारबाहीको माग गरेकी छिन् ।
मंगलबार पत्रकार सम्मेलन गर्दै तामाङले ठगीको रकम फिर्ता दिलाइदिन र दोषीलाई कारबाहीको माग गरेकी हुन् ।
‘मलाई बेलायत लैजान्छु भन्दै कमानसिंह लामाले नौ लाख ५२ हजार रूपैयाँ ठगी गरे,’ धनमायाले भनिन्, ‘मैंले न्याय पाउनुपर्छ र दोषीमाथि कारबाही हुनुपर्छ ।’ आफ्नो आर्थिक अवस्था कमजोर भएपनि विदेश गएर अवस्था सुधार्न सकिन्छ कि भनेर आफन्तसँग सरसापटक गरेर रकम जोहो गरेर लामालाई दिएको र ठगीमा परेर समस्यामा परेको बताइन् । आफूलाई दुई पटक गरी एक लाख मात्र फिर्ता गरेको भन्दै बाँकी रकम जतिसक्दो छिटो फिर्ता दिलाइदिन जिम्मेवार निकायसँग सहयोगको आग्रह समेत गरिन् । रकम फिर्ता गरिसकेको भन्ने नक्कली प्रमाण देखाएर हिँडेको भन्दै कमानसिंह लामालाई किर्ते हस्ताक्षर समेत गरेको बताइन् । लिएको रकम फिर्ता गर्न लामाले चेक दिएको तर चेक साट्न जाँदा बैंकमा रकम नभएर बाउन्स भएको बताइन् ।
आफूसँग रकम लिएर विदेश पठाउन नसकेको र रकम फिर्ता माग्दा अनेकन बहाना झिकेको उनको भनाई थियो । पटक पटक टेलिफोन सम्पर्क गरी रकम फिर्ता गर्न भन्दा मोबाइल समेत ब्लक गरिदिएको र भेट्न समेत नदिएको गुनासो गरिन् । पत्रकार सम्मेलनमा पूर्व मेयर कमानसिंह लामाविरुद्ध कडा रूपमा प्रस्तुत भएकी उनले चर्को आलोचना गरिन् । निकै खोजीपछि मात्र बल्ल भेट्न पाएको र पैसा फिर्ता दिन १५ दिनको म्याद राखेपछि चेक दिएको तर चेकमा रकम नभएको उनको भनाई थियो । तामाङले चेक बाउन्स भएको पीडा सुनाइन् । आफूलाई पटक पटक झुक्याएपछि ७ मंसिरमा मुद्दा दर्ता गरेको जानकारी गराइन् ।
आफू जस्तो कमजोर आर्थिक अवस्थाका मानिसबाट रकम ठगी गरेर कमानसिंह लामाले अपराध गरेको आरोप लगाइन् । आफूमाथि ठगी गरेको सबै तथ्य प्रमाणहरू सुरक्षित रहेको उनको भनाई थियो । कमानसिंह लामालाई आफ्नो अगाडि ठगी गरेको होइन भनी प्रमाणित गर्न चुनौती समेत दिइन् । तामाङले छिटो भन्दा छिटो आफूले न्याय पाउनु पर्छ भन्दै सरकार र सरोकारवालासित सहयोगको अपिल गरेकी छिन् । आफूले दुईपटक गरी एक लाख रूपैयाँ मात्र बुझेको स्वीकार्दै बाँकी रकम नपाएको प्रमाण समेत प्रस्तुत गरिन् ।
कार्यक्रममा किरण सिंहले धनमाया तामाङले छिटो भन्दा छिटो न्याय पाउनु पर्नेमा जोड दिए । यस्तै किसिमको ठगीमा विभिन्न मानिसहरू चपेटामा परेको भन्दै न्याय दिलाउन जिम्मेवारी निकायसँग आग्रह गरे । धनमायाको कीर्ते हस्ताक्षर लिएर चार लाख ५२ हजार तिरिसकेको लामाले बताउँदै हिंडेको भन्दै धनमायाले केवल ५०–५० हजार गरी दुई पटक मात्र रकम दिएको प्रमाण रहेको जानकारी समेत दिए । कीर्ते हस्ताक्षर गर्ने कार्यमा विदुर नगरपालिका तरुण दल इकाई सदस्य आशिष थापा संलग्न रहेको उनको भनाई थियो । आफूमाथि ज्यान मार्ने धम्की दिएको आरोप आएको भन्दै त्यसलाई प्रमाणित गर्न चुनौती दिए ।
