काठमाडौं– नेपाल कम्युनिष्ट पार्टी (नेकपा)का नेता तथा प्रवक्ता नारायणकाजी श्रेष्ठले ‘मिलेनियम च्यालेन्ज कर्पोरेसन’ (एमसीसी) सम्झौताबारे राष्ट्रिय हितलाई ध्यानमा राखेर निर्णय गरिने बताएका छन् । प्रेस संगठन नेपाल, उपत्यका प्रदेश समितिका पदाधिकारीसँग मंगलबार आफ्नो निवास हात्तीवनमा कुराकानी गर्दै उनले राष्ट्रको हितविपरित नेपालले कुनैपनि सम्झौतामा गर्न नहुने बताए ।
केन्द्रीय प्रचार विभाग प्रमुख श्रेष्ठले आफुले विभिन्न कार्यक्रममा एमसीसीको विषयमा व्यक्त गरेको धारणालाई बंग्याएर समाचार प्रकाशन गरेकोप्रति दुःख व्यक्त गर्दै उनले भने, ‘मैले पत्रकारलाई अनुरोध गर्छु कि, कुनैपनि विषयमा समाचार संप्रेषण गर्दा हचुवाको भरमा भन्दा गम्भीर हुनु आवश्यक छ ।
राष्ट्रिय सभाबाट निर्वाचित भएकोमा बधाइ दिन सपुगेका ंगठनका पदाधिकारीसँग उनले देशले क्रान्तिको नयाँ प्रयोग गरिरहेको समेत बताए । नेपालमा कम्युनिष्ट पार्टीको एकता र निर्वाचनबाट जनमत प्राप्तिसँगै शान्तिपूर्ण प्रतिस्पर्धा र उन्नत लोकतन्त्रको मार्गबाट नयाँ ढाँचाको वैज्ञानिक समाजवाद स्थापनाको लक्ष्यका साथ नेकपा अघि बढेको बताए ।
‘हाम्रो देशको क्रान्तिको नयाँ प्रयोगलाई विश्वसमुदायले हेरिरहेका छन्’ उनले भने, ‘त्यसैले हाम्रो पार्टीको ध्यान नयाँ प्रयोगलाई कसरी सफल बनाउने भन्ने रहेको छ ।’ साथै नयाँ मोडल स्थापना गरेको भन्दै उनले भने, ‘मोडललाई फुटेर होइन जुटेर सफल बनाउनु पार्टीको चुनौति रहेको छ ।’
कम्युनिष्ट र समाजवादी कित्ताले नेपालको क्रान्ति सफल भएमा त्यसको पाठ हुने दृष्टिले तथा पूँजीवादी र साम्राज्यवादी कित्ताले कम्युनिष्ट नेतृत्व स्थापित होला कि भन्ने शंकाको दृष्टिले हेरिरहेको उनको भनाइ थियो । समृद्धि र समाजवादको कार्यभार पूरा गर्न हाम्रो ध्यान केन्द्रित हुनुपर्ने र त्यसको लागि सबैको साथ आवश्यक रहेको उनले बताए ।
हामी हाम्रो आन्दोलनलाई सोभियत माडलमा हुबहु लागु गर्न सक्दैनौँ, हामीले २१औँ शताब्दीको समाजवाद खोजेका छौँ, त्यही अनुसार नयाँ मोडल प्रयोग गरिरहेका छौँ’ उनले भने ।
पार्टीमा गुट, उपगुट र व्यक्तिवाद नभई संस्थागत र पारदर्शिताका आधारमा निर्णय र कार्यान्वयन हुनुपर्नेमा जोड उनले दिए ।
