काठमाडौं - चालु आर्थिक वर्षको छ महिनाभित्र मुलुकमा पाँच खर्ब ८५ अर्ब आठ करोड रुपैयाँ रेमिट्यान्स (विप्रेषण) भित्रिएको छ । नेपाल राष्ट्र बैंकले सोमबार सार्वजनिक गरेको देशको वर्तमान आर्थिक तथा वित्तीय स्थिति प्रतिवेदनमा उक्त रकम बराबरको रेमिट्यान्स भित्रिएको उल्लेख गरिएको छ ।
राष्ट्र बैंकले गरेको समीक्षा अवधिमा गत आर्थिक वर्षको सोही समयको तुलनामा रेमिट्यान्स आप्रवाह २४.३ प्रतिशतले वृद्धि भई पाँच खर्ब ८५ अर्ब आठ करोड रुपैयाँ पुगेको छ । अघिल्लो वर्षको सोही अवधिमा विप्रेषण आप्रवाह ५.० प्रतिशतले घटेको थियो ।
त्यस्तै अमेरिकी डलरमा विप्रेषण आप्रवाह १३.९ प्रतिशतले वृद्धि भई चार अर्ब ५० करोड पुगेको उल्लेख गरिएको छ । अघिल्लो वर्ष यस्तो आप्रवाह ५.७ प्रतिशतले घटेको थियो ।चालु आवको पहिलो महिनादेखि नै रेमिट्यान्स भित्रिने क्रम निरन्तर वृद्धि हुँदै आएको छ ।
पहिलो महिना साउनमा ९२ अर्ब २१ करोड रुपैयाँ रेमिट्यान्स भित्रिएको थियो । भदौमा ९४ अर्ब ८३ करोड, असोजमा ९४ अर्ब एक करोड, कात्तिकमा ९६ अर्ब नौ करोड, मंसिरमा एक खर्ब २४ अर्ब ६० करोड र छैटौं महिना अर्थात् पुसमा एक खर्ब चार अर्ब ५८ करोड रुपैयाँ बराबरको रेमिट्यान्स भित्रिएको तथ्यांक छ ।
यो तथ्यांक वैदेशिक रोजगारीमा गएका तथा विदेशमा रहेका नेपालीले बैंकिङ च्यानलबाट पठाएका रकम हुन् । रेमिट्यान्स भित्रिने क्रम बढ्दा मुलुकको विदेशी मुद्रा सञ्चितिमा ठूलो टेवा पुगेको छ । राष्ट्र बैकका अनुसार समीक्षा अवधिमा विदेशी मुद्रा सञ्चितिसमेत बढेको हो ।
अघिल्लो आवमा रेमिट्यान्स घट्दा विदशी मुद्रा सञ्चितिमा दबाब परेको थियो ।समीक्षा अवधिमा वैदेशिक रोजगारीको लागि विदेशिने नेपालीको संख्यामा पनि उच्चदरमा वृद्धि भएको छ । यसै कारण पनि रेमिट्यान्स बढेको जानकारहरु बताउँछन् ।
यस अवधिमा वैदेशिक रोजगारीका लागि अन्तिम श्रम स्वीकृति (संस्थागत तथा व्यक्तिगत–नयाँ) लिने नेपालीको संख्या गत आवको सोही समयको तुलनामा ६४.६ प्रतिशतले बढेको छ । उक्त अवधिमा रोजगारीका लागि विदेशिनेको संख्या दुई लाख ७५ हजार ६४३ पुगेको वैदेशिक रोजगार विभागको तथ्यांक छ ।
त्यसैगरी, वैदेशिक रोजगारीका लागि पुनः श्रम स्वीकृति लिने नेपालीको संख्या समीक्षा अवधिमा ९.५ प्रतिशतले वृद्धि भई एक लाख ४२ हजार ५४८ जना पुगेको छ ।
