काठमाडौं– नेपालमा पछिल्ला वर्षहरूमा वृद्धि भइरहेको रेमिट्यान्सको वृद्धिदर घट्दै गएको देखिएको छ । नेपाल राष्ट्र बैंकले भर्खरै सार्वजनिक गरेको तथ्यांकअनुसार आर्थिक वर्ष ०६५÷६६ मा २ सय ९ अर्ब बाट क्रमशः बढ्दै ०७५÷७६ मा आइपुग्दा ८ सय ७९ अर्ब रूपैयाँ पुगेको रेमिटयान्सको स्थिति वृद्धिदरको आधारमा हेर्दा पछिल्ला वर्षमा घट्दै गएका देखिएको हो ।
तथ्यांकअनुसार आर्थिक वर्ष ०७०÷७१ मा २५ प्रतिशतले बढेको रेमिट्यान्स वृद्धिदर त्यसपछिका वर्षहरूमा क्रमशः घट्दै गई आर्थिक वर्ष ०७१÷७२ मा १३ दशमलव ६ प्रतिशत, आर्थिक वर्ष ०७२÷७३ मा ७ दशमलव ७ प्रतिशत, आर्थिक वर्ष ०७३÷७४ मा ४ दशमलव ६ प्रतिशत, आर्थिक वर्ष ०७४÷७५ मा ८ दशमलव ६ प्रतिशत र आर्थिक वर्ष ०७५÷७६ मा १६ दशमलव ५ प्रतिशतले बढेको देखिएको छ । जसमध्ये आर्थिक वर्ष ०७६÷७७ को पहिलो चार महिनामा रेमिट्यान्स अघिल्लो वर्षको सोही अवधिको तुलनामा २.३ प्रतिशतले कमी आई ३ सय ४ अर्ब ७ करोड कायम भएको राष्ट्र बैंकको तथ्यांकले जनाएको छ ।
आर्थिक वर्ष ०६५÷६६ मा कुल रेमिट्यान्स आप्रवाहको कुल गाह्र्रस्थ उत्पादनसँगको अनुपात २१ दशमलव २ प्रतिशत रहेकामा उक्त अनुपात क्रमशः बढ्दै आर्थिक वर्ष ०७२÷७३ मा २९ दशमलव ६ प्रतिशत पुगेको थियो । आर्थिक वर्ष ०७५÷७६ मा यो अनुपात २५ दशमलव ४ प्रतिशत रहेको राष्ट्र बैंकले जनाएको छ ।
त्यस्तै, आर्थिक वर्ष ०७६÷७७ को पहिलो चार महिनाको देशगत तयार पारिएको तथ्यांकअनुसार कुल रोजगारीमा जाने कामदारमध्ये ७५ दशलमव ३ प्रतिशत खाडी देशतर्फ गएका छन् भने खाडी देशबाट प्राप्त हुने रेमिट्यान्स कुल रेमिट्यान्सको झन्डै ५० दशमलव ३ प्रतिशत रहेको छ ।
त्यस्तै, खाडी मुलुकहरूमध्ये पनि नेपालमा सबैभन्दा धेरै कतारबाट ५३ अर्ब ९३ करोड रूपैयाँ रेमिट्यान्स भित्रिएको तथ्यांकले देखाएको छ । तथ्यांकअनुसार कतारपछि दोस्रोमा भारतबाट ४३ अर्ब १६ करोड, तेस्रोमा युएईबाट ४० अर्ब ८७ करोड, चौथोमा मलेसियाबाट २९ अर्ब ६६ करोड, पाँचौँमा अमेरिकाबाट २५ अर्ब ४२ करोड, छैटौँमा जापानबाट २२ अर्ब ८७ करोड, सातौँमा कुवेतबाट ११ अर्ब ५२ करोड, आठौँमा बहराइनबाट ८ अर्ब ७९ करोड, नवौँमा कोरियाबाट ६ अर्ब १५ करोड, दशौँमा बेलायतबाट ५ अर्ब ४ करोड, एघारौँमा अस्ट्रेलियाबाट १ अर्ब ३४ करोड र अन्यबाट १८ अर्ब ७ करोड रेमिट्यान्स भित्रिएको राष्ट्र बैंकको तथ्यांकले देखाएको छ । तर, आर्थिक वर्ष ०७५÷७६ मा नेपालीहरूको प्रमुख श्रम गन्तव्य मलेसियामा रूपमा कामदार लाने क्रम रोकिँदा मलेसियाबाट आउने रेमिट्यान्स कम भएको जानकारहरू बताउँछन् ।
