चितवन– सरकारले जनजातिलाई धोका दिएको नेपाली कांग्रेसका केन्द्रीय सदस्य एवं सांसद बहादुरसिंह लामाले बताएका छन् ।
आइतबार चितवनको राप्ती नगरपालिका–९ मा तामाङ समुदायले आयोजना गरेको सोनाम ल्होछार कार्यक्रमलाई सम्बोधन गर्दै सांसद लामाले कम्युनिस्टले पहिचानको आश्वासन दिएर आदिवासी जनजातिहरूबाट भोट बटुलेर जितेपछि कम्युनिस्ट सरकारले नै प्रदेशको नामांकन वागमती राखेर धोका दिएको बताए ।
यसरी नै सरकारले दुई वर्षभित्र समृद्धि ल्याउने नारा अघि सारे पनि विकासको नाममा सिन्का नभाँचेको उनले आरोप लगाएका छन् । कार्यक्रममा पूर्वराज्यमन्त्री सावित्री बोगटीले नेपाली समाजले सामाजिक सहअस्तित्व स्विकारेर अघि बढेकाले आफूले विगतमा यहाँका निर्मित गुम्बाको निर्माणार्थ लागिपरेको स्मरण गर्दै मन्त्रालयबाट सहयोग गराउन सक्ने आधारहरू तयार पारेको बताइन् ।
नेपाली कांग्रेसका महासमिति सदस्य भीमप्रसाद थपलियाले केहीवर्ष अगाडि नेपाली समाजको संस्कृति विथोल्न र रोकावट गर्न राजनीतिक चट्याङ आएपनि त्यसले बिथोल्न नसकेको बताएका छन् । कार्यक्रममा वडाध्यक्ष देवेन्द्र लामाले आफ्नो कार्यकालमा सबै समुदायको सांस्कृतिक पर्व विशेषलाई संरक्षण गर्दै लैजाने बताए । यसैगरी १२ नं. वडाका अध्यक्ष अर्जुन प्रजाले जात जातिको संस्कृतिले नै नेपाललाई सुन्दर बनाएको बताएका छन् ।
च्योमदेन देधाच्योम बौद्ध गुम्बाका अध्यक्ष कृष्णबहादुर तामाङको सभापतित्वमा सम्पन्न उक्त कार्यक्रममा सुवास मोक्तान, मेलिना राईले गीत गाएका थिए । यसैगरी आस्था कला केन्द्र मनहरीका कलाकारहरू स्वस्तिका नेगी, अस्मिता स्याङतान, मिना लामा, सन्ध्या लामा, निरुता थिङ, मैमा चेपाङ, निरज श्रेष्ठ, ईमान लामा, सुवास मोक्तान, रिता गोलेलगायतले नृत्य प्रस्तुत गरेका थिए । कार्यक्रमको संचालन स्मारिका थिङले गरेका थिए ।
कार्यक्रममा गाउँका जेष्ठनागरिक ९६ वर्षीया धम्बु तामाङ र ९१ वर्षीय कृष्णबहादुर तामाङलाई आयोजक कमिटिले अभिनन्दन गरेको थियो ।
-1752335779.jpg)
