धनगढी– सुदूरपश्चिम प्रदेशको आर्थिक विकास र समृद्ध प्रदेश बनाउनका लागी एकताको खाँचो रहेको सुदूरपश्चिम प्रदेशकी प्रदेश प्रमुख शर्मिला पन्त त्रिपाठीले बताएकी छन् ।
सुदूरपश्चिम प्रदेश सभाले मंगलबार प्रदेश सभा स्थापना दिवस मनाउने क्रममा प्रदेश प्रमुख पन्तले सो कुरा बताएकी हुन् । सुदूरपश्चिम प्रदेश सभा दुई वर्ष पूरा भई तेस्रो वर्षमा प्रवेश गरेको हो ।
त्यसैगरी कार्यक्रममा प्रमुख प्रतिपक्षी नेपाली कांग्रेस संसदीय दलका नेता डा.रणबहादुर रावलले सरकार आर्थिक भ्रष्टाचार, मन्त्रीहरूको व्यवहार, कानुन कार्यान्वयनको अवस्थालगायत विषयमा नेता चर्चा गरेका थिए ।
सुदूरपश्चिमका जनताले आर्थिक विकास सुशासन शान्ति चाहेकाले प्रदेशको विकासका लागि प्रतिपक्ष दलले सहयोग गर्ने उनले बताए ।
प्रदेश सरकारका मन्त्री केही काममा व्यस्त देखिए पनि केही मन्त्री औपचारिकमा मात्रै सिमित रहेकाले कामप्रति ध्यान दिन उनले आग्रह गरेका छन् ।
त्यसैगरी प्रदेश सरकारका आर्थिक मामिला तथा योजना मन्त्री झपटबहादुर बोहराले प्रदेश सरकारलाई दिएका सुझावलाई सहजै रूपमा ग्रहण गर्ने बताएका छन् । गत आर्थिक वर्षभन्दा चालु आर्थिक वर्ष प्रदेश सरकारले भौतिक प्रगति राम्रो भएको बताएका छन् ।
उनले प्रदेश सरकार सुधार उन्मुखतिर गइरहेको पनि बताए ।
कार्यक्रममा बोल्दै मन्त्री बोहराले तीन महिनाभित्र जडिबुटी प्रशोधन केन्द्रको स्थापना गरिने बताए । कृषिलाई आधुनीकरण गरेर कृषिमा आधारित कार्यक्रमका लागि बजेट सरकारसँग माग गर्ने बताएका छन् । स्रोत र साधन कम भएका कारणले गर्दा जनताका चाहना बढी भएकाले पूरा गर्न नसकेको पनि बताए ।
शिक्षा स्वास्थ्य खानेपानी पर्यटनलगायत प्रदेशका गौरवका पूर्वाधार विकास ठूला आयोजनाहरूको डिपिआर गर्नेतर्फ प्रदेश सरकार लागिरहेको पनि बताएका छन् ।
त्यसैगरी नागरिक समाजका अगुवा सुदूरपश्चिम विश्वविद्यालयका पूर्वरजिस्ट्रार डा. हेमराज पन्तले नेपाल संवैधानिक राजतन्त्र, पञ्चायत, राणाशासन अहिले संघीय गणतन्त्रमा मुलुक रहेकाले यो समय नेपालका लागि विकास गर्ने समय भएको बताएका छन् । उनले सुदूरपश्चिम प्रदेश हरेक इन्डिकेटबाट पछाडिको रहेको बताए । यो प्रदेशको मुख्य समस्या गरिबी भएकाले यसलाई हटाउन जनप्रतिनिधिले अभियान चलाउन आवश्यक रहेको बताएका छन् ।
त्यस्तै राजपाका प्रदेश सभा सदस्य कृष्ण चौधरीले प्रदेश सभाका सदस्यहरूले दुई वर्षभित्र गरेको कामको गहिरो समीक्षा गर्नुपर्ने बेला आएको बताएका छन् । उनले शान्ति विकास सुशासन ३२ वटा कानुन निर्माण गरेर मात्र नहुने भन्दै कानुन कार्यान्वयन गर्न प्रदेश सरकार कमजोर रहेको बताए । उनले कानुन बनाएर मात्र अर्थ नहुने भन्दै यसलाई कार्यान्वयन आवश्यक रहेको बताएका छन् । उनले सुदूरपश्चिमका जनतालाई विकासमा सबै एक जुट हुन आग्रह गरे ।
यस्तै गरी कार्यक्रममा बोल्दै नेकपाका संसदीय दलका प्रमुख सचेतक तारा लामा तामाङले देश विकासका लागि संघीयताले विकासका हुने जनताको विश्वास भएकाले जनताले विकासप्रति देखाएको ईच्छा पूरा गर्न प्रदेश सरकार तयार रहेको बताएका छन् । सुदूरपश्चिमलाई समृद्ध बनाउन र स्थानीय तहलाई अझै बलियो बनाउने कानुन निर्माण गर्नु आवश्यक रहेको उनले बताए । नेपाल भ्रमण वर्षलाई सफल बनाउन सबैको सहयोगको अपेक्षा रहेको पनि बताए । हालसम्म प्रदेश सभाले ३२ वटा कानुन निर्माण गरेको छ ।
