काठमाडौं– नेपाल निर्माण व्यवसायी महासंघले बढ्दो असुरक्षाका कारण निर्माण व्यवसायीले काम गर्ने वातावरण नभएको भन्दै गृहमन्त्री रामबहादुर थापाको ध्यानाकर्षण गराएको छ ।
महासंघका महासचिव रोशन दाहालको नेतृत्व प्रतिनिधिमण्डलले मंगलबार गृहमन्त्री थापासमक्ष दिनहुँजसो व्यवसायीका उपकरण जलाइएकोमा कडा आपत्ति जनाउँदै भरपर्दो सुरक्षाको माग गरे ।
गृहमन्त्री थापाले निर्माण व्यवसायीका उपकरणलाई सुरक्षाको पूर्ण प्रत्याभूति दिइने आश्वासन दिएको महासंघका प्रवक्ता टंकप्रसाद चौलागाईँले बताए । मन्त्री थापाले अज्ञात समूहका आपराधिक गतिविधि धेरै नियन्त्रणमा आइसकेको उल्लेख गर्दै त्यस्ता गतिविधिलाई अब पूर्ण नियन्त्रण गरिने प्रतिबद्धता जनाए । जलाइएका उपकरणको क्षतिपूर्ति दिन सरकारले नीति नै ल्याउन लागेको प्रवक्ता चौलागाईँले बताएका थिए ।
महासंघ प्रतिनिधिमण्डलले मंगलबार प्रतिनिधिसभा विकास समितिका सभापति कल्याणी खड्कालाई निर्माण व्यवसायीका उपकरणमाथिको सुरक्षा चिन्ताबारे अवगत गराएको छ । जवाफमा सभापति खड्काले विकास समितिको बैठकमा यस विषयमा छलफल गरिने जानकारी दिए ।
महासंघ प्रतिनिधिमण्डलमा मानार्थ सदस्य रहेका सांसद जिपछिरिङ लामा शेर्पा, पूर्वअध्यक्ष तथा सल्लाहकार रमेश शर्मा, कार्यसमिति सदस्य मंगल शाही, निर्माण व्यवसायीहरू कमल गौतम, सहदेव खड्का, कार्यालय प्रमुख प्रेमसिंह ऐरलगायत रहेका थिए । अज्ञात समूहले आइतबार मोरङको मिक्लाजुङ गाउँपालिकाअन्तर्गत आइतबारेमा तीन वटा एक्साभेटरमा आगजनी गर्दा रु तीन करोड ५० लाखभन्दा बढीको क्षति भएको महासंघले जनाएको छ । किसानचोक–रमिते–आइतबारे–टाँडी सडक खण्ड निर्माणमा प्रयोग भइरहेको शर्मा–भीमेश्वर जेभी कम्पनीको एक्साभेटरमा आगजनी गरिएको थियो ।
झापाको सेतुमारीमा आइतबार अज्ञात समूहले शर्मा एण्ड कम्पनीको स्वामित्वको एउटा एक्साभेटर र ब्याक्हो लोडरमा आगजनी गरेको महासंघले जनाएको छ । केही समयअघि बेनी नगरपालिका बगुवखोला नजिक निर्माण व्यवसायी संघ म्याग्दीका अध्यक्ष नारायण घर्ती क्षेत्रीको स्वामित्वका तीन एक्साभेटरमा आगजनी गरिएको थियो ।
-1745656903.jpeg)