धनगढी– बेल्जिमयकी राजकुमारी एस्ट्रिड र स्वास्थ्य तथा जनसंख्या मन्त्री भानुभक्त ढकालले संयुक्त रूपमा सोमबार लक्ष्मीनारायण उपचार प्रेषण तथा अनुसन्धान केन्द्रको भवन उद्घाटन गरेका छन् ।
सो समारोहमा स्वास्थ्य तथा जनसंख्या मन्त्री ढकालले सुदूरपश्चिम प्रदेशमा स्वास्थ्यमा देखिएका समस्यालाई सामाधान गर्न नेपाल सरकारले विषेश ध्यान दिएको बताएका छन् । अन्य प्रदेशभन्दा सुदूरपश्चिम प्रदेशमा स्वास्थ्य क्षेत्रमा धैरै समस्या भएकाले सरकारले ध्यान दिइरहेको पनि उनले बताए ।
स्वास्थ्य तथा जनसंख्या मन्त्री ढकालले यस प्रदेशमा स्वास्थ्य क्षेत्रको विकास गर्न संघीय सरकारले विषेश पहल गर्ने प्रतिबद्धता गरेका छन् । सुदूरपश्चिम प्रदेशमा कर्मचारी अभाव कायमै रहेकाले कर्मचारीको व्यवस्थापन छिट्टै गरिने मन्त्री ढकालले बताए । उनले यस प्रदेशमा चिकित्सकको अभावलाई सामाधान गर्न आफूले पहल गर्ने र चिकित्सकको अभाव परिपूर्ति नभए पनि जनताले देख्ने गरी स्वास्थ्य मन्त्रालयले काम गर्ने बताएका छन् ।
कैलाली जिल्लाको गोदावरी नगरपालिका–६ श्रीपुरमा रहेको प्रदेश स्तरीय लक्ष्मीनारायण उपचार प्रेषण तथा अनुसन्धान केन्द्रको कैलालीमा स्थापना भएको छ । अधिराजकुमारी अध्यक्ष रहेको अन्तर्राष्ट्रिय स्तरको दामिनी फाउन्डेसन नामक गैरसरकारी संस्थाको सहयोगमा निर्माण गरिएको अनुसन्धान केन्द्रमा जटिल प्रकारका क्षयरोगीका विरामीहरूको उपचार गरिने कार्यक्रममा जानकारी दिइएको छ । प्रदेश स्तरीय अनुसन्धान केन्द्र स्थापना भएपछि यस क्षेत्रका क्षयरोगीहरूलाई सजिलैसँग उपचार गर्न सजिलो हुने विश्वास यस क्षेत्रका जनताले लिएका छन् । निःशुल्क रूपमा उपचार हुने यस केन्द्रमा क्षयरोगका विरामीमा लाग्ने सबै खर्च दामिनी फाउन्डेसनले गर्ने छ । मानव संसाधन विकास प्रतिष्ठान र दामिनी फाउन्डेसनको सहयोगमा उक्त केन्द्रको स्थापना भएको हो ।
०५४ सालमा मानव संसाधन विकास प्रतिष्ठानले यस क्षेत्रलाई धनगढी इन्टरनेसल कलेजका रूपमा प्रस्तावित गरेको प्रतिष्ठानका सदस्य डा. टिएन जोशीले बताए । प्रदेश स्तरीय लक्ष्मीनारायण उपचार प्रेषण तथा अनुसन्धान केन्द्रको दुई तले भवन निर्माणमा यस प्रतिष्ठानले संकलन गरेको नगद ७१ लाख र श्रमदान दान गरी १ करोड ६५ लाख भवन निमार्णमा खर्च लागेको मानव संसाधन विकास प्रतिष्ठानका कोषाध्यक्ष दीर्घराज भट्टले बताए ।
अनुसन्धान केन्द्रमका लागि लक्ष्मीनारायण मन्दिरले तीन बिगाह जमिन र भोजराज भण्डारीले १ बिगाह जग्गा यस अनुसन्धान केन्द्रलाई दान गरेको प्रतिष्ठानका कोषाध्यक्ष भट्टले बताए ।
