काठमाडौं– ल्होछारलाई अन्तर्राष्ट्रिय रूपमा चिनाउँदै लैजानुपर्ने समयमा वर्तमान सरकारले संकुचित पारेर बिदा नै कटौती गरेकोमा पूर्वगृहमन्त्री बुद्धिमान तामाङले आपत्ति जनाएका छन् ।
नेपाल तामाङ समाज (नेतास) द्वारा राजधानीमा आयोजित शुभकामना आदानप्रदान तथा सांस्कृतिक कार्यक्रममा प्रमुख अतिथि पूर्वगृहमन्त्री तामाङले नेपाल तामाङ घेदुङको प्रस्ताव बोकेर ल्होछारको सार्वजनिक बिदाको माग गर्न ०५१ सालमा तत्कालीन सांसदहरू भीमबहादुर तामाङ, मणि लामा, हर्कमान लामा र आफू गएर तत्कालीन प्रधानमन्त्री मनमोहन अधिकारी समक्ष प्रस्तुत भएको बताए । उनले सोहीबेलादेखि राज्यले ऐच्छिक बिदाको रूपमा स्वीकार गरेको बताए ।
यसैगरी पूर्वन्याय तथा कानुन संसदीय व्यवस्था राज्यमन्त्री दिलमान पाख्रिनले संविधानले दिएको समावेशीतालाई लत्याउँदै नेवा ताम्सालिङ वागमतीमा जबर्जस्त सेलाएकामा आपत्ति जनाएका छन् । उनले राष्ट्रिय रूपमा स्थापित ल्होछारलाई कटौती गरेर निरंकुशता लाद्ने सरकारको कदमविरुद्ध सबै एक भएर लाग्न आह्वान गरे ।
पूर्वपर्यटन तथा संस्कृति राज्यमन्त्री परशुराम तामाङले सामाजिक तथा सांस्कृतिक सद्भाव कायम गर्ने ल्होछारलाई सिध्याएर सरकारले सम्बन्धित समुदायको अपमान गरेको बताएका छन् । आयोजकलाई सुझाउँदै समाजले बेलाबेलामा समुदाय जागरण गर्नुपर्ने बताए ।
समाजवादी पार्टी केन्द्रीय सदस्य डा. भीमलाल तामाङले सबैले बौद्धिकता विकास गर्नुपर्ने बताएका छन् । उनले थपे, ‘तामाङहरू बौद्धिक भएपछि सिंगो समुदाय स्वतस्फूर्त जागृत हुनेछ अनि समाज विकास भएर राज्यको हरेक अंगमा सहभागिता बढ्नेछ ।’
नेपाल तामाङ घेदुङ(नेताघे)का केन्द्रीय महासचिव बाबु घिसिङले राज्यको पछिल्लो हेपाहा प्रवृत्तिले हाम्रो पहिचान गुमेको बताएका छन् । उनले घेदुङले विगतदेखि नै सामाजिक तथा सांस्कृतिक जागरण गर्दै आइरहेको थियो । अझै यसलाई सशक्त पार्दै प्रशिक्षणात्मक जागरण व्यापक गरिने खुलासा गरे ।
यसैगरी नेताघे शाखा नुवाकोटका अध्यक्ष जयमान वाइबाले वागमती नामांकनले प्रदेशका बासिन्दाहरूको पहिचानको लालपूर्जा खोसेर निरंकुशता लादिएको बताएका छन् । उनले थपे, ‘सांस्कृतिक पहिचान मेटाउने राज्यको निरंकुशताविरुद्ध सधैँ लडिरहने प्रतिबद्धता गर्दछु ।’
यसैगरी नायिका रञ्जिता ब्लोनले समुदाय लक्षित गीत र चलचित्रमार्फत सांस्कृतिक पहिचानको सशक्त भूमिका निभाउने प्रतिबद्धता व्यक्त गरिन् ।
समारोहमा समाजका अध्यक्ष पेमा तामाङले अरु संस्थाको विरुद्ध गठित संस्था भन्ने आरोप लगाउनेलाई जवाफ दिँदै समाजप्रति उत्तरदायी व्यक्तिहरू मिलेर नेतृत्व क्षमता अभिवृद्धिसँगै समाजप्रति केही गरौँ भन्ने उद्देश्यले ०७४ मा नेपाल तामाङ समाज गठन भएको बताइन् ।
कार्यक्रममा सागका कराते खेलाडी सोनाम लामा, शिक्षा क्षेत्रमा डा. भीमलाल तामाङ र स्वास्थ्य क्षेत्रका डा. दिलबहादुर तामाङलाई समुदायको योगदान गरेबापत सम्मान गरेका थिए ।
स्वयत्ना योन्जनद्वारा सञ्चालित कार्यक्रममा कलाकारहरू सुवास मोक्तान, रोशन ङ्खयुबा, बिना घले, सुम्निमा तामाङलगायतले माहोल तताएका थिए ।
