काठमाडौं– नेपाल समाजवादी कांग्रेस पार्टीले सरकारलाई राष्ट्रिय पोसाक (दौरा, सुरुवाल, साडी र चौबन्दी) उपहार पठाएको छ । सोमबार पार्टीको केन्द्रीय कार्यालय अनामनगरमा पत्रकार सम्मेलनको आयोजना गरेर राष्ट्रिय अस्तित्वलाई प्रतिष्ठित बनाउनका लागि सम्पूर्ण राष्ट्रसेवकहरूले नेपालको औपचारिक पोसाक दौरा, सुरुवाल, टोपी, तथा गुन्यू, चोलो लगाउन जाँगर चलाउन अभियान नै चलाउन दबाब दिने हेतुले सो पार्टीले राष्ट्रिय पोसाक उपहार पठाएको हो ।
राष्ट्रिय अस्तित्वलाई प्रतिष्ठायुक्त बनाउनका लागि सबै राष्ट्रसेवक कर्मचारीले नेपालको औपचारिक पोसाक लगाउन जाँगर चलाऊन् भनेर पार्टीले चाहेको तर यस मागलाई सुनुवाइ नगरिएको भन्दै प्रधानमन्त्रीबाट नै यसको थालनी हुनुपर्ने भन्दै राष्ट्रिय पोसाकको नमुना उपहार पठाउन बाध्य भएको पार्टीका अध्यक्ष गोविन्द निरौलाले पत्रकार सम्मेलनमा बताएका छन् ।
गृह मन्त्रालयमार्फत प्रधानमन्त्रीको कार्यालयलाई पठाएको पत्रमा संघीयता र धर्मनिरपेक्षले उत्पन्न गरेको विकृतिको कारण देश विघटनको अवस्थामा पुगेको समय नेपाली जनता चिन्तित रहनु राष्ट्रप्रतिको जिम्मेवारी बोध हुनुपर्ने पनि उल्लेख गरिएको छ । पत्रमा राज्यमा देखिएका हत्या, अपहरण, बलात्कारजस्ता घटनाबाट सरकार अनविज्ञ नरहे पनि सरकारले हेलचक्र्याइँ गरिरहेको पनि जनाइएको छ ।
मुलुकमा जारी अन्याय, अत्याचार, भ्रष्टाचार, महँगी, तस्करी, कालोबजारीजस्ता जघन्य अपराधहरू भइरहे पनि सरकारले वास्ता नगर्नु लोकतन्त्रको उपहास भएको भन्दै सो पार्टीले विरोध जनाएको छ । त्यस्तै सिंगो मुलुक फोडेर संघीय बाटोमा राज्यलाई ढालेको, राज्यमा जातीय र क्षेत्रीय मुद्दाहरू मुखारित भएको, धर्मनिरपेक्षताको घोषणाबाट देशमा भएको संस्कृतिलाई ध्वस्त पार्ने काम भएको र यसबाट समाजका साथै घर परिवारलाई विभाजन गर्ने काम भएको भन्दै सो पार्टीले यसको घोर विरोध गरेको छ ।
त्यस्तै, भर्खरै छिमेकी मुलुक भारतले कालापानी, लिपियाधुरा, लिपुलेक क्षेत्रको विषयमा जुन हर्कत देखाएको छ, यसलाई सामान्य मान्ने अवस्था नरहेको भन्दै भारतलाई आफ्नो मुलुक फिर्ता जान अध्यक्ष निरौलाले आग्रह गरेका छन् । भारतले नेपालको भूमि मिच्ने र कब्जा गर्ने कुचेष्टा गर्याे भने यसको प्रतिफल उसले चुकाउनुपर्ने पनि उनले बताए । यसका लागि नेपाल समाजवादी कांग्रेसले नेतृत्व गर्ने भन्दै भारतको मिचाहा प्रवृत्तिलाई उनले कडा रूपमा आलोचना गरे ।सो पार्टीले सरकारलाई हरेक क्षेत्रमा खबरदारी गर्ने काम गर्दै आएको छ । मुलुकमा विद्यमान समस्या र यसबारे सरकारले लिनुपर्ने नीति तथा परिस्थिति नियन्त्रणका लागि पार्टीले राज्यलाई बेलाबेलामा ज्ञापनपत्र, विरोध पत्र, स्मरण पत्र दिँदै आएको छ । गत २५ माघ ०७५ मा मुलुकमा जारी परिस्थिति नियन्त्रणको निम्ति ज्ञापन पत्र बुझाएको थियो । त्यस्तै, गत ३ माघमा देशका अस्तित्व संरक्षणका निम्ति भाषा, धर्म, संस्कृति, धरोहरको संरक्षण हुनुपर्ने मागसहित स्मरण पत्र सरकारलाई बुझाएको थियो ।
