परासी – मुख्यमन्त्री शंकर पोखरेलले नेपाली समाजलाई लाहुरे संस्कृतिले गाँजेका कारण युवा विदेश पलायन हुने गरेको बताएका छन् ।
पश्चिम नवलपरासीको बर्दघाटमा नेपाल स्काउटको प्रदेश नं ५ स्तरीय आधारभूत तालीमको शनिबार उद्घाटन गर्दै मुख्यमन्त्री पोखरेलले यस्तो बताएका हुन् । उनले युवालाई पलायनबाट रोक्न स्वदेशमा उद्यमशील बन्नुपर्ने उनको भनाई छ । उनले अहिले हाम्रोे देशको पहिचान नै युवा निर्यात गर्ने देशका रूपमा रहेकोले यसलाई परिवर्तन गर्न जरुरी रहेको बताए । उनले राष्ट्रलाई सबल बनाउन पनि स्वदेशमा उद्यमशील बन्नुपर्ने तर्क राखे ।
मुख्यमन्त्री पोखरेलले भने, ‘समृद्ध राष्ट्र निर्माणका लागि स्वदेशमा उद्यमशील बन्नुपर्छ ।’ उनले राज्य हाम्रो हो र राज्यलाई बलियो बनाएर मात्र हामी बलियो भइन्छ भन्ने भावनाको विकास अझ सम्मपनि नभएकोले यस्तो भावना हरेक व्यक्तिमा ल्याउन जरुरी भईसकेको बताए । उनले समाजमा अब विद्रोह गर्ने भन्दा पनि एकतामा भावना जरुरी भएको उनको भनाई छ ।
उनले समाजमा अहिले पनि आफुलाई राज्यको विद्रोहीका रूपमा हेर्ने गरेको बताए । उनले समाज बलियो भए यस्ता भावनाहरू विस्तारै परिवर्तन हुँदै जानेसमेत बताए । उनले संविधानले दिएका अधिकार प्रयोग आएर सबल र सक्षम राज्य भएपछि नागरिकले पनि गौरवबोध गर्ने बताए ।
मुख्यमन्त्री पोखरेलले स्काउटको यस किसिमको तालीमले सुचरित्र र असल नागरिक तथा समाज निर्माणमा सहयोग पु¥याउने विश्वास व्यक्त गर्दै समाजमा देखिएको निराशा र कुण्ठालाई सकारात्मक र आशावादी समाजको रूपमा विकास गर्न युवाको भूमिका महत्वपूर्ण हुने बताए ।
पाँच दिनसम्म सञ्चालन हुने आधारभूत तालीममा प्रदेश नं ५ का १२ जिल्लाका १०९ वटै स्थानीय तहका गरी ६०३ प्रशिक्षार्थी तथा ११० प्रशिक्षकको सहभागिता रहने छ ।
प्रदेश सरकारका प्रवक्ता एवं भौतिक पूर्वाधार विकासमन्त्री बैजनाथ चौधरीले विपद्का बेला यूवा परिचालन महत्वपूर्ण हुने बताए । उनले युवाले नै विपद् व्यवस्थापन गर्न तथा समृद्धि ल्याउन लागीपर्नुपर्ने बताए ।
युवा तथा खेलकूद विकास मन्त्रालयका सचिव रामप्रसाद थपलियाले सरकारले यस वर्षलाई युवा परिचालनको वर्ष घोषणा गरेकाले स्काउट अभियानलाई गाउँगाउँसम्म पु¥याउनुपर्ने बताए । स्काउटका युवाले परिवर्तमा महत्वपूर्ण भूमिका खेल्नुपर्ने उनको तर्क थियो ।
सो अवसरमा नेपाल स्काउटका राष्ट्रिय निर्देशक लोकबहादुर भण्डारी, नेपाल कम्युनिष्ट पार्टी(नेकपा) प्रदेश नं ५ का प्रमुख सचेतक भूमिश्वर ढकाल, प्रतिपक्ष दल नेपाली कांग्रेसकी सचेतक निर्मला क्षेत्री, प्रदेशसभा सदस्य दीपेन्द्र अधिकारी, बुटवल उपमहानगरपालिकाका प्रमुख शिवराज सुवेदी, बर्दघाट नगरपालिकाका प्रमुख धीरज शर्मा बस्यालले स्काउटको बारेमा आ–आफ्नो विचार राखेका थिए ।
