काठमाडौं– समाजसेवी तथा सामाजिक अभियन्ता विनयजंग बस्नेतले यही माघ ४ गते सांसदहरूको ध्यानाकार्षण गराउनेगरि नयाँ बानेश्वरस्थित् संसद भवन अगाडि चार नवजात शिशुसहित १९ वटा बेवारिसे लाश केही मिनेट प्रदर्शन गर्ने घोषणा गरेका छन् ।
बिहीबार पत्रकार सम्मेलन गर्दै उनले यस्तो घोषणा गरेका हुन् । विगत ६ वर्षदेखि बेवारिशे लाशहरूको व्यवस्थापन गर्दै आएका समाजसेवी बस्नेतले आजको दिनसम्म २ सय २७ बेवारिशे शवहरूको आफ्नै हातबाट दागबत्तिसहित अन्त्येष्टि गरिसकेका छन् । बेवारिशे लाशप्रति राज्यले अहिलेसम्म खासै ध्यान नदिएकोमा उनले गुनासो पोख्दै आएका छन् । बस्नेतले भने,‘बास्तवमा राज्यले बेवारिशे लाशहरूप्रति अपहेलना गर्दै आएको छ ।’
यसपटक भने बेवारिशे लाशबारे जनताप्रति उत्तरदायी संघीय संसदको नै ध्यानाकार्षण गराउनेगरि आफुले यही माघ ४ गते ललितपुरबाट मलामीसहित शवयात्रा गराउने र संघीय संसद भवन अगाडि नयाँ बानेश्वरमा केही मिनेट बेवारिशे शवहरूको प्रदर्शन–सभासमेत आयोजना गर्न लागिएको बस्नेतले जानकारी दिए ।
उनले भने,‘यो देशका उच्च पदस्थ व्यक्तिहरू मन्त्री तथा सांसदहरूले मृत्यु यस्तोपनि हुँदो रहेछ भनेर थाहा पाउन भनेर मैले यस्तो कदम चाल्न लागेको हुँ । मेरो उद्देश्य नै उहाँहरूको ध्यानाकार्षण
गराउनु हो ।’
बस्नेतका अनुसार संसद भवनअगाडिको केही मिनेटको बेवारिशे शव प्रदर्शनपछि बानेश्वर, कोटेश्वर, तिनकुने, सिनामंगल हुँदै गौशलास्थित् पशुपति आर्यघाटमा पुर्याई सामूहिक दाहसंस्कार गरिने कार्यक्रम छ । उक्त दाहसंस्कार कार्यक्रममा नेपाली सेनाको एक टुकडीले सलामीसमेत अर्पण गर्ने कार्यक्रम राखिएको बस्नेतले जानकारी दिए ।
उक्त दाहसंस्कार कार्यक्रममा नेपालकै चर्चित व्यक्तित्वहरूको समेत मलामीको रूपमा सहभागिता र उपस्थिति रहने कार्यक्रम रहेको उनले बताए । सामूहिक दाहसंस्कारको लागि बेवारिशे लाशहरूको शव यात्रा माघ ४ गते ललितपुरबाट विहान १० बजे सुरु भएर दिउँसो २ बजे पशुपति आर्यघाटमा पुर्याईने कार्यक्रम तय भएको पनि बस्नेतले जनाए ।
