काठमाडौं– गृहमन्त्री रामबहादुर थापाले नागरिक सचेतना र विपद् व्यवस्थापन कानूनी प्रबन्धबाट क्षति कम गराउन सकिने बताएका छन् । विसं १९९० माघ २ गतेको महाभूकम्पमा परी ज्यान गुमाएकाहरूको स्मृतिमा कार्यक्रममा बोल्दै उनले यस्तो बताएका हुन् ।
२२औँ भूकम्प सुरक्षा दिवसको अवसरमा बुधबार कामपाले राजधानीमा आयोजना गरेको स्मृतिसभामा गृहमन्त्री थापाले भने, ‘कहिलेकाहीँ अप्रत्याशित जोखिम व्यहोर्नुपर्ने अवस्थाबाट बाँच्न र बचाउने उपाय भनेकै सुरक्षित भवन र यसप्रतिको साझा प्रतिबद्धता हो ।’ उनले ०७२ सालको भूकम्पबाट क्षति भएको भौतिक संरचनाको पुनर्निर्माणलाई प्राथमिकता दिएको बताए ।
कार्यक्रममा महानगर प्रमुख विद्यासुन्दर शाक्यले विपत्बाट हुने क्षति कम गर्न र सचेतना बढाउन महानगरले वडास्तरीय विपद् क्षति व्यवस्थापन तथा नागरिक सुरक्षा समिति गठन गरेको जानकारी दिएका थिए ।
उनले कार्यक्रममा बोल्दै भवन निर्माण संहिताको कार्यान्वयनलाई कडाइ गरेको समेत बताए । साथै, कामपाभित्र निर्माण हुने सरकारी वा निजी जुनसुकै प्रकारका भवन पनि नक्सा स्वीकृत नगराई निर्माण गर्न गराउन नपाउने व्यवस्थालाई कडाइ गरिएको उनको भनाइ छ ।
कामपा विपद् व्यवस्थापन समितिका संयोजक नीलकाजी शाक्यले वडातहमा गठन गरिएका विपद् व्यवस्थापन तथा नागरिक सुरक्षा समितिमार्फत नागरिकलाई सुरक्षित महसुस गराउने कामले तीव्रता पाइरहेको बताए ।
१९९० माघ २ मा विनाशकारी भूकम्पले पु¥याएको क्षति सम्झना गर्दै अबका पुस्ताले यस प्रकारको क्षति व्यहोर्नु नपरोस् भनेर सजग गराइराख्न भूकम्प दिवस मनाउने गरिएको हो । विनाशकारी भूकम्पले सिकाएको पाठबाट सुरक्षित बस्ती निर्माणमा पुस्तालाई सहभागी गराउने उद्देश्य राखेर २०५५ सालदेखि हरेक वर्ष २ माघमा भूकम्प सुरक्षा दिवस मनाइँदै आएको छ ।
