सर्लाही– नेपाल कम्युनिष्ट पार्टी (नेकपा)का वरिष्ठ नेता तथा पूर्वप्रधानमन्त्री माधवकुमार नेपालले नेकपा र राजपाको संयुक्त गठबन्धनबाट उठेका उम्मेदवारलाई मतदान गरी जिताएर सामाजिक, सांस्कृतिक तथा आर्थिकरूपमा परिवर्तन ल्याउन सहयोग गर्न आग्रह गरेका छन् ।
सर्लाहीको हरिवन नगरपालिका–५ मा रहेको चेतना सन्देश नेपालद्वारा सञ्चालित द्वन्द्वपीडित बालगृहमा मंगलबारदेखि शुरु भएको चौतारी साँझ कार्यक्रममा जेवी टुहुरेको ‘निरन्तरता भाग चार’ कार्यक्रममा नेता नेपालले यस्तो आग्रह गरेका हुन् । देशभक्तिको भावनासहित नेपाल कम्युनिष्ट पार्टी (नेकपा) र राजपाको संयुक्त गठबन्धनबाट खडा भएका चार उम्मेदवारलाई आङ्खना मतदाताले दायाँबायाँ नगरी मतदान गर्न उनले आग्रह गरेका हुन् ।
पूर्वप्रधानमन्त्री नेपालले सामाजिक, सांस्कृतिक तथा आर्थिक परिवर्तनमा गीतसङ्गीतको ठूलो महत्व रहेको र टुहुरेले पञ्चायतीकालदेखि नै सामाजिक, सांस्कृतिक तथा आर्थिक परिवर्तन ल्याउन गीतसङ्गीतको यात्रामा लागेको बताए । उनले पञ्चायतीकाल विरुद्ध राजनीतिक सिद्धान्तलाई सार्थक बनाउन गीतसङ्गीतका रूपमा परिमार्जन गरी नेपाली राजनीतिमा परिवर्तन ल्याउन अरु टुहुरे जन्मिनु आवश्यकता रहेको बताए ।
यही माघ ९ मा हुने राष्ट्रियसभाको निर्वाचनमा प्रदेश नं २ बाट नेपाल कम्युनिष्ट पार्टी (नेकपा) बाट राधेश्याम पासवान र तुलसा दाहाल साथै राजपाबाट मृगेन्द्रकुमार सिंह यादव र शेखरकुमार सिंह गरी नेपाल कम्युनिष्ट पार्टी (नेकपा) र राजपाको संयुक्त गठबन्धनबाट चार जना चुनावी मैदानमा रहेका छन् ।
श्रम रोजगार तथा सामाजिक सुरक्षामन्त्री रामेश्वर राय यादवले उखु किसानहरूको उखुको बाँकी बक्यौता नपाएको गुनासो गरेपछि उनले जनताको विश्वास इमान्दारीसाथ पूरा गर्ने प्रतिबद्धता जनाए ।
जेवी टुहुरे फाउण्डेशनको आयोजनामा भएको कार्यक्रममा प्रदेशसभा सदस्य बेची लुङ्गेली, डिल्लीप्रसाद उप्रेती, राष्ट्रियसभाका उम्मेदवार तुलसा दाहाल, राधेश्याम पासवान, सर्लाहीका प्रमुख जिल्ला अधिकारी मोहनराज जिसी, सबै नगरपालिका तथा गाउँपालिकाका प्रमुख तथा उपप्रमुखका साथै पार्टीका विभिन्न तह र तप्काका नेता तथा कार्यकर्ताको सहभागिता थियो ।
