काठमाडौं - सरकारले वैदेशिक रोजगार व्यवसाय सञ्चालनसम्बन्धी इजाजतपत्र प्राप्त म्यानपावर कम्पनीलाई देशभित्र शाखा कार्यालय सञ्चालन गर्न अनुमति दिएको छ । श्रम, रोजगार तथा सामाजिक सुरक्षा मन्त्रालयअन्तर्गतको वैदेशिक रोजगार विभागले आइतबार एक सूचना जारी गरी इजाजतपत्र प्राप्त म्यानपावर कम्पनीहरुलाई देशभित्र शाखा कार्यालय सञ्चालन गर्न अनुमति दिने जानकारी दिएको हो ।
सूचनामा जनाइए अनुसार कुनै पनि म्यानपावर कम्पनीले स्वदेशमा शाखा कार्यालय खोल्न चाहेमा वैदेशिक रोजगार ऐन, २०६४ को दफा ७४(२) तथा नियमावली २०६४ को नियम ४७ (२) बमोजिम विभागमा निवेदन दिन सकिनेछ । यसका लागि वैदेशिक रोजगार व्यवसाय सञ्चालन गर्न इजाजतपत्र प्राप्त संस्थाले स्वदेशमा शाखा कार्यालय सञ्चालनसम्बन्धी कार्यविधि, २०७९ को प्रक्रिया पूरा गरी निवेदन पेस गर्न विभागले आग्रह गरेको छ ।
शाखा कार्यालय सञ्चालनका लागि म्यानपावर कम्पनीले वैदेशिक रोजगार व्यवसाय गर्ने इजाजतपत्र लिएको कम्तीमा एक वर्ष पूरा भएको हुनुपर्ने विभागले जनाएको छ । यसैगरी एउटा इजाजतपत्र प्राप्त म्यानपावर कम्पनीले बढीमा छ वटासम्म शाखा कार्यालय खोल्न पाउने छन् ।
तर, विभागले एक प्रदेशमा एकभन्दा बढी शाखा खोल्न नपाइने उल्लेख गरेको छ । विभागले तोकेको मापदण्डअनुसार वार्षिकरुपमा तीन हजार जना कामदार पठाउने म्यानपावरले तीन वटासम्म, पा“च हजार जना पठाउने कम्पनीले पाँच वटासम्म र पाँच हजारभन्दा बढी कामदार पठाउने कम्पनीले बढीमा छ वटासम्म शाखा कार्यालय खोल्न अनुमति पाउने छन् । प्रस्तावित शाखा कार्यालयको भौतिक पूर्वाधार निरीक्षण तथा प्रतिवेदन विभागबाट तोकिएपछि मात्र गर्नुपर्ने उल्लेख गरिएको छ ।
उल्लिखित मापदण्डबाहेक म्यानपावर कम्पनीले शाखा खोल्ने सम्बन्धमा १५ थरी कागजात पेस गर्नुपर्नेछ । जसमा शाखा कार्यालय खोल्ने निवेदन, सञ्चालक समितिको निर्णय रहेको माइन्युट, यसअघि शाखा कार्यालय भए/नभएको जानकारीपत्र, संस्था सञ्चालन गर्ने इजाजतपत्रको प्रतिलिपि रहेको छ ।
त्यस्तै कम्पनी दर्ता, सेयर लगत, कम्पनी अद्यावधिक, आयकर दर्ता प्रमाणपत्रको प्रतिलिपि, गत आर्थिक वर्षको कर चुक्ता प्रमाणपत्रको प्रतिलिपि, संस्थाले इजाजतपत्र लिएबापत नगद धरौठी तथा बैंक ग्यारेण्टी गरेको प्रमाणको प्रतिलिपि, शाखा प्रमुखको नागरिकता, शैक्षिक योग्यताको प्रमाणपत्रको प्रतिलिपिका साथै शाखा प्रमुखको चालचलनसम्बन्धी प्रतिवेदन अनिवार्य पेस गर्नुपर्ने विभागले जनाएको छ ।
यतिमात्र नभइ विभागले शाखा कार्यालयमा काम गर्ने कर्मचारीका नागरिकताको प्रतिलिपि, सम्बन्धित श्रम तथा रोजगार कार्यालयको निरीक्षण प्रतिवेदन, कार्यालय रहने घरबहाल सम्झौता, शाखाको कार्ययोजना तथा भौतिक पूर्वाधार र जनशक्तिको विवरण, अख्तियार प्राप्त कर्मचारी/कानुन व्यवसायीको परिचयपत्र र अख्तियारीनामासहित शाखा कार्यालय सञ्चालनबापत पा“च लाख रुपैयाँ धरौटी राखेको प्रमाण पेस गर्नुपर्ने अनिवार्य सर्त राखेको छ ।
उल्लिखित प्रक्रिया र कागजातहरुको प्रतिलिपि सम्बन्धित संस्थाको प्रमुखले प्रमाणित गरी विभागमा पेस गरेपश्चात् शाखा कार्यालय सञ्चालनको अनुमति पाइने विभागका शाखा अधिकृत प्रदीपकुमार ढकालले जानकारी दिए ।
यसअघि म्यानपवारलाई शाखा कार्यालय खोल्न अनुमति दिइए पनि केही वर्षदेखि ठगी तथा नियमनमा समस्या भएको भन्दै विभागले शाखा खोल्न बन्देज गरेको थियो । तत्पश्चात् वैदेशिक रोजगार व्यवसायीहरुले म्यानपावर कम्पनीहरुलाई शाखा कार्यालय खोल्न दिनुपर्ने माग गर्दै आइरहेका थिए । विभागका अनुसार यसअघि २७ वटा म्यानपावरले शाखा कार्यालय खोल्न अनुमति पाएका छन् ।
प्रकाशित मिति: सोमबार, असोज ३, २०७९ ०८:५०
-1745656903.jpeg)