काठमाडौं–सरकारले ल्याएको सामाजिक सुरक्षा योजनामा निजी व्यावसायिक प्रतिष्ठानहरूबाट विरोध आइरहेको सन्दर्भमा सञ्चारकेन्द्र नेपालले ‘सामाजिक सुरक्षा कोष – भ्रम र वास्तविकता’ विषयक अन्तरक्रिया कार्यक्रम सम्पन्न गरेको छ ।
कार्यक्रममा राष्ट्रियसभाका सदस्य राम नारायण विडारीले सामाजिक सुरक्षा ऐन संविधानको पालना भएको भएपनि केही व्यक्तिहरूले यसलाई असफल पार्न प्रयत्नशील रहेको बताए ।
सामाजिक सुरक्षासम्बन्धी करको विषयमा, धेरै तलब खाने कर्मचारीहरूको बीचमा केही अप्ठ्याराहरू रहेका भएपनि सामाजिक सुरक्षा योजना आकर्षक योजना भएको उनले बताए । पछिल्लो समय विभिन्न सरकारी स्वामित्वका कार्यालय र बैंक तथा वित्तिय क्षेत्रका अधिकारीहरूले आफूखुसी नियम बनाएर मनोमानी रकम लिँदै आएकाहरूलाई मात्र अप्ठ्यारो पर्ने भएकाले सामाजिक सुरक्षा योजनामा नजान अस्थायी र ज्यालादारी कर्मचारीहरूलाई उछालेको आरोप उनले लगाए । तर उनले अस्थायी र ज्यालादारी कर्मचारीहरू समेत सामाजिक सुरक्षा योजनाको हकदार भईरहने कानुनमै स्पष्ट भएको दाबी गरे ।
देशमा नयाँ स्किम आउँदा विरोध हुने भन्दै उनले भ्याट लागू हुने बेलामा समेत केही अवैध काम गर्ने उद्योगी, व्यापारीहरूले अफवाह फैल्याएका थिए भ्याटका विषयमा जस्तै केही व्यक्तिले अन्योलता फैल्याउने कोसिस गरिरहेको भएपनि सामाजिक सुरक्षा योजनासम्बन्धी योजना सामान्य मान्छेहरूका लागि ठीक भएको जिकिर गरे ।
कार्यक्रममा सामाजिक सुरक्षा कोषका कार्यकारी निर्देशक कपिलमणि ज्ञवालीले पछिल्लो समय बजारमा सामाजिक सुरक्षासम्बन्धी हल्लाहरू फैल्याइएकोमा आपत्ति जनाउँदै यथार्थतमा गएर आफूहरूको आलोचना गर्न सुझाव दिए ।
उनले विश्वका शक्ति राष्ट्रहरू अमेरिका युरोपहरूमा रहेका नेपालीलेसमेत सामाजिक सुरक्षाको फाइदाहरू लिइरहेको जनाउँदै अन्तराष्ट्रिय सामाजिक सुरक्षाको अवधारणा अनुसार नेपालमा पनि सामाजिक सुरक्षा कार्यक्रमलाई अघि बढाइएको बताए ।
सामाजिक सुरक्षा कोषले औषधि उपचार, स्वास्थ्य तथा मातृत्व सुरक्षा योजना, दुर्घटना तथा अशक्तता सुरक्षा योजना, आश्रित परिवार सुरक्षा योजना र वृद्ध अवस्था सुरक्षा योजना गरी चार वटा स्किमहरू ल्याएको छ ।
कार्यकारी निर्देशक ज्ञवालीले सामाजिक सुरक्षा कोषमा प्रशिक्षार्थी कामदारहरूसमेत कोषका सहभागि भएको जानकारी गराउँदै यसभन्दा अगाडि ३ महिनाका लागि प्रशिक्षार्थीका रूपमा कामदार राख्दै आएकोमा हाल ६ महिनाका लागि कामदार राखेर कोषमा सहभागि भएकाले सामाजिक सुरक्षा कोषका स्किमहरू आकर्षक रहेको दाबी गर्दै यसलाई सफल कार्यान्वयन गराउन आफूहरू लागि
परेको बताए ।
कार्यक्रममा बैंकर संघका सिइओ अनिल शर्माले सामाजिक सुरक्षा कोष आफूहरूको आपत्ति नभएको भन्दै सामाजिक सुरक्षा योजना अन्र्तगत केही कन्फ्युजहरू आफूहरूमा रहेका बताए ।
कार्यक्रममा प्रेस काउन्सिल नेपालका सदस्य गोविन्द प्रसाद चौलागाईंले पछिल्लो समय सरकारले ल्याएको सामाजिक सुरक्षासम्बन्धी योजनाहरू समग्र श्रमिकहरूको हक हितमा भएकाले यसलाई प्रभावकारी ढंगले कार्यन्वयन गर्न सबै पक्षले सहयोग गर्नुपर्ने धारणा राखे ।
-1745656903.jpeg)