काठमाडौं- मलेसिया सरकारले नेपाली कामदारलाई पहिलो प्राथमिकतामा राख्दै थप संख्यामा लैजाने तयारी गरेको छ । नेपालीहरुको प्रमुख श्रम गन्तव्य मुलुक मलेसियाले आगामी दिनमा नेपालबाट लैजाने कामदारको संख्या बढाउने जनाएको हो ।
कोरोना महामारीका कारण मलेसियाले झण्डै दुई वर्षदेखि नेपाललगायत अन्य मुलुकबाट आप्रवासी श्रमिक प्रवेशमा कडाइ गर्दा यतिखेर कामदारको अभाव झेल्नुपरेको त्यहाँका सञ्चारमाध्यमले उल्लेख गरेका छन् । कोरोनाको चपेटाले आप्रवासी कामदार प्रवेशमा कडाइ गर्दा मलेसियामा गत आर्थिक वर्षमा नेपालबाट ३५ हजारको हाराहारी मात्र कामदार गएको वैदेशिक रोजगार विभागको तथ्यांकले देखाउँछ ।
विविध कारणले कामदारको अभाव हुन थालेपछि मलेसिया सरकारले श्रमिकहरुको पक्षमा केही नीतिगत परिवर्तनसमेत गरेको छ भने सकेसम्म आप्रवासी कामदार भित्र्याउन पहल थालेको छ । गत फेब्रुअरीमा मलेसिया सरकारले २०२२ को अन्त्यसम्ममा १० लाख आप्रवासी कामदार भित्र्याउने घोषणा गरेको थियो । तर, अगस्टसम्ममा मुस्किलले दुई लाख कामदारमात्र भित्र्याएको त्यहाँको मानव संसाधन मन्त्रालयले जनाएको छ ।
यसै सेरेफेरोमा रहेर नेपालका लागि मलेसियाका कार्यवाहक राजदूत मोहम्मद फाजिल अबु हसनले आगामी दिनमा मलेसिया जाने कामदारको संख्यामा वृद्धि गरिने जानकारी दिएका छन् । उनले केही दिनअघि मलेसिया सरकारको प्रतिनिधित्व गर्दै श्रम, रोजगार तथा सामाजिक सुरक्षामन्त्री शेरबहादुर कुँवरसँगको भेट गरी नेपाली कामदारको संख्यामा वृद्धि गर्ने तयारी भइरहेको जानकारी दिएका थिए ।
कार्यवाहक राजदूत हसनले संख्या बढाउने तयारी भएको मात्र नभई आगामी दिनमा औसतभन्दा बढी नै कामदार लैजाने प्रतिबद्धता व्यक्त गरे । उनले नेपाली श्रमिकलाई मलेसिया सरकारले पहिलो प्राथमिकतामा राखेको पनि जानकारी दिए ।कोरोना महामारी मत्थर भएसँगै मलेसियाले आप्रवासी श्रमिक प्रवेशका लागि बाटो खुला गरेपछि अहिले मलेसिया जाने नेपालीको संख्या ह्वात्तै बढेको वैदेशिक रोजगार व्यवसायीहरु बताउँछन् ।
‘मलेसियाले गत फेब्रुअरीमा घोषणा गरेअनुसार १० लाख विदेशी कामदार आपूर्ति हुने अवस्था नआएपछि अहिले नेपाली कामदार लैजाने रफ्तार बढाउँछौं भनिएको हो,’ नेपाल लोकतान्त्रिक वैदेशिक रोजगार व्यवसायी एसोसिएसनका अध्यक्ष कुमुद खनालले भने, ‘अहिले मलेसियाले भनेजति विदेशी कामदार लैजान नसकेको र युक्रेन युद्धका कारण खाडी मुलुकमा कामदारको माग घटेको बेला मलेसियाले संख्या बढाउनु नेपालीहरुका लागि राम्रो अवसर हो ।’
आम्दानीको हिसावले पनि खाडी मुलुकभन्दा मलेसियामा राम्रो कमाइ हुने उनले बताए । सरकारले आवश्यक सहजीकरण गरिदिने र श्रम स्वीकृतिका प्रक्रियालाई छोट्याउने हो भने छिटोभन्दा छिटो थुप्रै नेपाली युवाले मलेसिया रोजगारीमा जाने अवस्था निर्माण हुने खनालको भनाइ छ । ‘यतिखेर मलेसियालाई सर्भिस सेक्टर, प्लान्टेसन, कन्ट्रक्सन र म्यानुफ्याक्चरिङमा विदेशी कामदार चाहिएको छ, यो सुनौलो अवसर पनि हो र यसबाट नेपालले लाभ लिन सक्नुपर्छ,’ खनालले भने ।
अर्का एक व्यवसायीले भने नेपाली कामदार बढी लैजान्छौं भन्नु प्रोपोगाण्डा मात्रै भएको बताए । ‘अहिले मलेसियामा लेबर क्राइसिस छ, यस्तो अवस्थामा कामदारको संख्या बढाउन खोज्नु जायज भए पनि धेरै मान्छे लैजान्छौं भन्नु प्रोपोगाण्डा मात्रै हो,’ ती व्यवसयीले भने । उनका अनुसार मलेसियाले तोकेको निश्चित मेडिकललाई नेपाल सरकारले स्वास्थ्य परीक्षणमा अवरोध नगरोस् भन्ने मनसायका साथ कामदारको संख्या बढाउने कार्ड फालिएको हो ।
तर, पछिल्लो समय मलेसिया सरकारले श्रमिकको आधारभूत पारिश्रमिक बढाउने निर्णय गरेस“गै नेपालीहरुको लागि मलेसिया अकर्षक गन्तव्य बनेको उनको भनाइ छ ।मलेसियाले हाल आधारभूत पारिश्रमिक वृद्धि गरी १५ सय मलेसियन रिंगेट (४२ हजार रुपैयाँभन्दा बढी) पुर्याएको छ । त्यस्तै नेपाल–मलेसियाबीच भएको श्रम समझदारीबमोजिम बायोमेट्रिक स्वास्थ्य परीक्षणको सम्पूर्ण खर्च रोजगारदाताले नै बेहोर्ने व्यवस्था पनि मलेसियाले कार्यान्वयनमा ल्याएको छ ।
जसअन्तर्गत नेपाली कामदारहरुले मेडिकल चेकजाँचका लागि नेपालमा तिरेको शुल्क रोजगारदाताले पहिलो महिनाको पारिश्रमिकसँगै अनिवार्य फिर्ता दिनुपर्ने व्यवस्था गरेको छ । उल्लिखित व्यवस्थासहित ‘फ्रि भिसा, फ्रि टिकट’को प्रावधान पूर्णरुपमा कार्यान्वयनमा आए मलेसियाको ३० प्रतिशत विदेशी कामदार नेपालबाट आपूर्ति हुने व्यवसायीहरुको भनाइ छ ।
