काठमाडौं–राष्ट्रिय पुनर्निर्माण प्राधिकरण राष्ट्रिय पुनर्निर्माण परामर्श परिषद्को बैठकले पुनर्निर्माणका कार्यहरू सन्तोषजनक रूपमा अघि बढेको निष्कर्ष निकाल्दै बाँकी काम छिटो सक्ने गरी काम गर्न सुझाव दिएको छ ।
बैठकको निष्कर्ष सुनाउँदै प्रधानमन्त्री एवं परामर्श परिषद्का अध्यक्ष केपी शर्मा ओलीले पुनर्निर्माणका कार्य प्रगति सन्तोषजनक भएको र देखिएका समस्याहरूलाई समाधान गर्दै बाँकी काम सकेसम्म छिटो गर्न प्राधिकरणलाई सुझाव दिएको बताए ।
बैठकले भूकम्पपछिको राहत, उद्धार र पुनर्निर्माण बारेका सिकाई र अनुभवहरू अहिलेका पुस्तामा सचेतना जगाउन र भावी पुस्तालाई जानकारी दिनका लागि संरक्षित र सुरक्षित गर्न पनि सुझाव
दिएको छ ।
राष्ट्रिय पुनर्निर्माण प्राधिकरणले नेपालको पुनर्निर्माणका सिकाई र अनुभव बाँड्नका लागि आगामी वर्ष नेपालमा अन्तर्राष्ट्रिय सम्मेलन गर्ने तयारी
गरेको छ ।
बैठकमा प्रधानमन्त्री ओलीले पुनर्निर्माण राम्रो गतिमा अघि बढेको र नेपालको पुनर्निर्माण तथा विपदको क्षेत्रमा काम गरेका अन्तर्राष्ट्रिय समुदायका प्रतिनिधिहरूले आफूसँगको भेटमा पुनर्निर्माणमा नेपालले हासिल गरेको प्रगति उल्लेखनीय र अनुकरणीय भनेको जानकारी दिए ।
उनले समस्या र जटिलताहरूलाई समाधान गर्दै पुनर्निर्माण अघि बढेको बताउँदै पुनर्निर्माणलाई अझ प्रभावकारी रूपमा अघि बढाउन नीतिगत र व्यवहारिक पक्षमा सुधार गर्न, काम गर्ने तरिकामा सुधार गर्न, सामाजिक जागरण बढाउन, संगठीत संस्थाहरूलाई परिचालन गर्न, स्थानीय र प्राविधिकहरूलाई अझ सकृय पार्न सुझाव दिए ।
सांसद अग्नि सापकोटाले धरहरा उठ्दै गरेकाले थप आशा जगाएको भन्दै पुनर्निर्माणका धेरै क्षेत्रमा काम भएको बताए । उनले स्थानीय तहसँग समन्वय गरी गुनासाको सम्बोधन गर्न, सम्पदा पुनर्निर्माण, पुस्तकालय पुनर्निर्माण, विश्व विद्यालय पुनर्निर्माणमा जोड दिन सुझाव दिए ।
सांसद यज्ञराज सुनुवारले पुनर्निर्माणका कार्य उत्साहजनक रूपमा अघि बढेको भन्दै पुनर्निर्माण प्राधिकरणलाई धन्यवाद दिए । उनले निजी आवास पुनर्निर्माणमा ओखलढुङ्गा अग्रस्थानमा रहेको उल्लेख गर्दै एकीकृत बस्ती पुनर्निर्माणमा आकर्षण बढाउन सरकारले पूर्वधार विकासमा विशेष ध्यान दिनुपर्ने बताए । सांसद सुनुवारले विद्यालय राम्रा बनेकोमा प्रशंसा गर्दै खानेपानी, पुल, प्रवलीकरण, गुनासो सुनुवाई लगायतमा ध्यान दिन सुझाव दिए ।
सांसद प्रेम सुवालले भक्तपुरको कला संग्रहालय नेपाली शैलीमा बनाउनका लागि सहयोग गर्न प्राधिकरणलाई आग्रह गर्दै निजी आवास पुनर्निर्माणको अनुदान र सहुलियत ऋण बढाउन आग्रह गरे ।
सांसद पम्फा भुसालले पुनर्निर्माणका राम्रा कामप्रति धन्यवाद दिँदै व्यवहारिक रूपमा स्वबासी र गुठीको समस्या अझै रहेको बताईन् ।
सांसद विरोध खतिवडाले प्रवलीकरण र स्वास्थ्य संस्थाहरू पुनर्निर्माणको संख्या कम भएको भन्दै त्यसको कारण दिन आग्रह गर्नुभयो ।
सांसद हितबहादुर तामाङले व्यवहारिक रूपमा भिन्नु भएका तर लालपूर्जा नबनेका कारण लाभग्राही हुन नसकेका भूकम्पपीडितलाई सम्बोधन गर्न सुझाव दिए ।
त्यस्तै, सांसद हरि राज अधिकारीले गोरखाको एउटा वस्ती जोखिममा रहेकोले त्यसको स्थानान्तरणका लागि प्राधिकरणको ध्यानाकर्षण गराए ।
परामर्श परिषद्को बैठकमा राष्ट्रिय पुनर्निर्माण प्राधिकरणका प्रमुख कार्यकारी अधिकृत सुशील ज्ञवालीले पुनर्निर्माणको वर्तमान अवस्था र कार्ययोजना पेश गर्नु भएको थियो ।उनले निजी आवास पुनर्निर्माण अन्तर्गत ६२ प्रतिशत पूरा भएको, २५ प्रतिशतको पुनर्निर्माण जारी रहेको र १७ प्रतिशत पुनर्निर्माण सुरु हुन बाँकी रहेको जानकारी दिए ।
