काठमाडौं– नेपाल कम्युनिष्ट पार्टी (नेकपा)का वरिष्ठ नेता माधवकुमार नेपालले मुलुकको सार्वजनिक यातायात क्षेत्रलाई व्यवस्थित, मर्यादित र सुरक्षित बनाउन आवश्यक रहेको औँल्याएका छन् ।
पूर्वप्रधानमन्त्री समेत रहेका नेता नेपालले सार्वजनिक यातायात केन्द्रीय महासंघ नेपालको प्रथम राष्ट्रिय साधारण सभाको उद्घाटन कार्यक्रममा शनिबार बोल्दै यातायात क्षेत्रको एकाधिकारको अन्त्य गर्दै यस क्षेत्रमा रहेका बेथिति र विकृति नियन्त्रणका लागि नियमनकारी निकाय सक्रिय हुन जरुरी भएको उल्लेख गरेका हुन् ।
नेता नेपालले मुलुकभित्र सार्वजनिक यातायात मात्र नभई विद्यालय, हवाई कम्पनी तथा बैंक वित्तीय संस्थालगायत जुनसुकै निकाय खोल्नका लागि कुनै सीमितता नरहेको र हचुवाका भरमा बग्रेल्ती संस्था खुल्ने परिपाटी रहेको भन्दै त्यसलाई बदल्न नियमनकारी निकायको विशेष ध्यान जान जरुरी भएको बताए ।
नेता नेपालले भने, ‘देशमा उदारभावको नाममा बग्रेल्ती अनुमति दिइन्छ, कति सङ्ख्या हो, कुनै सीमितता छैन । अर्कोतर्फ खुलेका संस्थाको अनुगमन प्रणाली प्रभावकारी छैन, जसले गर्दा सेवा गुणस्तरतामा ह्रास आउँछ, अन्ततोगत्व लगानीकर्ताले सेवाबाटै विमुख हुनुपर्ने अवस्था पनि सिर्जना हुन्छ, त्यसैले राम्रोसँग अध्ययन गरेर मात्र यातायात सेवा सञ्चालनको अनुमति दिनुपर्छ, प्रतिस्पर्धा र नियमनलाई राज्यका निकायले अझ बढी जिम्मेवार र सक्रिय भएर लाग्नुपर्ने जरुरी छ ।’
पूर्वप्रधानमन्त्री तथा नेता नेपालले मुलुकभित्र राज्यले बृहत्तर ढंगले दीर्घकालीन सोचका साथ पूर्वाधार विकास योजनाका कामलाई अघि बढाउने परिपाटीको विकास नहुँदा लगानीअनुरूपको प्रतिफल आउन नसकेको समेत बताएका छन् ।
नेता नेपालले भने, ‘हामी विमानस्थल, सडक वा पुल जे पूर्वाधार बनाउँदैछाँै, त्यो कति अवधिमा कस्तो गुणस्तरको बनाउने भन्ने मापदण्ड छैन । साँघुरो हेराइ, संकीर्ण सोचका कारण मुलुकको विकासको गतिलाई तीव्रता दिन सकिन्न । जुनसुकै पूर्वाधार बनाउँदा १० वर्ष, २० वर्ष वा ५० वर्ष कति अवधिसम्मका लागि हो कति खर्च लाग्छ आदि विषय शुरुमै निर्धारण गरेर आयोजना अघि बढाउन जरुरी छ ।’
चालकको लापर्बाहीका कारण मुलुकमा सवारी दुर्घटना बढ्नुका साथै ठूलो जनधनको क्षति बेहोर्नुपरेको उल्लेख गर्दै उहाँले चालकलाई उत्तरदायी बनाउन आवश्यक प्रशिक्षणका साथै उनीहरूलाई अनुशासित र मर्यादित बनाउनेतर्फ सरोकार भएका निकायले ध्यान दिनुपर्ने खाँचो आँैल्याएका थिए ।
कार्यक्रममा विभिन्न यातायात व्यवसायी संगठनका प्रतिनिधिले यातायात क्षेत्रलाई व्यवस्थित, सुरक्षित र भरपर्दो बनाउन राज्यका नियमनकारी निकाय र निजी क्षेत्रका व्यावसायिक संस्थाले सहयोग र समन्वयात्मक ढंगले लाग्नुपर्नेमा जोड दिएका छन् ।
कार्यक्रममा महासंघका अध्यक्ष होमप्रसाद अधिकारीले सार्वजनिक यातायातलाई अनुशासित, व्यवस्थित, मर्यादित र सुरक्षित बनाई यात्रु उपभोक्ता, सरकार मजदूर र व्यवसायीबीचको एकतालाई थप सुमधुर तुल्याउने उद्देश्यले महासङ्घ स्थापित भएको बताए ।
महासंघमा देशैभरका सार्वजनिक यातायात क्षेत्रका ५४ संगठन आबद्ध रहेको बताइएको छ । साधारणसभाले सार्वजनिक यातायात सेवालाई व्यवस्थित, मर्यादित र सुरक्षित बनाई सेवाको गुणस्तर अभिवृद्धका लागि संस्थाले आगामी दिनमा प्रभावकारी नीति लिने बताइएको छ ।
