काठमाडौं- इजरायलमा नेपाली कामदार पठाउने कार्य पा“च महिना रोकिएर यही साउन महिनाबाट पुनः सुरु भयो । त्यसयता ६०० जनाले भिसा प्राप्त गरेका छन् । नेपाल सरकारस“ग श्रम सम्झौता भएअनुसार इजरायलका दीर्घकालीन स्याहार केन्द्रका लागि चरणबद्धरुपमा लैजाने गरी उल्लिखित संख्यामा नेपाली सहायक कामदारले भिसा पाएका हुन् ।
वैदेशिक रोजगार विभागअन्तर्गत इजरायल र जापान शाखाले साउन ३ गते नै सूचना जारी गरेर १०० जना कामदारको भिसासहित राहदानी काठमाडौंस्थित इजरायल दूतावासको कन्सुलर विभागबाट प्राप्त भएको जनाएको थियो । यसपछि चरणबद्धरुपमा १०० जनाको दरले ६०० जना कामदारको भिसा आएको विभागले जानकारी दिएको छ । विभिन्न मितिमा भिसा प्राप्त गरेका झण्डै ४०० जना नेपाली कामदारले आवश्यक प्रक्रिया पूरा गरी इजरायल गइसकेका छन् । बा“की २०० जनाको साउन २५ गतेदेखि भदौ ५ गतेसम्म उडान हुने विभागले जनाएको छ ।
विभागले भिसा आएका कामदारहरुलाई क्रमिकरुपमा राहदानी बुझ्न, उडानअनुसार बनाइने भाइबर ग्रुपमा आफ्नो नाम समावेश गराउन र कोभिड–१९ विरुद्धको खोप लगाएको विवरण पेस गर्न ललितपुरको भै“सेपाटीस्थित व्यावसायिक तथा सीप विकास तालिम प्रतिष्ठानमा सम्पर्क गर्ने व्यवस्था गरेको छ । विभागले इजरायल जान हवाई उडानका लागि सिलिंक होलिडेजलाई साझेदार बनाएको छ भने सनराइज बैंकमार्फत भुक्तानी हुनेगरी कामदारले ५९ हजार ९९० रुपैया“ हवाई भाडा बुझाउन सूचना जारी गर्दै आएको छ ।
विभागले इजरायलको स्वास्थ्य मन्त्रालयको ५ जुलाईमा आएको पत्रलाई उद्धृत गर्दै इजरायल उड्ने नेपाली कामदारले उडान गर्नुपूर्व ७२ घण्टाभित्र कोभिडको पिसिआर परीक्षण गराउनुपर्ने जानकारी गराउँदै आएको छ । उक्त परीक्षणमा रिपोर्ट ‘नेगेटिभ’ आएको अवस्थामा मात्रै इजरायल उडानका लागि अनुमति पाइनेछ । कोभिड परीक्षण परिणाम ‘नेगेटिभ’ वा ‘पोजिटिभ’ जे आए पनि सिलिंक होलिडेजलाई जानकारी दिनुपर्ने प्रावधान राखिएको छ । पिसिआर परीक्षण नेगेटिभ आउनासाथ ग्रिन पासका लागि प्रत्येक कामदारले अनलाइन फाराम गर्नुपर्ने व्यवस्था गरिएको छ ।
विभागको इजरायल र जापान शाखाका संयोजक तथा निर्देशक श्रीचन्द्र साहले श्रम स्वीकृतिका लागि अनलाइन आवेदन दिन अनिवार्य जीवन बिमा गरेको हुनुपर्ने बताए । उनका अनुसार इजरायल जान अनुमति पाएका प्रत्येक नेपाली कामदारले वैदेशिक रोजगार कल्याणकारी कोषमा रकम तिरेको हुनुपर्नेछ । यस्तै, स्वास्थ्य परीक्षणमा फिट भएका तर वैदेशिक रोजगार सूचना व्यवस्थापन प्रणाली (फेइम्स)मा फिट भएको विवरण नजनाइएको पाइएमा कामदारले तत्कालै विवरण अद्यावधिक गराइदिनका लागि सम्बन्धित स्वास्थ्य संस्थालाई अनुरोध गर्न सकिने जनाइएको छ ।
नेपाल सरकार र इजरायल सरकारबीच २०७७ माघ महिनामा एक हजार नेपाली सहायक कामदार लैजाने सम्झौता भएअनुरुप विभागले आवेदन माग गरेको थियो । सोहीअनुरुप आवेदन परेकामध्येबाट एक हजार १७५ जनाको अन्तिम नामावली सार्वजनिक गरेको थियो । जसमध्ये गत पुस र माघमा गरी २९७ जना इजरायल पुगेका थिए । बाँकी रहेका कामदार जाने क्रममा अहिले चरणबद्ध रुपमा ६०० जनाले भिसा पाएका हुन् । नाम निस्केका बा“की कामदारहरुको पनि क्रमिकरुपमा भिसा आउने र प्रक्रिया पूरा गरी उडान हुने विभागले जनाएको छ ।
यसअघि इजरायलको परराष्ट्र मन्त्रालयका कर्मचारीको आन्दोलनका कारण नेपाली कामदार लैजाने प्रक्रिया रोकिएको थियो । यसबारे नेपालस्थित इजरायली दूतावासले कर्मचारीको आन्दोलनका कारण प्रक्रिया अवरुद्ध भएको र चाँडै नै सुरु गरिने नेपाल सरकारलाई जानकारी गराएको थियो । वैदेशिक रोजगारीको लागि आकर्षक गन्तव्य मानिएको इजरायल जाने नेपाली कामदारले मासिक १६ सय अमेरिकी डलर अर्थात् (करिब दुई लाख रुपैयाँ) पारिश्रमिक पाउने छन् । सम्झौता अनुसार इजरायल जाने कामदारले खाना खर्च आफैं बेहोर्नुपर्नेछ भने बस्नका लागि रोजगारदाताले व्यवस्था मिलाउनेछ । रोजगारीमा जानेको करार अवधि एक वर्षको हुने भए पनि करार थपिएर पा“च वर्षसम्म बस्न पाइने व्यवस्था गरिएको छ ।
