भक्तपुर–सञ्चार तथा सूचना प्रविधिमन्त्री गोकुल बाँस्कोटाले संविधानको मर्मविपरीत प्रेस स्वतन्त्रता कुण्ठित हुने अवस्था आए राजीनामा दिएर आन्दोलन गर्ने बताएका छन् ।
नेपाल पत्रकार महासंघ भक्तपुर शाखाको २३औँ स्थापना दिवसका अवसरमा आयोजित कार्यक्रममा उनले यस्तो बताएका हुन् । उनले सरकारका कारण प्रेस स्वतन्त्रता माथि खतरा भएको भन्ने भनाईको स्पष्टिकरण दिँदै यस्तो नभएको बताएका हुन् ।
उनले मिडियाले एउटा भनाई राख्दा अर्को बुझ्ने र लेख्ने गरेकोमा आफुलाई दिक्क लागेको बताए । उनले भने, ‘एउटा कुराभन्दा, पूर्वदृष्टि राखेर अर्को कुरा प्रस्तुत गर्ने प्रवृत्ति मिडियामा हाबी भएको छ, म पनि वर्षांैसम्म पत्रकारिता गरेकै मान्छे हुँ, पत्रकारको मर्म मैले बुझ्न सक्छु, पत्रकारिता पनि आचारसंहितामा रहेर गर्नुपर्छ ।’
मन्त्री बाँस्कोटाले सरकारले ‘समृद्ध नेपाल, गरिब पत्रकारिता’को अवधारणा नलिएको बताउँदै भने, ‘ अबको पत्रकारितालाई स्वर्ण युगमा बदल्नुपर्छ, अब कमिसन पत्रकारिता धेरै चल्दैन, पत्रकारिता व्यावसायिक हुनुपर्छ, आफ्नो र अर्काको भन्ने आधारमा भन्दा पनि तथ्यमा टेकेर समाचार लेख्नसक्ने वातावरण बन्नुपर्छ ।’ उनले पत्रकारको हकहितभन्दा बाहिर गएर मिडिया काउन्सिल विधेयक पारित नहुने पनि बताए । आफू मन्त्री भएपछि पाँच करोड ३४ लाख रूपैयाँको पत्रकारिता कल्याण कोष स्थापना गरेको र अब त्यसलाई बढाएर १० करोड रूपैयाँ पु¥याउने उद्देश्य लिएको बताए ।
सरकारसँग भएका असन्तुष्टिलाई पत्रकारितामा नजोडौँ भन्दै उनले मिडियाले गहिराइमा पुगेर लेखेमात्र तथ्य बाहिर आउने बताए । अहिले प्रेस स्वतन्त्रता कुण्ठित हुन थाल्यो भनेर सरकारलाई औँला ठड्याउँदा भोलि पत्रकारिताप्रतिको विश्वास नगुमोस् भन्दै उनले पत्रकारिता अझै विश्वासनीय र खोजमूलक बन्नुपर्छ विचार राखे ।
उनले पूर्वदृष्टि राखेर समाचार लेख्न नहुने चर्चा गर्दै पत्रकारितालाई भजन, मिसन, पार्टी पत्रकारिताबाट माथि उठाएर ‘समृद्ध नेपाल, सुखी नेपाली’मा जोड्नुपर्ने बताए ।
स्थापना दिवसका अवसरमा दबाब साप्ताहिकका सम्पादक तथा महासंघ उपत्यका प्रदेश सचिव अमर भुजुलाई दुई हजार ५०० सहितको मैयादेवी शिल्पकार स्मृति पत्रकारिता पुरस्कार र ध्रुव मधिकर्मीलाई रु १० हजारसहितको स्वर्गीय भगवान् महर्जन स्मृति पुरस्कार प्रदान गरिएको थियो ।
