काठमाडौं- नेकपा एमालेले गत वैशाख ३० गते सम्पन्न स्थानीय तहको निर्वाचनमा पार्टीभित्र भएको अन्तर्घातबारे छानबिन गर्न कार्यदल गठन गरेको छ । आइतबार बसेको एमालेको सचिवालय बैठकले उपाध्यक्ष विष्णुप्रसाद पौडेलको संयोजकत्वमा कार्यदल गठन गरेको हो ।
कार्यदलमा पार्टीका संगठन विभाग प्रमुख खगराज अधिकारी र निर्वाचन विभाग प्रमुख विष्णु रिमाल सदस्य रहेका छन् ।एमालेका केन्द्रीय प्रचार विभाग प्रमुख एवं उपमहासचिव पृथ्वीसुब्बा गुरुङले स्थानीय चुनावमा पार्टी विरोधी गतिविधि गर्ने नेता कार्यकर्तामाथि छानबिन गरी कारबाही गर्न कार्यदल गठन गरिएको जानकारी दिए ।
स्थानीय निर्वाचनका क्रममा पार्टीका उम्मेदवार हराउन भूमिका खेल्ने नेता कार्यकर्ताविरुद्ध पार्टीमा उजुरी परेको थियो ।बैठकले स्थानीय निर्वाचनको विस्तृत समीक्षा, विद्यमान शक्ति सन्तुलनको विश्लेषण गर्ने, आफ्नो सरकारका राम्रा कामका प्रचार र वर्तमान सरकारले जनतालाई असर पार्ने निर्णयको भण्डाफोर गर्ने निर्णयसमेत भएको गुरुङले बताए ।
तीन नयाँ विभाग गठन
आइतबारको सचिवालय बैठकले तीनवटा नयाँ विभाग गठन गरेको छ । भौतिक पूर्वाधार तथा यातायात व्यवस्था विभाग, वन तथा वातावरण विभाग र अर्थ तथा योजना विभाग गठन गर्ने निर्णय भएको उपमहासचिव गुरुङले जानकारी दिए ।
१४ विभागमा सचिव मनोनीत
यसैगरी विभिन्न विभागहरुको सचिव मनोनयन गरिएको छ । आइतबारको सचिवालय बैठकले प्रचार तथा प्रकाशन विभागको सचिवमा गगन विष्ट, संगठन विभागमा सम्झना देवकोटा, परराष्ट्र मामिलाको सचिवमा अञ्जान शाक्य, वित्त तथा कोष व्यवस्थापन विभागको सचिवमा भीष्म अधिकारी, संगठन विभागमा सम्झना देवकोटा, उपभोक्ता हित संरक्षण विभागमा मोहिनी खनाल, श्रम तथा रोजागार विभागको सचिवमा जनक चौधरीलाई मनोनयन गरेको छ ।
संसदीय विभागको सचविमा सूर्य पाठक, सामाजिक सेवा विभागको सचिवमा नेत्रप्रसाद तिम्सिना, सांस्कृतिक विभागमा राजेश थापा, स्थानीय तह विकास विभागमा हर्क राई, संघीय मामिला तथा सामान्य प्रशासन विभागको सचिवमा शिव गुरुङ, ऊर्जा तथा जलस्रोत विभागमा पुष्पज्योति ढुंगाना, अर्थ तथा योजना विभागमा योगेन्द्र शाही र कानुन विभागको सचिवमा डिल्लीराम मैनाली मनोनीत भएका छन् ।
यसैगरी, प्रदेश र जिल्लास्तरमा कार्यकर्ता प्रशिक्षण कार्यक्रम सञ्चालन गर्न एमालेले उपाध्यक्षहरुलाई खटाउने भएको छ । आइतबार सचिवालय बैठकले सातवटै प्रदेश र जिल्लास्तरमा कार्यकर्ता प्रशिक्षण, निर्वाचन तयारीलगायतको काम गर्ने निर्णय गर्दै उपाध्यक्षहरुलाई प्रदेशमा खटाउने निर्णय गरेको हो ।
प्रदेश १ मा वरिष्ठ उपाध्यक्ष ईश्वर पोखरेल, मधेस प्रदेशमा उपाध्यक्ष सुरेन्द्र पाण्डे, बागमतीमा विष्णु पौडेल, गण्डकीमा अष्टलक्ष्मी शाक्य, लुम्बिनीमा सुवासचन्द्र नेम्वाङ, कर्णालीमा रामबहादुर थापा र सुदूरपश्चिममा युवराज ज्ञवालीलाई संयोजनको जिम्मेवारी तोकिएको केन्द्रीय प्रचार विभाग प्रमुख गुरुङले जानकारी दिए ।
उनीहरुलाई आगामी निर्वाचनको तयारी, जनप्रतिनिधिको काममा सहजीकरण, मह“गी नियन्त्रणमा सरकारलाई दबाब दिने, विपद्मा पार्टीको स्वयंसेवी संयन्त्रलाई तयारी अवस्थामा राख्न निर्देशन दिने, प्रदेश र जिल्लास्तरमा हुने प्रशिक्षण कार्यक्रमको संयोजन गर्ने जिम्मेवारी तोकिएको उनले बताए ।
