काठमाडौं– परराष्ट्रमन्त्री प्रदीपकुमार ज्ञवाली अहिले रसियामा छन् । मन्त्री ज्ञवालीले रसियासँग आपसी विश्वास, राजनीतिक समझदारी तथा आर्थिक एवं व्यापारिक सम्बन्ध र सुदृढ सहकार्यका लागि त्यहाँ पुगेको बताएका हुन् ।
रुसी महासंघको औपचारिक भ्रमणमा रहेका मन्त्री ज्ञवालीले मंगलबार मस्को स्टेट इन्स्टिच्युट अफ इन्टरनेशनल रिलेशन्समा प्रवचन दिँदै बहुआयामिक नेपाल–रसिया सम्बन्धका विविधपक्षबारे चर्चा गरेको परराष्ट्र मन्त्रालयले जनाएको छ ।
मन्त्री ज्ञवालीले नेपाल–रसिया सम्बन्ध, परिवर्तित सन्दर्भमा नेपालको परराष्ट्र नीति, नेपालको विकास प्रयास र भावी योजना तथा प्राथमिकता, नेपालको शान्ति प्रक्रिया र त्यसपछिका अवधिमा प्राप्त राजनीतिक उपलब्धि, सामाजिक–आर्थिक रूपान्तरणका प्रयत्नबारे विस्तृत रूपमा जानकारी दिए ।
नेपाल–रसियाबीच कूटनीतिक सम्बन्ध स्थापनाको ६३औँ वार्षिकोत्सवको सन्दर्भमा भएको आफ्नो रसिया भ्रमणले दुई देशबीच विद्यमान राजनीति, आर्थिक, सामाजिक, सांस्कृतिक र शैक्षिक सम्बन्धलाई नयाँ उचाइ प्रदान गर्ने उनले विश्वास व्यक्त गरे । नेपाल र रुसी महासंघबीच व्यापार–वाणिज्यका क्षेत्रमा उल्लेख्य साझेदारी हुन नसकेको यथार्थ औँ ल्याउँदै मन्त्री ज्ञवालीले नेपालमा उपलब्ध लगानीका अवसरको भरपूर उपयोग गर्न आग्रह गरेका छन् ।
दुवै देशका सरकार, निजी क्षेत्र, विद्वत् वर्ग, सबै तह र तप्काका जनताले व्यापार, लगानी र पर्यटन प्रवद्र्धनलगायत सबै क्षेत्रमा अर्थपूर्ण साझेदारीका निम्ति अब विलम्ब गर्न नहुने उनको भनाइ छ । कृषि, पर्यटन, खनिज पदार्थ उत्खनन, भौतिक पूर्वाधार निर्माण र सूचना तथा सञ्चार प्रविधिका क्षेत्रमा लगानी गर्न सकिने र त्यसमा उच्च प्रतिफल प्राप्त हुने जानकारी दिए ।
नेपालमा उत्पादित ऊर्जा बिक्रीका निम्ति बजारको समस्या नभएको पनि उनले स्पष्ट पारे । लगानी र व्यवसायको वातावरण बनाउन नेपाल सरकारले नीतिगत एवं संरचनागत सुधार गरेको, वैदेशिक लगानी तथा प्रविधि हस्तान्तरण ऐन, सार्वजनिक–निजी साझेदारी तथा लगानी ऐन, विशेष आर्थिक क्षेत्र, एकद्वार सेवा प्रवाह प्रणाली कार्यान्वयनमा ल्याएको जानकारी पनि दिए ।
सन् २०२० लाई नेपाल भ्रमण वर्ष घोषणा गरिएको सन्दर्भमा रुसी महासंघले अभिायानमा सहयोग गर्न प्रतिवद्धता जनाएको उनले बताए । पर्यटकीय पूर्वाधारमा रसियाली लगानी प्रवाह भएमा नेपालको अर्थतन्त्रलाई उकास्न ठूलो योगदान पुग्ने अपेक्षा गरिएको छ । गत सोमबार मन्त्री ज्ञवालीले आफ्ना रुसी समकक्षी सेर्गेइ लाभरोभसँग प्रतिनिधिमण्डलस्तरीय वार्ता गर्दै त्यस अवसरमा दुई देशबीच आपसी हित र साझा चासोका सबै विषयमा विचार विमर्श भएको जनाएका थिए । वार्तापछि दुवै देशका परराष्ट्रमन्त्रीले संयुक्त रूपमा सञ्चारकर्मीलाई सम्बोधन गर्दै रसिया–नेपाल सम्बन्ध र भावी योजनाबारे जानकारी दिएका हुन् ।
मन्त्री ज्ञवालीले दुई देशबीचको सम्बन्धलाई सरकारी, व्यापारिक समुदाय, विद्वत् वर्ग, सञ्चारकर्मी, वैज्ञानिक, विद्यार्थी, कलाकारका माध्यमबाट थप सुदृढ तुल्याउन सकिने विचार व्यक्त गरेका थिए । उनले राजनीतिक अस्थिरताबाट स्थायित्वतर्फ उन्मुख भएको नेपाल दिगो आर्थिक तथा सामाजिक विकासलाई केन्द्रमा राखेर अघि बढेको जानकारी दिँदै ‘समृद्धि नेपाल सुखी नेपाली’ राष्ट्रिय परिकल्पना साकार पार्न सरकार लागिपरेको बताए ।
मन्त्री ज्ञवालीले नेपाल र रुसी महासंघबीचको राजनीतिक समझदारीलाई प्रगाढ तुल्याउने तथा दुवै देशलाई लाभ हुने सहयोगका विविध क्षेत्रमा सहकार्य अभिवृद्धि गर्न सकिने बताए । उनले न्यायपूर्ण, शान्त र समृद्ध विश्व निर्माणका निम्ति क्षेत्रीय एवं अन्तर्रा्ष्ट्रियस्तरमा सहकार्य बढाइने जानकारी दिए ।
राष्ट्रपति विद्यादेवी भण्डारीका तर्फबाट राष्ट्रपति भ्लादिमिर पुटिनलाई नेपाल भ्रमणको निमन्त्रणा पत्र हस्तान्तरण गर्नुका साथै प्रधानमन्त्री केपी शर्मा ओलीका तर्फबाट समेत मन्त्री ज्ञवालीले रुसी प्रधानमन्त्रीलाई उपयुक्त समयमा नेपाल भ्रमण गर्न निमन्त्रणापत्र हस्तान्तरण गरेका छन् । साथै उनले आफ्ना रुसी समकक्षीलाई पनि नेपाल भ्रमणका निम्ति निम्तो गरेका छन् ।
