काठमाडौं - प्रतिनिधिसभाको आजको बैठकको शुन्य समयमा प्रदीप ज्ञवालीले प्रधानमन्त्रीको अमेरिका भ्रमणका विषयमा चासाे देखाएका छन् ।
बैठकमा सभामुखसँग समय लिएर प्रमुख प्रतिपक्षी दल नेकपा एमालेका सांसद प्रदीप ज्ञवालीले प्रधानमन्त्रीले गर्ने भनिएको अमेरिकाको भ्रमणका विषय सदनलाई जानकारी हुनुपर्ने भन्दै राष्ट्रिय विषयमा प्रमुख प्रतिपक्ष दलसँग पनि परामर्श र छलफल गर्नुपर्ने बताएका छन् ।
उनले नेपाललाई भूराजनीतिको द्वन्द्वको थलो बनाउन नहुने भन्दै सन्तुलित परराष्ट्र नीतिमा सचेत रहनुपर्ने बताए । बैठकको शुन्य समयमा बोल्दै सांसदहरुले निर्वाचनमा घरघरमा मतपत्र पुर्याउन सक्ने तर पाठ्यपुस्तक नसक्ने भन्दै तत्काल विद्यार्थीको हातमा पुस्तक पुर्याउन सरकारसँग माग गरेका छन् ।
अन्य सांसदहरुले समयमै रासायनिक मल दिनुपर्ने, दलित बालकलाई गुरुकुलबाट निकाल्नेलाई कारबाही गर्नुपर्ने, गत वर्ष विपदबाट पीडित बनेका नागरिकलाई तत्काल क्षतिपूर्ति दिनुपर्ने माग गरेका छन् ।
सांसदहरुले नागरिकता विधेयक पास गरी नागरिकताबाट वञ्चित जनतालाई राहत दिनुपर्ने, कर्णालीका सडक र पुल कम गुणस्तरीय भएको, निजगढ विमानस्थल आवश्यक भएकोले तत्काल निर्माण थाल्नुपर्ने माग राखेका छन् ।
आजको बैठकमा सांसदहरू प्रेम सुवाल, दुर्गा पौडेले, कृष्णभक्त पोख्रेलले, शेर बहादुर तामाङले मन्त्रालयगत खर्च कटौतीको प्रस्ताव प्रस्तुत गर्ने कार्यसूची रहेको छ ।
छलफलमा शहरी विकास मन्त्रालय, स्वास्थ्य तथा जनसङ्ख्या मन्त्रालय र राष्ट्रिय योजना आयोगको सचिवालय, प्रधानमन्त्री तथा मन्त्रिपरिषद्को कार्यालय, राष्ट्रपतिको कार्यालय एवं उपराष्ट्रपतिको कार्यालय अन्तर्गतको शीर्षकहरूमाथि सांसदहरुले आफ्नो धारणा राख्नेछन् ।
-1755862759.jpeg)
