[caption id="attachment_3186" align="alignnone" width="300"]
प्रभाव संवाददाता[/caption]
पर्सा– राष्ट्रपति विद्यादेवी भण्डारीले तराईको उर्वरभूमि र पहाडका सुन्दर शृँखलालाई चलचित्रका माध्यमबाट प्रचार गरी अन्तर्राष्ट्रिय क्षेत्रसम्म पु¥याउनुपर्ने बताएकी छन् ।
नेपाली चलचित्र प्रदर्शन ५४औँ वर्षमा प्रवेश गरेका अवसरमा पर्साको वीरगञ्जमा आयोजित ‘नेपाली चलचित्र स्वर्णिम महोत्सव–२०७६’को बिहीबर उद्घाटन गर्दै राष्ट्रपति भण्डारीले यस्तो बताएकी हुन् ।
राष्ट्रपति भण्डारीले मुलुकको सांस्कृतिक, भाषिक क्षेत्रको विकासमा ठूलो योगदान पु¥याएको नेपाली चलचित्र जगतलाई अगाडि बढाउनुपर्नेमा जोड दिइन् । ‘प्राकृतिक छटाले भरिपूर्ण रहेको तथा प्रकृतिको काखमा अवस्थित यो प्रदेशमा आयोजित यस कार्यक्रमले चलचित्र क्षेत्रको विकासमा थप टेवा थपेको छ’, राष्ट्रपति भण्डारीले भनिन्, ‘चलचित्रको कारण देशको गौरवको बढेकाले यसलाई सबै क्षेत्रबाट सहयोगको आवश्यकता छ ।’
राष्ट्रपति भण्डारीले चलचित्र क्षेत्रलाई उद्योगका रूपमा विकास गर्नुपर्ने पनि बताइन् । उनले स्वच्छ, स्वस्थ, स्वतन्त्ररूपमा निर्माण गर्नुपर्ने बताउँदै निर्माताहरूलाई समाजमा व्याप्त रहेको बोक्सी प्रथा, बालविबाह, दाइजो प्रथाजस्ता कुरीतिको विरोधमा सकारात्मक चलचित्र बनाउन सुझाव दिइन् ।
सो अवसरमा राष्ट्रपति भण्डारीले नेपाली चलचित्रका प्रथम छायाँकार बैकुण्ठ मास्के र सम्पादक तीर्थराज श्रेष्ठलाई स्वर्णिम सम्मान प्रदान गरिन् भने केडिया समूहका तर्फबाट प्रदीप केडियालाई सम्मान हस्तान्तरण गरेकी छन् ।
कार्यक्रममा सञ्चार तथा सूचना प्रविधिमन्त्री गोकुलप्रसाद बाँस्कोटाले चलचित्र क्षेत्रलाई मनोरञ्जनका रूपमा मात्र नलिएर यसमा नयाँ–नयाँ सिर्जना गरी हिमाल, पहाड र तराईलाई भावनात्मक रूपमा जोड्नुपर्ने तथा चलचित्र क्षेत्रको विकासमा सरकार मात्र नभएर निजी क्षेत्र पनि अग्रसर हुनुपर्ने बताए ।
नेपाली चलचित्रको विकासका लागि वर्तमान सरकार नयाँ कानुन निर्माणतर्फ अग्रसर रहेको जानकारी उनले दिए । मैथिली भाषाका कविकोकिल विद्यापतिलगायत अन्य विभूतिले भाषा तथा संस्कृतिको विकासमा दिएको योगदान बिर्सन नहुने उनको भनाइ छ ।
प्रदेश नं २ का मुख्यमन्त्री लालबाबु राउतले भारतीय सिने स्टार गोविन्दाको नाम लिनेहरू कार्यक्रममा बढी देखिएको तर हाम्रै देशमा रहेका कलाकारलाई बिर्सिने गरेको बताउँदै निर्माताले चलचित्र बनाउँदा समाजले मागेको कथावस्तु दिन सक्नुपर्ने बताए । महोत्सवमा सहभागी हुन राजधानीबाट दर्जनौँ चर्चित कलाकार यहाँ आएका छन् ।
