प्रभाव संवाददाता
काठमाडौं– आउँदो १४ मंसिरमा हुने प्रतिनिधिसभा र प्रदेशसभा सदस्य तथा स्थानीय तहको रिक्त पदको उपनिर्वाचनको तयारीका लागि विभिन्न जिल्लामा मुख्य निर्वाचन अधिकृतको कार्यालय स्थापना भएको छ । बिहीबारदेखि नै देशभर उम्मेदवार मनोनयन दर्ता समेत सुरु भएको छ ।
निर्वाचन आयोगका अनुसार मुलुकका ३७ जिल्लामा ४८ वटा मुख्य निर्वाचन अधिकृत र निर्वाचन अधिकृतको कार्यालय स्थापना भएको छ । प्रतिनिधिसभा सदस्य एक, प्रदेशसभा सदस्य तीन, उपमहानगरपालिका प्रमुख एक, गाउँपालिका अध्यक्ष तीन, उपाध्यक्ष एक र ४३ वडाध्यक्ष पदका लागि उपनिर्वाचन हुँदैछ ।
प्रतिनिधिसभा र प्रदेशसभा सदस्यका लागि बिहीबार उम्मेदवारी दर्ता भएको भने स्थानीय तहका सदस्यको रिक्त पदका लागि भने २७ कात्तिकमा मनोनयन दर्ता गर्ने निर्वाचन कार्यक्रम तय भएको छ ।
धुलिखेल नगरपालिका वडा नं–२ को वडाध्यक्ष पदका लागि हुने उपनिर्वाचनको लागि काभ्रेपलाञ्चोकको धुलिखेलमा बुधबार मुख्य निर्वाचन अधिकृतको कार्यालय स्थापना गरिएको छ ।
वडाध्यक्ष राजन कोइरालाको २०७४ भदौ ९ गते निधन भएपछि सो वडामा हुने उपनिर्वाचनमा एक हजार ८७७ मतदाता सहभागी हुने मुख्य निर्वाचन अधिकृत पुरुषोत्तम ढकालले बताए ।
जिल्ला निर्वाचन कार्यालयले सार्वजनिक गरिएको निर्वाचन कार्यक्रम अनुसार २७ कात्तिकमा उम्मेदारको मनोनयनपत्र दर्ता गर्ने र सूची प्रकाशन गर्ने, २८ गते उम्मेदारको विरोधमा उजुरी दिने, २९ गते मनोनयनपत्र र उजुरीउपर जाँचबुझ गर्ने र नामावली प्रकाशन गर्ने, ३० गते नाम फिर्ता लिन चाहने उम्मेदवारले नाम फिर्ता लिने र अन्तिम नामावली प्रकाशन गर्ने र १ मंसिरमा उम्मेदारलाई निर्वाचन चिह्न
प्रदान गरिनेछ ।
त्यस्तै, उपनिर्वाचनका लागि सप्तरीको छिन्नमस्तामा निर्वाचन अधिकृतको कार्यालय स्थापना गरिएको छ । छिन्नमस्ता गाउँपालिका वडा नं ७ मा वडाध्यक्ष पदका लागि हुने उपनिर्वाचनमा एक हजार ४०३ मतदाता रहेको मुख्य निर्वाचन अधिकृत एवं सप्तरी जिल्ला अदालतका मुख्य जिल्ला न्यायाधीश चन्द्रमणि ज्ञवालीले बताए ।
राजपा नेपालबाट वडाध्यक्षमा निर्वाचित प्रभाकर यादव जिल्ला समन्वय समिति सप्तरीको प्रमुखमा निर्वा्चित भएपछि उक्त पद रिक्त भएको हो । राजपा र समाजवादी पार्टीले संयुक्त उम्मेदवार दिने सहमति गरे पनि उम्मेदवार घोषणा गरिसकेका छैनन् ।
त्यस्तै, गुल्मीमा रुरुक्षेत्र गाउँपालिका–६ अन्तर्गत रिमुवामा हुन गइरहेको उपनिर्वाचनका लागि बुधवार रुरुक्षेत्र गाउँपालिकाको मुकाम बलेटक्सारमा मुख्य निर्वाचन अधिकृतको कार्यालय स्थापना गरिएको मुख्य निर्वाचन अधिकृत एवं जिल्ला न्यायाधीश कृष्णप्रसाद पौडेलले जानकारी दिए ।
तत्कालीन नेकपा (एमाले)बाट वडाध्यक्षमा निर्वाचित पूर्णबहादुर रेगामीको २०७५ साउन १३ गते असामयिक निधन भएपछि सो पद रिक्त रहेको थियो । उक्त पदका लागि हुने उपनिर्वाचनका लागि नेपाल कम्युनिष्ट पार्टी (नेकपा)को तर्फबाट गिरीप्रसाद सिंजाली र नेपाली कांग्रेसको तर्फबाट बेदबहादुर दर्लामीलाई उम्मेदवार बनाउने घोषणा गरिएको छ ।
खोटाङमा साकेला गाउँपालिका–३ का वडाध्यक्ष मणिकुमार राईको मृत्यु भएपछि रिक्त रहेको सो पदका लागि हुने उपनिर्वाचनका लागि मात्तिम मानेभञ्ज्याङमा मुख्य निर्वाचन अधिकृतको कार्यालय स्थापना भएको छ ।
तत्कालीन नेकपा एमालेबाट वडाध्यक्षमा निर्वाचित राईको निमोनियाका कारण गत ९ वैशाखमा मृत्यु भएपछि रिक्त रहेको सो पदका लागि हुने उपनिर्वाचनमा खिदिमाका एक हजार ३०३ मतदाताले मताधिकार उपयोग गर्ने मुख्य निर्वाचन अधिकृत एवम् जिल्ला न्यायाधीश मातृकाप्रसाद आचार्यले बताए ।
यता कपिलवस्तुकाको शिवराज नगरपालिका–१० लालपुरमा वडाध्यक्ष पदका लागि हुने उपनिर्वाचनका लागि सो नगरपालिकाको वडा नं. ५ मा मुख्य निर्वाचन अधिकृतको कार्यालय स्थापना भएको मुख्य निर्वाचन अधिकृत जिल्ला न्यायाधीश लोकजंग शाहले बताए ।
गलकोटको बडिगाड गाउँपालिका–२ मा हुने उपनिर्वाचनलाई लक्षित गरी बडिगाड गाउँपालिका–५ ग्वालिचौरमा निर्वाचन अधिकृतको कार्यालय स्थापना भएको जिल्ला निर्वाचन अधिकारी विकासचन्द्र शर्माले जानकारी दिए ।
शर्माका अनुसार उच्च अदालत पोखरा बागलुङ इजलासका रजिष्ट्रार ध्रुवबहादुर ढकाललाई निर्वाचन अधिकृतको जिम्मेवारी दिइएको छ । कार्यालय स्थापनापछि मुख्य निर्वाचन अधिकृत वासुदेव न्यौपानेले निर्वाचनमा आचारसंहितालाई पूर्णरूपमा पालना गराउन सरोकारवालाहरूले नै अनुगमन तथा नियमन गर्नुपर्ने बताए ।
बडिगाड गाउँपालिका वडा नं २ का वडाध्यक्ष विष्णु भुषाल जिल्ला समन्वय समिति बागलुङको उपप्रमुखमा निर्वाचित भएपछि रिक्त रहेको पदमा निर्वाचन हुन लागेको हो । २ नं वडाको निर्वाचन त्रिभुवन नमूना माध्यामिक विद्यालयको दुई मतदान केन्द्रमा हुनेछ । सो वडामा एक हजार ७४२ मतदाता छन् ।
बागलुङमा क्षेत्र नं २ को प्रदेशसभा (ख) मा समेत उपनिर्वाचन हुँदैछ । गण्डकी प्रदेश सांसद टेकबहादुर घर्तीको मृत्यु भएका कारण उपनिर्वाचन हुनलागेको हो । दुवै स्थानमा राजनीतिक दलहरूले आ–आफ्ना उमेदरवार उठाएर चुनवामा होमिएका छन् ।
