काठमाडौं– पूर्वराष्ट्रपति डा रामवरण यादवले गिरिजाप्रसाद कोइरालाकै कारण मुलुकमा लोकतन्त्र आएको बताएका छन् ।
गिरिजाप्रसाद कोइराला फाउण्डेशनले आयोजना गरेको ‘राष्ट्रिय तथा अन्तर्राष्ट्रिय समितिहरूको परिचयात्मक कार्यक्रममा उनले यस्तो बताएका हुन् । उनले भने, ‘गिरिजाप्रसाद कोइरालाजस्तो दृढ अठोट भएको नेताका कारण मुलुकमा लोकतन्त्र आएको हो । उनले कोइराला नेपालको लोकतान्त्रिक नेता भएकाले नै यो सब सम्भव भएको पनि बताए । उनले भने, ‘कोइराला नेपालको लोकतान्त्रिक नेता हुनुहुन्थ्यो ।’
उनले माओवादीलाई शान्तिप्रक्रियामा ल्याउन पनि कोइरालाको विशेष योगदान रहेको बताए । उनले भने, ‘जंगलमा विद्रोह गरेर बसेको माओवादीलाई शान्तिप्रक्रियामा ल्याएर लोकतान्त्रिक मुलुक निर्माणमा गिरिजाबाबुको महत्वपूर्ण योगदान रहेको छ ।’ उनले कोइरालाले चारवटा राजाको संगत गरेको र अन्तर्राष्ट्रिय समुदायले लोकतान्त्रिक नेता भनेर चिनेका कारणले नै सरकारले आतंककारी घोषणा गरेको तत्कालीन नेकपा माओवादीसँग १२ बुँदे सम्झौता गर्दा पनि उनलाई कसैले थुन्ने आ“ट नगरेको बताए । गिरिजाप्रसाद कोइरालालाई शान्ति, लोकतन्त्र, गणतन्त्र र संघीयताबाट कसैले चाहेर पनि अलग गर्न नसक्ने उनको भनाइ थियो ।
पूर्वराष्ट्रपति डा यादवले संघीय लोकतान्त्रिक गणतन्त्रलाई सफल र बलियो बनाउन सबै राजनीतिक दलका नेतालाई व्यक्तिगत स्वार्थभन्दा माथि उठेर काम गर्नुपर्ने सुझाव दिए । दलका नेताले शान्ति, लोकतन्त्र र राष्ट्रहितलाई सर्वोपरि राख्नुपर्ने उनको भनाइ थियो ।
नेपाली कांग्रेसका महामन्त्री डा शशांक कोइरालाले नेपालको विकासका लागि जलविद्युत, पर्यटनस“गै आधुनिक कृषिको विकासमा सरकार लाग्नुपर्ने सुझाव दिए । उनले यसको लागी कृषिको आधुनिकीकरण पहिलो प्राथमिकता भएको बताए । उनले भने, ‘जलविद्युत, पर्यटनस“गै आधुनिक कृषिको विकासमा सरकार लाग्नुपर्छ ।’ उनले फाउण्डेशनले देश विकासको क्षेत्रमा खेलेको भूमिका अतुलनीय रहेको उल्लेख गरे ।
कांग्रेस केन्द्रीय सदस्य डा रामशरण महतले विपी कोइराला नेपालको प्रधानमन्त्री हुँदा एक चीन नीति अँगालेको र त्यसले अहिले पनि निरन्तरता पाइरहेको बताए । विपी कोइरालाको बेलाको संयुक्त राष्ट्रसंघको बैठकमा नै विपीले चीनलाई संयुक्त राष्ट्रसंघको सुरक्षा परिषद्मा राख्नुपर्ने आवाज उठाउनु भएको स्मरण डा महतले गरे ।
कांग्रेस केन्द्रीय सदस्य डा शेखर कोइरालाले कांग्रेसमा विचारलाई बन्देज लगाउने गरी विनियमावली बनाउन लागेको भन्दै विचारको स्वतन्त्रतामा बन्देज लगाएमा पार्टी समाप्त हुने बताए ।
कांग्रेस नेत्री एवं फाउन्डेशनका अध्यक्ष सुजाता कोइरालाले गिरिजाप्रसाद कोइरालाले अगाडि बढाएको सहमति, सहकार्य र एकताको मार्गबाटै शान्ति, लोकतन्त्र, गणतन्त्र संस्थागत भई देशमा समृद्धि आउने बताईन् ।
कांग्रेस केन्द्रीय सदस्य मानबहादुर विश्वकर्माले गिरिजाबाबुको कारणले नै मुलुकमा लामो समयदेखि अस्थिर रहेको राजनीति समाप्त भएको उल्लेख गरे ।
ट्रेकिङ एजेन्सिज् एशोसियशन अफ नेपाल (टान)का अध्यक्ष खुमबहादुर सुवेदीले नेपालको पर्यटन क्षेत्रको विकासका लागि टान फाउण्डेशनसँग सहकार्य गरेर अगाडि बढ्ने प्रतिबद्धता व्यक्त गरे ।
